Тек облыс емес, елімізге белгілі Қамбаш көліне келіп, тынығушылар легі еш толастаған емес. Сонымен бірге Қамбаш жаз мезгілінде балалардың да тынығу орнына айналған. Биылғы жылы «Қамбаш» жазғы тынығу лагері 7 ауысым бойынша 1000-нан астам баланы жазғы демалыспен қамтиды. Ал, тынығу лагерінің алғашқы ауысымына 130 бала қабылданды.
Жақында «Қамбаш» олимпиадалар және қосымша білім беру орталығындағы балаларға арналған жазғы тынығу лагерінің салтанатты түрде ашылуы өтті. Балғындардың дәстүрлі қуаныш мерекесіне аудан әкімі Аманжол Оңғарбаев қатысып, сөз сөйледі.
— Бала күлкісі – ересектердің көңіл жұбанышы, балаларымыздың жазғы демалысын тиімді ұйымдастыру – біз үшін маңызды міндеттердің бірі. Осы орайда балаларға арналған «Қамбаш» жазғы демалыс лагері дәстүрге сай өз жұмысын бастап, бүлдіршіндерімізге есігін айқара ашып отыр. Жазғы демалыстарыңыздың әрбір күнінің естен кетпестей қызықты сәттерге толы болуына тілектеспін. Тынығу лагерінде жаңа достар тауып, ауызбіршілік пен ынтымақтың ұйытқысы бола біліңіздер, — деп, аудан әкімі жылы лебізін жеткізді.
Сонымен бірге, Қызылорда облыстық білім және ғылым қызметкерлері кәсіподағы комитетінің төрайымы Гүлнар Есқалиева балалардың қызықты демалыс өткізулеріне тілектестік білдірді.
Мерекелік шара барысында аудан әкімі орталық қызметін көріп, жас қолөнершілердің дайындаған туындыларын тамашалады. Сондай-ақ, тынығу лагеріндегі балаларды жан-жақты дамыту бағытындағы атқарылып жатқан бастамалармен танысты.
Салтанатты кеште орталық тәрбиеленушілері өз өнерлерін ортаға салып, мың бұрылған бишілер мен жезтаңдай әншілер көрермендер көзайымына айналды. Шарада аудан басшысы, құрметті қонақтар мен лагерьдің алғашқы легіне келген тынығушылар кешкілік алау отын тұтандырып, естеліктерімен бөлісті. Мерекенің соңы әсерлі от шашумен аяқталды.
Б.Бағдатұлы
