Республика күніне орай жастарға әскери-патриоттық тәрбие беру аясында М.Сужиков атындағы №6 мектеп базасында «Әскери – патриоттық даңқ кабинеті» ашылды. Салтанатты жиынға Қызылорда қаласы бойынша білім бөлімінің басшысы Ерлан Теңізбайұлы, «Жас сарбаз» жасөспірімдердің әскери-патриоттық қозғалысы төрағасы Мейірбек Оразұлы, ҚР еңбек сіңірген қайреткері, ерең еңбегі үшін медалінің иегері Қорғанбек Қайруллаев қатысты.
Шара қатысушылар елінің болашағы үшін еңбек етіп, ерліктің ерен үлгісін көрсетіп, халқының құрметіне бөленген Мемлекет және қоғам қайраткерлері Мұхамедғали Сужиков, Кеңес Одағының батыры Георгий Ковтунов, полковник Қазбек Төремановтарды еске алып, Мұхамедғали Әленұлы Сужиков бюстіне гүл шоқтарын қойды.
![](https://ustazmartebesi.kz/wp-content/uploads/2023/10/foto-3-aesker-1024x594.jpg)
Мұнан соң мектеп ғимаратындағы әскери-патриоттық даңқ кабинетін ашып, лентасын қиды. Кабинеттегі әрбір батырды сол мектеп оқушылары таныстырды. Мейірбек Оразұлы генарал-лейтенант Мұхамеджан Таласовтың арнайы құттықтауын жеткізіп, мектеп ұжымына компьютер табыстады.
– Еліміздің дамуы мен өркендеуі, келешегі жастарға тікелей байланысты екенін Президентіміз Қасым-Жомарт Тоқаевтың «Жастар дамудың символы және жарқын болашаққа деген үміттің көрінісі» деген сөздері дәлелдейді және жастарға тәрбие беру ісінде әскери-патриоттық жұмыстың мәні өте зор екенін айқын көрсетеді. «Жас сарбаз» қозғалысы бастамасын алғаннан бастап алғашқы қозғалыс филиалы осы Сыр өңірінде ашылған болатын, ең бірінші жастарды әскери-патриоттық тәрбиелеу бағытындағы екіжақты өзара ынтымақтастық меморандумы да Қызылорда облысынан бастама алды. Сондай-ақ, бүгін Сыр еліне жол тартқанымыздың бірден бір себебі осы мектептің түлегі өздеріңіздің жерлестеріңіз, Отан қорғау ісінде өскелең ұрпаққа үлгі болар азаматтардың бірі, Қазақстан Республикасы Қорғаныс министрінің орынбасары және «Жас сарбаз» қозғалысының іргетасын қалаушысы генерал-лейтенант Мұхамеджан Таласовтың аманаты еді, – деді Мейірбек Оразұлы.
Шараға қатысушы қонақтар әскери даңқ кабинетіндегі құнды дүниелермен танысты. ҚР еңбек сіңірген қайреткері Қорғанбек Қайруллаев құрмет кітабына өз лебізін жазып, жас бүлдіршіндерді құттықтады.
Мектептің акт залында мектеп мұғалімдерінің Мемлекет және қоғам қайраткерлері Мұхамедғали Сужиков, Кеңес Одағының батыры Георгий Ковтунов, полковник Қазбек Төремановтардың өмірінен алынған көріністер көпшілік назарына ұсынылды. Оқушылар хормен ән айтып, қонақтарға жылы әсер қалдырды.
Е.Ерболұлы