Биылғы Ұлу жылында бір мүшелді толтырып жатқан «Ұстаз мәртебесі» кәсіби салалық басылым ретінде облысымыз ғана емес, республикамыз бойынша мұғалімдердің тәжірибе алмасуы үшін пайдалы болып отырған санаулы газеттердің бірі. Санаулы дейтін себебіміз, Тәуелсіздік жылдарына дейін «Қазақстан мектебі», «Бастауыш мектеп» қана емес, әр пәннің өзінің жеке-жеке атауымен журналдар ай сайын тұрақты шығып тұратын. Кейін ел егемендігін алған елең-алаң шақтарда экономикалық қаржылық қиындықтарды еңсере алмай, бұл басылымдардың бәрі дерлік жабылып тынды. Кейін жауыннан соңғы саңырауқұлақтай дүр көтеріліп, коммерциялық мақсатты көздеген педагогикалық жеке басылымдар бірінен соң бірі жарық көргенімен соңы баянды болмады. Өйткені кешегі Алаш арыстары бағалағанындай, елдің көзі, құлағы һәм тілі болуға тиісті мұндай парасатты істе тек қана пайданы ойлаудың қыл аяғы құрдымға кетіп тынатыны белгілі еді.
Ағартушылық ақпараттық бағытты ұстанған қазақ мерзімді басылымдарының пайда көруден бұрын елге, оқырманға пайдалы болсам дейтін бір асыл мұратын және сол мақсатты жолында табандылықтан таймайтын еңбексүйгіш болмысын осы «Ұстаз мәртебесінің» ұдайы, тұрақты түрде шығып отыруынан көреміз. Осы жолдың баянды да берекелі жалғастығын және оқырманның зор сүйіспеншілігін тілейміз.
«Мектептің жаны – мұғалім. Мұғалім қандай болса, мектеп сондай болмақшы. Яғни, мұғалім білімді болса, ол мектептен балалар көбірек білім алып шықпақшы. Солай болған соң, ең әуелі мектепке керегі – білімді, педагогика, методикадан хабардар, жақсы оқыта білетін мұғалім» деген ұлт ұстазы Ахмет Байтұрсынұлының ұлағатын әрбір мұғалімнің жүрегіне жеткізуге ұмтылған «Ұстаз мәртебесі», әрқашан мерейің үстем болсын!
Айжан ЖҰМАБЕКҚЫЗЫ
