М.Мәметова атындағы Қызылорда педагогикалық жоғары колледжінде 2022 жылдың 5 мамырында Кеңес Одағының Батыры М.Мәметованың 100 жылдығы мен оқу орнымыздың 90 жылдық мерейтойларына орай және «Жас сарбаз» балалар мен жасөспірімдер бірлестігінің әскери-патриоттық тәрбие берудегі рөлін күшейтуге бағытталған мемлекеттік саясатты жүзеге асыру мақсатында техникалық және кәсіптік білім беру ұйымдарының студент қыздары арасында облыстық дәстүрлі патриоттық форумы аясында «Мәншүк маршы» ұйымдастырылуда. «Жас сарбаз» жобасы – колледждерде «Жас сарбаз» мамандандырылған топтарын құруды көздейтін жоба. Бұл бойынша өзімнің жетекшілігіммен әскери-патриоттық клуб жұмыс істейді. Қазірге дейін клуб сабындағы жас сарбаздар бойында елжандылық, отансүйгіштік қасиеттерін арттыру үшін түрлі деңгейдегі жобалар жасалған.
ҚР Білім және ғылым министрінің 2021 жылғы 18 қаңтардағы №24 бұйрығына сәйкес техникалық және кәсіптік, орта білімнен кейінгі білім беру ұйымында «Жас сарбаз» әскери-патриоттық клубының жұмысын ұйымдастыру жөніндегі әдістемелік ұсынымдар бойынша 2018 жылдың жаңа оқу жылынан бастап, колледжішілік «Жас сарбаз» әскери-патриоттық клубы құрылды. Клуб құрамында «Жас Мәншүк», «Жас шекарашы достары», «Жас қыран жастар жасағы» атты үйірмелер ашылды, қатысушы мүшелердің жалпы саны 124 студент, клуб жетекшісі Бастапқы әскери және технологиялық дайындық пәнінің оқытушы-ұйымдастырушысы, запастағы аға лейтенант О.Ембергенов.
2018 жылдан бері дәстүрлі түрде өткізіліп келе жатқан маршқа Шекара қызметі департаментінің қызметші қыздары, Оңтүстік Өңірлік қолбасшылығының Ұлттық Ұланы №55-47 әскери бөлімі қызметші қыздары, Қызылорда облыстық және қалалық Қорғаныс Істері жөніндегі департаментінің әскери қызметші қыздары, Қазақстан Республикасы Қарулы Күштерінің №66-597 әскери бөлімі қызметші қыздары және қаламыздағы орта арнаулы оқу орындарынан «Жас сарбаз» ұйымына мүше студент-қыздар қатысатын. Биылғы «Мәншүк маршы» ерекшелігі, Қазақстанның түкпір-түкпірінен орта арнаулы оқу орындарынан арнайы келіп мерейтойлық маршқа қатысуға ынта білдірген әріптестеріміздің болуы. Атап айтар болсақ, Ж.Досмұхамедов атындағы Орал жоғары педагогикалық колледжінің, М.О.Әуезов атындағы Семей педагогикалық колледжінің, Ж.Мусин атындағы Көкшетау жоғары қазақ педагогикалық колледжінің, Ақтөбе гуманитарлық колледжінің, Жаркент гуманитарлық-техникалық колледжінің маршқа қатысушылары ұйымдастырылып отырған шараның деңгейінің өсуіне, батыр апамыздың рухына тағзым жасай отырып, жастарды елжандылыққа тәрбиелеудің жаңаша үлгісі ретінде танылады деген сенімдемін. Биылғы «Мәншүк маршына» 260 отансүйгіш жас буын өкілі қатысады деп күтілуде. «Мәншүк маршының» мақсаты мен міндеті – форумға қатысушы белсенді, жалынды жастардың бойында Отанына, туған жеріне деген елжандылық, патриоттық сезімін арттыру, рухани құндылықтарды жетілдіру.
«Мәншүк маршы» 2022 жылдың 5 мамырында М.Мәметова атындағы Қызылорда педагогикалық жоғары колледжіндегі Мәншүк ескерткішінен бастау алып, қала көшелерімен жүріп өтіп, Тағзым алаңында сап түзейді. Содан соң «Мәңгілік алау» ескерткішінде құрметпен гүл қою рәсімі өткізіледі және мерекелік концерттік бағдарламамен жалғасады деп жоспарлануда.
«Жас сарбаз» балалар мен жасөспірімдер бірлестігі мүшелерінің қатысуымен «Мәншүк қыздар маршы» жыл сайын дәстүрлі түрде өткізіліп келеді. Бұл өңіріміздегі көршілес оқу орындарында ғана емес, республика аумағындағы барлық білім мекемелерінде баламасыз жобалардың бірегейі деп білемін. Шара барысында өскелең ұрпаққа апамыздың жанқиярлық ерліктері мен отансүйгіштік сезімі туралы айтылып, отансүйгіштік рухы, елжандылық қасиеттері кеңінен насихатталады.
Тек қана қыздардан құралған «Мәншүк маршының» дәстүрлі форматын сақтай отырып, оларды өз елінің жігерлі де қайсар ұрпағы ретінде отансүйгіштік бағытта тәрбиелеуде, азаматтық белсенділігін қалыптастыруда, туған жері мен елінің тарихын құрметтей білуге үйретуде алатын орны ерекше деп сеніммен айта аламын.
Оңдасын Ембергенов,
Бастапқы әскери және технологиялық дайындық
пәнінің оқытушы-ұйымдастырушысы,
запастағы аға лейтенант
