Білім беру нысандарында қауіпсіздік шаралары күшейтілмек

Ақылдың ажар-көркіне айналған білімнің бала болашағы үшін маңызы зор. Себебі, «білсем, көрсем екен» деп биікке ұмтылған, талаптың тұлпарын мінген тарландар талай шыңды бағындыратыны сөзсіз. Сайып келгенде, мектептің жүрегі саналған мұғалімдер де оқушыларды оқуда озат етерлік сапалы білім беруді басты мақсаты еткен. Егер берілетін сапалы білім мен саналы тәрбие тоғысар болса, шәкірттің алар асуы көп болатыны белгілі. Егер мектептің – мәдениет ошағы, рухани орта екенін аңғарсақ, онда жалыны ұрған жанжал мен теперішті текетірестердің орын алмағаны ләзім. Өйткені, берекені бұзатын бұзақылық пен теріс әрекеттер берілетін білімді де баянсыз һәм берекетсіз етпек. Білім алушылар оқу орындарында болатын кейбір оқыс оқиғалардың салдарынан жазатайым опық жеп қалуы да әбден мүмкін. Бүгінде басшылық осы мәселені назарға алып, білімнің қара шаңырақтарындағы қауіпсіздікті күшейтпек.

Қазан қаласындағы қақтығыстан кейін, дәлірек айтсақ, мектеп ғимаратында болған атыстан мұғалімдер мен оқушылар жапа шегіп, тіпті адам өлімі де орын алған еді. Ресейдің Пермь университетінің аумағында да атыс болып, жарақат алғандар мен қаза болғандардың саны біраз болған. Сондықтан елімізде тосыннан төнетін қауіптің алдын алу үшін Білім және ғылым министрі Асхат Аймағамбетов білім беру ұйымдарында барлық қауіпсіздік шарасы қабылдану қажеттігін айтып, тиімді талаптарды тілге тиек етті. «Оқу орындарының әрбір басшысы балаларды қорғау мәселесіне басымдық беруі тиіс» деген А.Аймағамбетов қауіпсіздіктің қоғам үшін маңыздылығын айқындап өтті. Бүгінде бұл мәселе қатаң қолға алынып, облыстық білім басқармасы мен полиция департаменті бірлесе отырып, қауіпсіздік жұмыстарын кешенді жүргізуге бел буған. «Балаларға сапалы білім мен тағылымды тәрбие берумен қатар, біздің ең басты міндетімізге білім беру ұйымдарындағы оқушылардың қауіпсіздігі де кіреді. Осы мақсатта ҚР Білім және ғылым министрі А.Аймағамбетовтің 2022 жылғы 30 наурыздағы №117 бұйрығымен Қазақстан Республикасы Білім және ғылым минстрлігінің террористік тұрғыдан осал объектілері мен білім және ғылым саласындағы қызметті жүзеге асыратын террористік тұрғыдан осал объектілерді терроризмге қарсы қорғауды ұйымдастыру жөніндегі нұсқаулық бекітілді» деді облыстық білім басқармасының бөлім басшысы Берік Мәмбетов. 6 тарау, 104 тармақтан тұратын нұсқаулықта талаптар тізбегі жазылып, тарқатылған. Қысқасы, оқу орындарында бейнебақылау камералары орнатылып, дабыл түймелері іске қосылып, арнайы күзетпен қамту да қаралып, қауіпсіздік қорғанысын күшейту жүзеге асырылуда. Б.Пернебайұлының айтуынша, барлық білім нысандары техникалық жабдықтау, техникалық бақылау және басқару жүйелерімен қатар байланыс жүйелері және құралдарымен жарақталады. Алдағы уақытта да бұл бағыттағы жұмыстар тұрақты бақылауға алынып, нұсқаулыққа сәйкес жүргізіледі.

Елімізде зерделеу жұмыстарының нәтижесінде террористік тұрғыдан осал санат қатарына көптеген білім беру объектілері анықталған болатын. Әсіресе, мектептерден бейнебақылау жүйесімен толық жабдықталғанымен, стандарттарға сәйкес келмей, бірқатар кемшіліктер табылған. Тіпті кейбір жүйелерде ақпарат тек қысқа мерзімде ғана сақталып, кейде жарық сөнген кезде барлық бейнебақылау жүйесі өшірілетіні анық болған. Яғни, осындай көлеңкелі тұстар біраз кемшіліктердің бетін ашуда. Дегенмен, қазір облысымызда жабдықтармен жарақтандыру жолға қойылып, бала қауіпсіздігі бірінші орында тұр. Оның үстіне оқыс оқиға немесе апат болған жағдайда барлығы абдырап қалмасы үшін мұғалімдер мен балаларға арнайы түсіндірме жүргізіліп, бейімдеуге басымдық берілген. Яғни, білім алушылар мен оқу орнындағы қызметкерлерге төтенше жағдай туындаған кезде іс-қимыл тактикасына даярлауға көңіл бөлінген. «Дағдарыстық жағдайлар болып, қауіп төнген кезеңде тығырықтан шығудың жолын іздеп, қай кезде не істеу керектігін айтып, сақтық шараларын жасау жөнінде барлық ақпарат бала мен мұғалімге беріліп, баяндалатын болады» деді облыстық жұмылдыру дайындығы басқармасының бөлім басшысы Ардақ Әбішева. Асылында, ақылмен шешілген іс-әрекет алаңдаушылыққа апармайды. Сонда ғана, мезгілсіз адам өлімі азайып, теріс әрекеттер тетігі тежелмек.

Түйіндей келе, білімнің қайнар көзіне айналған оқу орындарында олқылық пен оқыс жағдайлардың болмағаны жөн. Басшылықтың бұл мәселені қалтарыста қалдырмағаны да көңіл қуантады. «Жұмыла көтерген жүк жеңіл» демекші, бірлесе атқарылған ауқымды жұмыстар жемісін бергей. Расында, кез-келген қиындықтың алдын алып, оны болдырмаудың баянды жолын іздеу – тиімді тәсіл. Олай болса, іргелі істе іркіліс болмай, қауіп-қатер қатары сейілсін.

Замира ДАСТАНҚЫЗЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған