Білім саласы бір ізге түскелі біраз теріс әрекеттің беті ашылып, бармақ басты, көз қысты әрекеттен арылуда. Бұған облыстық білім басқармасының басшысы Ақзира Қасымованың желідегі жазбасы дәлел.
– Біз облыстық деңгейде жыл сайын педагогтарды аттестациялау барысында мұғалімдердің портфолиоға жалған құжаттарды салу жағдайларын анықтап келеміз. Әсіресе күмән келтіретін құжаттарды (сертификат, грамота) ұлттық біліктілік тестілеудің түпнұсқаға сәйкестігін нақтылау ісін ашық жүргізіп, теріс әрекеттерге қатысты фактілерді дер кезінде өзіміз анықтаймыз. Мәселен, өткен жылдың қаңтар-маусым айларында аттестаттау комиссиясымен 863 құжатты қарап, 24 мұғалімнен жалған құжаттың ізін байқадық. Ал, шілде-желтоқсан аралығында 587 құжат қарап, 14 мұғалім түпнұсқаны дәлелдей алмады. Алайда, әрбір педагогтан түсініктеме алып, жалақыға үстеме төлеу ісінде бюджетке шығын келтірмеудің алдын алдық. Бұл фактілердің әрбірі педагогтік әдеп жөніндегі кеңестерде қаралуда. Мұнан бөлек, жоғары оқу орындарына сұрау салу мониторингі нәтижесінде бүгінгі күні облыс бойынша жалған дипломмен 112 фактіні анықтап, құзырлы органға ұсыным жолдадық, – деп жазды Ақзира Бақтыбайқызы.
Жауапкершілігі мол мамандықта жалған құжатпен қызмет етіп жүрген 112 педагог жайында ақпарат құзырлы органдарға ұсынылып, нәтижесінде жоғары білімі жөнінде жалған диплом ұсынған педагог қызметкерлер жұмыстан босатылып, тиісті органдар тарапынан кінәлі тұлғалар қылмыстық жауапкершілікке тартылды. Қазіргі таңда арнаулы білімі бойынша дипломы бар педагогтер алынған үстеме ақыларын қайтару үшін өз қызметтерін жалғастыруда.
Ағарту саласына дақ түсіріп, адамдықтан аттағандар, жалған диплом берген оқу орындары жайында білмек болып, тиісті басқармадан сұрау салғанбыз. Сала мамандары сот шешімінсіз жалған диплом жасатқан 112 факті жайында ақпаратты айта алмайтынын алға тарты. Алдағы уақытта теріс әрекетке жол бергендердің есімдері белгілі болар. Себебі білім саласында беті ашылған әрбір былықты, оған қатысты тұлғаны қоғам алдына шығарып, олардан бойы аулақ ұстауымыз керек. Ашықтық, тазалық, еркіндік – жаңа Қазақстанның ұстанымы. Болашаққа жасаған қастандық құпия күйінде қалмауы керек.
Е.ЕРБОЛҰЛЫ
