Педагогтерді аттестаттау ережесіне қандай өзгерістер енгізілді?

Осы күні мұғалімдерде тыным жоқ. Бар уайымы «аттестациядан қалай өтеміз?» деген сұрақ. Сол үшін портфолио дайындауға білек сыбана кірісіп кетті. Ол туралы әлеуметтік желілерде де әр түрлі әңгімелер жазыла бастады. «Қағаз жинаудан шаршадық» дейді. Түсінбеушілік те көп. Басылымдарға мақала мен сабақ беруден бастап әдістемелік құрал дайындау үшін баспа жағалап кетті. Ел ішіндегі толассыз әңгіменің нүктесін жақында ҚР Оқу-ағарту министрлігі Орта білім беру комитетінің басқарма бас сарапшысы Гүлмира Алиева қойды. Педагогтерді аттестаттау ережесіне енгізілген өзгерістер туралы толыққанды айтып берді.

Педагогтерді аттестаттау ҚР Білім және Ғылым министрінің 2016 жылғы 27 қаңтардағы №83 бұйрығына енгізілген өзгерістеріне сәйкес жүзеге асырылады. Педагогтерді аттестаттау кезеңдерінің реттілігі өзгертілді.

Бірінші кезеңде біліктілік бағалаудан өтеді, яғни құжаттардың талаптарға сәйкестігі қаралады. Екінші кезеңде аттестаттау комиссиясы сараптамалық кеңеспен бірлесіп педагогтердің портфолиосын қарайды. Үшінші кезең – педагогтердің білімін бағалау, біліктілік тестілеу.

Аттестаттаудың барлық кезеңдерінен сәтті өткеннен кейін педагогтерге біліктілік санаты беріледі немесе расталады. Сараптамалық кеңес 15 наурызға дейін, аттестаттау комиссиясы 27 наурызға дейін жұмысын жасайды. ҚР Оқу-ағарту министрінің 2023 жылғы 23 ақпандағы №43 бұйрығымен педагогтердің білімін бағалау тестілеу мерзімі 2023 жылдың 3-22 сәуір аралығында бекітілген.

Тестілеу нәтижелері бойынша тиісті деңгейдегі аттестаттау комиссиясы әрбір аттестатталатын педагог бойынша біліктілік санатын беру, растау туралы қорытынды шешім шығарады. Білім саласында 30 және одан да көп жыл педагогтік өтілі бар педагогтер жаңа жүйе бойынша біліктілік санатын растаған кезде тестілеуден босатылады. Ал, келесі біліктілік санатын алғысы келсе, онда тест тапсырады.

Бірінші жоғары санаты бар педагогтер педагог-модератор біліктілік санатын алғысы келсе, тест тапсырудан босатылады және портфолио дайындайды. Бүгінгі таңда жаңа жүйе бойынша аттестаттаудан өткен 229 мың педагог 30-дан 50 пайызға дейін қосымша ақы алады. Аттестаттау мұғалімдерге біліктілік деңгейін арттыру мәселелеріне тиімдірек қарауға және негізгі міндет білім беру сапасын арттыру мәселелерін шешуге мүмкіндік береді.

Пікір үстеу

Э-пошта мекенжайыңыз жарияланбайды. Міндетті өрістер * таңбаланған