Конкурс нәтижесімен және Қазақстан Республикасы Оқу-ағарту министрлігінің келісімі негізінде Мейрамбек Зинабдинұлы Шермағанбет Қызылорда облысының білім басқармасының басшысы ретінде тағайындалды.
Мейрамбек Зинабдинұлының есімі Сыр еліне таныс. Еңбек жолын ауыл мектебінің тарих пәнінің мұғалімінен бастаған ол 1995-2000 жылдары Жаңақорған ауданындағы №163 орта мектебінің мұғалімі, директордың орынбасары қызметін атқарған. Одан кейінгі жылдары жоғары басшылық қызметте жүрді. Жаңақорған ауданы әкімі аппаратының басшысы, Қызылорда облысы әкімі аппараты басшысының орынбасары қызметін атқарған М.Зинабдинұлы облыстық білім басқармасының және облыстың аумақтық білім саласын бақылау департаментінің басшысы қызметтерін абыроймен атқарды.
Мейрамбек Шермағанбет 2016-2020 жылдары Ақтөбе облысы Қобда ауданының әкімі, 2020-2021 жылдары Ақтөбе облысы әкімінің орынбасары, ал 2021 жылдың мамыр айынан бастап «Орда Инвест» корпорациясының Басқарма төрағасының орынбасары қызметінде болған.
Мемлекеттік қызметтің түрлі сатысынан өткен тәжірибелі маман әрі ұйымдастырушылық қабілеті мен тәжірибесі мол білікті азамат енді Сыр еліне оралып, білім саласын әрі қарай дамытуды қолға алғалы отыр.
Мейрамбек Зинабдинұлы алғашқы жұмыс аптасын сала ардагерлерімен кездесуден бастады. Алдымен қай істе де тілекші болып жүретін ардагерлердің батасын алып, білім саласын ілгерілету жұмысына кірісті.
Ардагерлермен жүздесуде басқарма басшысы алдағы міндеттерді саралап, білім саласын дамытуда, жас ұрпаққа тәлім-тәрбие беруде ардагерлер кеңесінің рөлі ерекше екенін атап өтті. Сондай-ақ, білім саласы ардагерлері кеңесінің мүшелері басқарма басшысының осы өлкеде өсіп-өнгенін атап, елге қызмет етуде сәттілік тілеп, жылы лебіздерін жеткізді.
Біз де Мейрамбек Зинабдинұлын жаңа қызметімен құттықтай отырып, облыстың білім саласында жемісті қызмет етуіне абырой мен табыс тілейміз.
«Ұстаз мәртебесі» газеті
