Ақпарат айдынындағы адалдық

Қазақ баспасөзінің тарихы тағылымға толы. 1913 жылы Әлихан Бөкейханұлы, Ахмет Байтұрсынұлы, Міржақып Дулатұлы секілді ұлт зиялыларының есімімен ұштасып жатқан «Қазақ» газетінің алғашқы саны жарық көріп, ұлт мүддесін қорғауда ұлттық-саяси мінберге айналып, болашаққа деген ұлы мұрат жолында барша халықтың басын біріктірген еді. Ұлттық бірлік пен ынтымақтың ерен үлгісін көрсетіп, қазақ қоғамынның рухани кемелденуіне айрықша ықпал еткенін жақсы білеміз. Сол із жалғасын тауып, сонау 2011 жылы 18 наурызда тәуелсіз Қазақстанның ақпарат айдынында «Ұстаз мәртебесі» газетінің алғашқы нөмірі жарыққа шығып, қалың оқырманға жол тартқан болатын.

Сөз бостандығына адалдығынан айнымаған басылымдар әрдайым шынайы ақпараттың және сапалы сараптаманың қайнар көзі болып қала беретіні белгілі. Газет-журналдар барлық уақытта замана тынысын дөп басып, мемлекет пен қоғамдағы қордаланған мәселелерді көтеріп, түрлі көзқарастағы ой-пікірлерді жарыққа шығарып, азаматтық қоғамның қалыптасуына қызмет жасаулары қажет. Сонымен қатар, газет-журналдар баспасөз ақпарат құралы ретінде жалпы адамзатқа ортақ ізгі құндылықтарды тұрақты түрде дәріптеп отырулары керек.

Осы ретте «Ұстаз мәртебесі» газетінің беттерінде республика аймағындағы педагогтерге қатысты маңызды мәселелер ұдайы талқыланып, білім беру деңгейінің әрбір сатысына қатысты өзекті мақалалар жарық көруде. Қарапайым мектеп мұғалімінің немесе балабақша тәрбиешісінің үні де газет бетінен орын алып, қалың бұқараның ой-тілегі де ескерілуде. Сонымен қатар, газет қалың оқырманды ауыл мектептерінің жай-күйі, тыныс-тіршілігімен де тұрақты түрде хабардар етіп отырады. Білім саласында ұзақ жылдар бойына табысты еңбек еткен ұлағатты ұстаздардың өнегелі өмір жолдары да кейінгі ұрпаққа үлгі ретінде кеңінен насихатталуда. Біздің институт ұжымы газеттің алғашқы нөмірінен бастап өзіміздің сүйікті «Ұстаз мәртебесі» газетімен шығармашылық тығыз байланыста жұмыс жасап, педагогтер қауымына арналған келелі ойларымызды, ұсынымдарымызды газет арқылы кеңінен таратып келеміз. Газет ұжымының педагогке қатысты барлық бастамаларын қолдау – біздің міндетіміз.

Бір сөзбен айтқанда, осы жылдар бойы «Ұстаз мәртебесі» республикалық қоғамдық-әлеуметтік, ғылыми-көпшілік газетінің ұжымы кәсіби біліктіліктің, Отаншылдық пен жауапкершіліктің озық үлгісін көрсетіп келеді. Газет алдағы уақытта да елдің бірлігін нығайтуға атсалысып, Әділетті Қазақстанды құру ісіне елеулі үлес қоса береді деп сенемін.

Бауыржан Елеусінов,

«Өрлеу» БАҰО» АҚ филиалы Қызылорда облысы бойынша Кәсіби даму  институтының директоры,

ҚР Журналистер Одағының мүшесі

Пікір үстеу

Э-пошта мекенжайыңыз жарияланбайды. Міндетті өрістер * таңбаланған