Халықаралық тағылымдама – жаңа өзгеріс пен дамудың кепілі

Тағылымдама білім беруде жаңа өзгерістер мен алға дамудың және дағдылар мен қабілеттерді шыңдайтыны мәлім. 2022 жылдың мамыр айында «Жасыл мектеп» жобасы аясында Беларусь елінде тағылымдамадан әріптестеріммен бірге өткен болатынмын.

Неліктен Беларусь елі? Таңдау Беларусь еліне түсуінің бірнеше себебі бар.

1. «Жасыл мектептер» жүйесі Беларусь елінде қарқынды дамуда.

2. «Жасыл балабақша» – «Жасыл мектеп» – «Жасыл университет» жүйесі қалыптасқан.

3. Беларусь елі мектепте экологиялық білім беруді тереңдетіп келеді.

4. «Жасыл мектеп» жобасын іске асыру үшін мұғалімдер мен оқушылардың бірлесіп жұмыс жасауы қамтамасыз етілген.

Әли Мүсілімов атындағы №101 мектеп-лицейі 2020 жылдан бері «Жасыл мектеп» жобасын іске асырып, қазіргі таңда Қызылорда облысы бойынша жобаны жүзеге асырушы тірек білім беру ұйымы ретінде бекітілді. Облыс көлемінде мектептерге өз тәжірибемізді таратудамыз. 5 бағытты қамтыған жоба кеңейіп, 7 бағытты қамту алға қойылды. Жоба жыл сайын жаңалықты, жаңа ізденісті талап етеді. Жоба аясында оқушылар мен ұстаздар ғылыми зерттеулер жүргізіп келеді. Міне, жоғарыда аталған талаптарға сай болу үшін Белаурсь елінде әріптестермен тағылымдамадан өттік.

Тағылымдама қалай болды?

Бұл Беларусь педагогикалық мемлекеттік университетінің ұйымдастыруымен өтті. М.Танка атындағы біліктілікті арттыру және қайта даярлау институтының тренерлері заманауи тренигтер өткізді. Күнделікті ұйымдастыралған бағдарлама жаңа идеяның туындауына септігін тигізді. 10 күнге созылған ғылыми-зерттеу тағылымдамасынан еліміздің білім беру жүйесінің дамып келе жатқанына көз жеткіздік. Осы ретте Беларусь елінің де білім беру жүйесінің қажетті тұстарын түртіп отырдық.

Мектебімізде жүзеге асырылатын «Жасыл мектеп» жобасына қандай толықтырулар мен инновациялқ идеялар енгіземіз?

Былтырғы оқу жылында І халықаралық «Жасыл мектеп: экологиялық бағытталған оқытудың инновациялық шешімдері» атты ғылыми-практикалық конференция өткіздік. Конференцияға ТМД елдерінің ғалымдары қатысып, өз тәжірибесімен бөлісті. Демек, халықаралық байланыс әлі жалғасын табуда. Халықаралық байланысты нақты алгоритммен жүргізу мақсатында М.Танка атындағы Беларусь педагогикалық мемлекеттік университетімен меморандумға қол қойылды. Ағымдағы оқу жылында оқушыларды халықаралық экологиялық ғылыми сайыстарға қатыстыру жобасы іске асырылуда. Ғылыми-зерттеу жұмыстарына аса мән аударғалы отырмыз. Еліміздің экологиялық ахуалын реттеу жобаларын іске асырғымыз келеді. Осы мақсатта «Жасыл мектеп» жобасы аясында екі бағыт қосылды. Салауатты өмір салтын ұстану және дұрыс тамақтануды жүзеге асыру.

Тағылымдамадан өту барысында мектепте асырылып жатқан жобалардың заманауи екендігін аңғардық. Беларусь елінің әріптестері Қазақстан мектептері инновациялық технологияларды кеңінен пайдаланатынына және материалдық техникалық базаның заманауи жабдықталғанына көз жеткізді.

Қорыта айтқанда, тағылымдама экологиялық білім беруді және экологиялық тәрбиені тереңнен меңгеруге, халықаралық байланысты әрі қарай жүзеге асыруға, халықаралық «Green Office» жастар экологиялық волонтерлік ұйымын құруға сеп болды. Алдағы уақытта жаңа халықаралық жобалармен қала, облыс мектептеріне таныстырып, «Жасыл мектеп» мектептер желісінің әрі қарай құрылуына үлес қоса беретін боламыз.

Айгүл ӨТКЕЛБАЕВА,

Әли Мүсілімов атындағы №101 мектеп-лицейінің директоры

Пікір үстеу

Э-пошта мекенжайыңыз жарияланбайды. Міндетті өрістер * таңбаланған