Мектептерде оқушылардың білім алуына барлық жағдай жасалған

Білімнің іргетасы мектептен бастап қаланады. Сапалы біліммен оқушылардың деңгейін көтеру – ел білімінің дамуының басты факторы. Қазіргі таңда цифрланған әлем мемлекеттері басты назарға білімді алып отыр. Себебі, тоқтауы жоқ зымыраған уақытта біліммен жарысқан мемлекеттердің саны көп. Әсіресе, біліммен алға шығып, ғылымға өз жаңалығын ұсыну – зерек, ізденімпаз, интелектісі жоғары жастардың қолында. Қазіргі мектептегі білім беру жүйесі, оқушымен үнемі болатын кері байланыстар білім беру жүйесінің жаңа деңгейін көрсетеді. Бірақ, бала мектептен тек біліммен сусындап қайту керек пе? Әлсіреген әл бойына ұстаздың ұлағатын қабылдай алады ма? Осы тұрғыда мектептен түскі ас беру мәселесі қазірге мектептердің басты қағидасына айналды.

Шетел мемлекеттерінде бұл үрдіс әдетке айналған. Оқушыларды мектептен тамақтандыру оқу­шыларға қосымша күш беріп, білім алудан шаршамайды. Азияның дамыған мемлекеттерінің бірі Жапонияда бастауыш сынып оқушыларының 99 пайызы, орта сынып оқушыларының 82 пайызы ыстық тамақпен қамтылған. Мектептерінде 45 минутқа созы­латын үзілістерін жапон халқы оқушылардың әлденуіне және де бір-бірімен байланыс орнатуы үшін деп түсіндіреді.

Мектепте түскі аспен қамту Америка мемлекетінде де үлкен жауапкершілікті көрсетеді. Амери­када «Оқушылардың тамақ­­тануын күшейту заңы» мектеп ас мәзірінің құрамын жақ­сарту, жергілікті фермалармен серіктестікті нығайту үшін қабыл­данған. Оқушылар үшін вегетариандық және қалыпты тағам мәзірі де ұсынылады.

Ұлыбритания мемлекеттері де оқушылардың тамақтануын жоғары сапада қадағалайды. Ағыл­шындардың оқушыларға ұсынатын ас мәзірінде 70 пайызға дейін қант мөлшері төмендетілген тәттілер ұсынылады. Америка мемлекеті сияқты вегетариандық және қалыпты қос мәзір қатар ұсынылады. Аталған мемлекеттермен қатар бұл тізімге Бразилия, Оңтүстік Корея, Франция, Финлияндия, Германия, Таиланд сияқты елдерді қосуға болады.

Қазақстан да оқушылардың ыстық тамақпен қамтылуына үлкен көңіл бөлуде. Қызылорда облысы бастауыш сынып оқушылары тегін тамақпен толық қамтылған өңірлер қатарына кіреді. Үкімет отырысында бұл тақырыпқа арнайы тоқталды.

ҚР Премьер-министрі Әлихан Смайловтың төрағалығымен өткен Үкімет отырысында білім беру ұйымдарындағы қауіпсіздік және оқу процесін цифрландыру мәселелері де қаралды.

Республикалық орта мектептердегі балалар қауіпсіздігін қамтамасыз етуге арналған шаралар туралы, бастауыш сынып оқушыларына тегін ыстық тамақ беру мәселесі жайлы ҚР Оқу-ағарту министрі Ғани Бейсембаев айтып өтті.

Облыс әкімі Нұрлыбек Нәлібаев Үкімет отырысынан соң ҚР Премьер-министрі бер­ген тапсырмалар туралы пысық­тау үшін жиын өткізіп, білім беру саласындағы өзекті мәселе балалардың қауіпсіздігін қамта­масыз ету екендігін атап өтті.

– Біздің міндетіміз – Үкімет отырысында берілген тап­сырмаларды қатаң бақылауға алып, мерзімінде сапалы орындау. Бұл бағыттағы жұмыстарға тек облыстық білім басқармасы ғана емес, барлық қала, аудан әкімдіктері, құқық қорғау органдары жұмылдырылуы тиіс. Облыстық білім басқармасына полиция департаменті, Қызылорда қаласы және аудан әкімдіктерімен бірлесіп, облыстағы барлық білім беру ұйымдарының қауіпсіздігін күшейтуді, өңірдегі барлық білім беру ұйымдарының инженерлік-техникалық базасын, қауіпсіздік құралдарын қолданыстағы заңнама талаптарына сәйкестендіруді тапсырамын, – деді облыс басшысы.

Оқу орындарын цифрлан­дыруда қосымша білім беру мекемелеріндегі үйірмелер санын арттыру маңызды. Жиында «Білімді ұлт» ұлттық жобасындағы көрсеткіштерге қол жеткізу үшін цифрлық білім беру зертханасы, 3D модельдеу, робототехника үйірмелері жұмысын жетілдіріп, сапасын арттыру бойынша ұсыныс беру тапсырылды.

Оқушылардың қиналмай білім алуы үшін барлық қажеттілікті қарастыру мемлекеттің қолындағы іс. Ел келешегі үшін мектептерге көңіл бөлу қарқынды жүзеге асуда. Сыр өңірінің де мектеп оқушыларының жағдайын жасап, бастауыш сынып оқушыларын түгелдей ыстық тамақпен қамтуы қуантарлық жағдай. Мемлекет басшысы Қасым-Жомарт Тоқаевтың Қазақстандағы бастауыш мектеп оқушыларын түгелдей ыстық тамақпен қамту тапсырмасы Қызылорда облысында толығымен орындалғаны көңілге медет.

Қызылорда облысы мектептері материалдық-техникалық хал-ахуалының жақсаруы оқушылардың жағдайының жақсаруына себеп. Облысымыздың білім үйлері үшін жасап жатқан шаралары мақтануға лайықты. Ендігі кезекте оқушылардың тек білімге бас қойып, ұстаздардың шәкірт білімінің деңгейін көтеруі облыс үшін маңызды.

Қазақбай Әндешұлы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған