«КӨК ТУДЫҢ ЖЕЛБІРЕГЕНІ» ДӘСТҮРЛІ ЖАЛПЫҰЛТТЫҚ АКЦИЯСЫ ӨТТІ

«КӨК ТУДЫҢ ЖЕЛБІРЕГЕНІ» ДӘСТҮРЛІ ЖАЛПЫҰЛТТЫҚ АКЦИЯСЫ ӨТТІ

Мемлекеттік Рәміздер күніне орай облыстағы ірі сауда орталықтарында, халық көп жиналатын орындарда, теле-радио арналарда, мемлекеттік және жергілікті атқарушы органдарда және бюджеттік мекемелерде еліміздің әнұраны – Мемлекеттік Гимн бір мезгілде орындалды. Қала және аудандарда ғимарат терезелеріне, балкондарда Мемлекеттік Ту ілініп, «Туымыз – төрімізде» флэшмобы ұйымдастырылды. Ал, әлеуметтік желілерде «Менің туым – менің мақтанышым» тақырыбында челлендж іске қосылып, ел азаматтары рәміздер туралы мақтаныш сезімге толы жылы сөздерін арнады.

Мемлекеттік рәміздер күнімен құттықтағандар арасында Мәжіліс төрағасы Ерлан Қошановтың сөзі ерекше шықты: «Мемлекеттік рәміздеріміз – еліміздің егемендігі мен біртұтастығының айшықты бейнесі, ажырамас белгісі. Ұлттық кодымыздың символдық көрінісі. Ел Президенті Қасым-Жомарт Тоқаев мұны «Жұртымыздың өзіне ғана тән ерекшелігі бар. Біз осы мәдени кодымызды сақтап, бабалар жолымен жүруіміз керек. Ұлттық бірегейлігіміз мемлекеттік рәміздерде айқын көрініс тапқан» деп нақты атап өтті.

Рәміздер тәуелсіздігіміздің бедерлі белгісі болумен қатар, ұлттық бірегейлігімізді қалыптастыруға, мемлекеттілігімізді нығайтуға оң әсерін тигізуде. Халқымызды бір тудың астында біріктіріп, ортақ мұрат жолында ұйыстыруда.

Терең тарихымыз бен елдік дәстүрлерімізден бастау алған осынау мемлекеттік нышандарымыз алдағы уақытта да ұлтымыздың рухын асқақтатып, отаншылдық сезімін ұштай түсетіні сөзсіз. Рәміздерді құрметтеу, оны мақтан тұту – әрбір азаматтың қастерлі парызы. Елдігіміздің алтын күмбезі іспеттес мемлекеттік рәміздеріміздің мәртебесі арта берсін. Тәуелсіздігіміз мәңгілік болып, көк туымыз көгімізде желбірей берсін» деген жалынды сөзі әр қазақты тебірентпей қоймайды.

Дәл осы атаулы күні Қызылордада «Мемлекеттік рәміздер» алаңында салтанатты шара өтті. Шара барысында Тәуелсіз Қазақстанның және аймақтың дамуына үлес қосқан сырбойылықтар марапатталды. Шара концерттік бағдарламамен, автошерумен жалғасты.

Өңірде Елтаңба авторларының бірі, жерлесіміз, танымал сәулетші Жандарбек Мәлібековтің, мемлекеттік тудың авторы, суретші Шәкен Ниязбековтің еңбектерін насихаттауға арналған іс-шаралар кең көлемде өткізілді.

Ал, жазғы балалар лагерьлерінде «Отанды сүю-жүректен» атты патриоттық шаралар ұйымдастырылды. Сонымен бірге, барлық елді мекендердегі «ҚР Рәміздері аллеялары» мен «ҚР Рәміздері алаңдарында» тұрғындардың, жастар мен волонтерлердің қатысуымен түрлі форматта шаралар өтті.

Б.Санақұл

Пікір үстеу

Э-пошта мекенжайыңыз жарияланбайды. Міндетті өрістер * таңбаланған