Тарихқа тағзым – ұрпаққа тағылым

М.Мәметова атындағы Қызылорда педагогикалық жоғары колледжінің 90 жылдық және Кеңес Одағының батыры М.Мәметованың 100 жылдық мерейтойына орай техникалық және кәсіптік білім беру ұйымдарының студенттері арасында «Тарихқа тағзым – ұрпаққа тағылым» атты қалалық жыр мүшәйрасы болып өтті.

Кеңес Одағының батыры Мәншүк Мәметованың ерлігін жас ұрпаққа дәріптеу, жас ақындардың шығармашылығына қолдау көрсету – шараның басты мақсаты. Қазылар алқасында ақындар Ұлықбек Бекұзақұлы, Сұлтанбейбарыс Алматұлы, Айдар Сайлауов болды.

Мүшәйраның шарты бойынша қатысушылар екі кезең бойынша бақ сынады. І кезең Кеңес Одағының батыры Мәншүк Мәметоваға арнау өлеңдерін оқыды, ІІ кезеңде тақырып таңдау арқылы байқау барысында өлең шумақтарын шығарды.

Қалалық жыр мүшәйрасына Қазанғап атындағы Қызылорда музыкалық колледжі, «Болашақ» университетінің жоғары колледжі, Орда колледжі, Абылайхан атындағы жоғары колледжі студенттері бақ сынауға келді.

Қаламгерлер сайысының нәтижесінде І дәрежелі диплом М.Мәметова атындағы Қызылорда педагогикалық жоғары колледжінің студенті Өмірзақ Дидар, ІІ дәрежелі диплом М.Мәметова атындағы Қызылорда педагогикалық жоғары колледжінің студенттері Зере Бұрхат, Аружан Сақтағанова, ал ІІІ дәрежелі дипломды Болашақ жоғары колледжінің студенттері Ақниет Омарова және Гаурһартас Жылқайдарқызы еншіледі.

Қаламды қуат, сөзді шуақ еткен ақындарға марапат тапсырылып, құнды кітаптар тарту етілді. Жас ақындарға қазылар алқасы сәттілік тілеп, жаңа буынға талмай іздену керек екенін айтты. Шара жоғары деңгейде ұйымдастырылып, кешке келген ақындар да өз өлеңдерін оқып, жас ақындарды шабыттандырды.

А.ӘДІЛЖАНҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған