Күздің алғашқы күні – білім күні. Оқушылардың оқуға құлшынып, құшақтарына гүл толтырып, мектепке асығатын мезеті. Ал, балабақшаны бітіріп, мектеп табалдырығын алғаш аттағалы жатқан бүлдіршіндерге бұл күн мерекемен тең. Мұғалімнің мейірімді жүзі бала жүрегін қуанышқа бөлеп, әліппенің өзі білім алуға қызығушылықты оятады. Тіпті, алғашқы қоңыраудың сыңғыр үні толқынысты тап басып, білім ордасынан болашақта білікті шәкірт түлеп ұшатынын сездіретіндей. Сондықтан, мұндай мерекелік сәттің бала көңілінде ерекше сақталатыны айтпаса да түсінікті. Сайып келгенде, мектепке қолынан жетектеп әкелген кішкентайының жүзіндегі жарқын күлкі ата-ананы да тебірентіп, қуанышын еселей түседі. Барлық бөгетті бұзатын, кемел келешектің кілті саналған білімнің орны айрықша. Өскелең ұрпақтың ақылды һәм сауатты жасқа айналуын назарда ұстайтын биліктің биігіндегілер білім саласына басымдық беріп келеді. Әр жаңа оқу жылында оқушыларға жүрекжарды тілегін арнап, сәттілік тілейтіні содан.
Бүгін қаламыздың білім ордалары есігін айқара ашып, оқуға келген оқушыларды қарсы алып, алғашқы қоңырау соғылды. Жаңа оқу жылында қала мектептеріне 1 сыныпқа 7 мыңнан астам оқушы қабылданған. Осы тұста басшылық балалардың қуанышын бөлісіп, қолдау білдіріп, алғашқы қадамдарының құтты болуын тілеуде үнсіз қалмады. Елеулі күннің ерекшелігін сезініп, ескерусіз қалдырмау – бірінші сынып оқушыларына шаттық сыйлайтынына шүбә жоқ. Қала әкімі Асылбек Шаменов пен қалалық мәслихат хатшысы Ибадулла Құттықожаев және қалалық білім бөлімінің басшысы Ерлан Боданов Ы.Алтынсарин атындағы №10 мектеп-лицейіне алғаусыз көңілмен алғашқы қадамын басқан бүлдіршіндерді білім күнімен құттықтау үшін арнайы келді.
– Құрметті ұстаздар мен ата-аналар, оқушылар! Сіздерді 1 қыркүйек білім күнімен шын жүректен құттықтаймын! Бұл мейрамның әрбір адам өмірінде алар орны ерекше. Әсіресе, мектеп табалдырығын алғаш аттайтын балалардың жүрегінде бүгінгі күн мәңгі сақталады. Ол бүлдіршіндер үшін сәулелі сәт қана емес, сонымен қатар жарқын болашағына жасайтын маңызды қадам. Өздеріңіз жақсы білесіздер, Ұлт ұстазы Ыбырай Алтынсарин атындағы киелі шаңырақ ширек ғасырдан астам уақыт бойы күрделі жөндеу көрмей келген болатын. Осыған байланысты жыл басында жергілікті бюджеттен қаржы бөлініп, күрделі құрылыс жұмыстары жүргізілді. Міне, бүгін қайта жаңарған мектеп оқушыларды қабылдауда. Осы ретте, сәулеті мен сәні жарасқан білім ордасының жөндеу жұмыстарын сапалы атқарып, межелі уақытында ұстаздар мен оқушылар игілігіне ұсынған мердігер мекеме басшылығына шынайы алғысымды білдіремін. Заманауи сипат алған білім ордасымен қатар, жаңа оқу жылында қаламызда жеке 3 мектеп оқушыларға есігін айқара ашты. Әлемдік өркениетке бет алған бүгінгі қазақ елінің болашағы білім мен тәрбие алауын жаққан мектеппен тікелей байланысты десек, бұл іргелі шаңырақтар талай-талай ел мақтаныштарын тәрбиелеп шығаратынына сенемін,- деді А.Өмірбекұлы.
Салтанатты шарада тілі балдай бүлдіршіндер тақпағын айтып, әннен шашу шашып мерекелі күнді жандандырды. Қолына бір-бір әліппе ұстаған оқушылардың оқуға ынтасы мен әріп тануға деген құлшынысы көздерінен-ақ байқалды. Ал, сол кездегі шат-шадыман күйін сөзбен айтып жеткізу мүмкін емес. Енді, алтын ұя мектепке асыға келгендер 11 жыл білім алып, талапты түлек боп түлеп ұшады. Бұл ретте сапалы білім беруге мектеп те әзір. Яғни, күрделі жөндеуден өтіп, келбеті жаңарған киелі шаңырақта құрылыс жұмысы аяқталып, оқу жылына сақадай сай дайын тұр. Жиылған қауымға жылы лебізін арнап, алғашқы қоңырау соғылғаннан кейін шаһар басшысы Асылбек Шаменов күрделі жөндеуден өткен мектеп ғимаратын аралады.
Тарыдай боп кіріп, таудай боп шығатын шәкірт үшін мектептің маңызы зор. Тиісінше, түлекті жолынан жаңылдырмайтын шамшырағы, адастырмайтын темірқазығы – білім. Олай болса, жарқын болашақтың жарық сәулесі мектеп пен білім десек, артық айтқандық емес.
Замира ДАСТАНҚЫЗЫ
