Мектеп асханаларына министр мән бере бастады

Біле білсеңіз, бүгінде бүтінінен бүлінгені көп білім саласында «бауын тапса, байлауын таппаған» мәселе шаш етектен. Сансыз бағдарлама жанданып, салаға қыруар қаржы бөлінгенімен, әлі күнге түрлі түйткілдер жанға батып тұрғаны жасырын емес.

Дана халқымыз ежелден «ауру – астан» деп ескертіп, бұл сөзді «ас – адамның арқауы» деп қуаттаған. Бүгінгі таңда тағам түрі көп болғандықтан да, кейбір адамдардың тамақтану мәселесінде қайшылықтар туындап жатады. Ал енді «мектепте балалар не ішіп, не жеп жүр?» деген мәселенің әрбір ата-ананың көкейіндегі сауал екені түсінікті.

Жасырып жабатыны жоқ, бүгінде мемлекет тарапынан балалардың тиісті деңгейде тамақтануы үшін мектептерге лайықты қолдау көрсетіліп келеді. Алайда көптеген мектеп асханаларында ұн өнімдері, құрамында қанты басым сусындар мен түрлі өнімдердің көп сатылатыны құпия емес. Сонымен қатар, көп жағдайда жаңа піскен жемістер мен көкөністердің жеткіліксіз мөлшері және асхана мәзірінің нормалары айқындалмаған болып шығады. Ал, мектептерде балаларды тамақтандыруды ұйымдастырудағы кейбір кемшіліктер, тамақ ішуге арналған уақыттың жеткіліксіздігі мен мектеп асханаларының ескірген материалдық-техникалық базасы және кейбір мектептерде тіпті асханалардың болмауы да көңілге кірбің ұялататыны анық.

ҚР Оқу-ағарту министрі Асхат Аймағамбетов «Мектеп асханаларындағы ас мәзірін қайта қарау керек» деп баса айтты. Министрліктің аппарат жиналысында Асхат Аймағамбетов мектептерде балаларды ыстық тамақпен қамтамасыз ету мәселесіне тоқталды. «Қазір ыстық тамақпен қамтамасыз ету көрсеткіші өсіп отыр дейміз. Бірақ одан бөлек қазірдің өзінде ыстық тамақпен қамтамасыз етіп отырған асханалардың жұмысын жетілдіруде жүйелі жұмыс болуы керек. Ол бойынша комитет тисті заңнамалық өзгерістер дайындады. Ас мәзірін Денсаулық сақтау министрлігімен бірге жаңадан қарауымыз керек», – деді ол.

Министр мектеп буфеттерінде бағаға қатысты да проблеманың бар екендігін баса айтты. «Әр білім бөлімі, әр білім басқармасы бұған көңіл бөлуі керек. Елорда мектептерінің өзінде бағаның өсуі бар. 0,5 литр судың бағасы 350 теңге деген масқара. Басқа облыстар да мектеп асханаларындағы бағаны қараңыздар. Осы мәселені жүйелі шешу үшін тиісті заңнамалық өзгерістер енгіземіз. Жаңа оқу жылына дейін бұл проблема шешілуі керек», – деді Асхат Аймағамбетов.

Сонымен қатар ол балаларды қауіпсіз тасымалдау үшін биыл 515 автобус сатып алынатындығын атап өтті. «Ол жұмысты тамыз айына дейін бітіруіміз керек. Кейбір өңірлер бұл жұмысты әлі бастаған да жоқ. Біз республикалық деңгейде бұл мәселені шештік, тиісті құралдарды бердік. Мәселе жалпы шешіліп отыр. Енді соны аяғына дейін жеткізіп, жұмысты жаңа оқу жылының басына дейін бітіру қажет», – деді министр.

Бүгінде мектеп асханаларына мән беру маңызды болып тұр. Әйтпесе, балаға бергеннің бәрі ас. Олар тамақтың сапасына да мән бере қоймайды. Ал, келешек ұрпақтың денінің сау, өмір жасының ұзақ болуы бүгінгі амалға байланысты екенін ұмытпау ләзім.

Айдар САЙЛАУОВ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған