Ас адамның арқауы емес пе? Ата-аналар қуанып жүр. Бастауышта оқып жүрсе де, тамақтануға қаржы жұмсап, не үйінен ас әкелетін оқушылар енді мектеп асханасынан тегін тамақтанады. Жақсы жаңалықтың тез таралатыны белгілі. Ең алғашқы күні қала мектептеріндегі тамақтанып жатқан оқушыларды өз көзімізбен көріп, мәз-мейрам болып жүргенін байқадық.
Иә, мектеп асханасының жұмысы қыза түсті. Аймағымыздың мектептерінде бастауыш сынып оқушыларының барлығына тұтастай тегін ыстық тамақ берілуде. Осыған дейін бір мезгіл тегін ыстық тамақ тек әлеуметтік жағдайына қарай берілген болса, енді мемлекеттік мектептердің 1-4 сынып оқушылары 100% ыстық тамақпен қамтылды. Бұл мүмкіндік облыстағы мемлекеттік білім беру ордаларындағы – 70863 бастауыш сынып оқушыларына беріліп отыр. Сонымен қатар әлеуметтік көмекті қажет ететін отбасында тәрбиеленетін 5-11 сыныптағы 17382 оқушы да тегін тамақтанады.
— Бүгінгі күні бір мезгіл тамақтану құны орташа есеппен 557 теңгені құрайды. Осыған сәйкес, 1-4 сыныпта білім алатын 70863 оқушы, 5-11 сыныпта қолдауды қажет етеін 17382 бала, барлығы 88245 бала тегін тамақпен қамтылуда. Бұл мақсатта бөлінген қаржы 7,6 миллиард теңгені құрап отыр,- деді облыстық білім басқармасының басшысы Мейрамбек Шермағанбет.
Мектептерде перспективалық маусымдық екі апталық мәзір жасалған. Ас мәзірін әзірлеу барысында оқушылардың мектепте болу ұзақтығы және балалардың жас ерекшеліктері ескерілген. Сондай-ақ, мектептерде қамқоршылық кеңес, ата-аналар комитеті, мектеп әкімшілігі мен медицина қызметкерлерінің қатысуымен тамақтану сапасын мониторингілеу бойынша комиссиялар құрылған.
Ата-аналар қорықпаса да болады, тамақтардың сапасы сала мамандарының күнделікті органолептикалық бақылауынан өткізіліп отырады.
А.ӘДІЛЖАНҰЛЫ
