Тұрғындардың ұсынысын назарға алған қала әкімі алда жүзеге асатын жоспарлармен бөлісті

Қызылорда қаласы мен қалаға қарасты кенттер мен ауылдық округтердің мәселесі біртіндеп шешімін тауып келеді. Оған қала әкімінің халықпен кездесіп, әрбір тұрғынның өтінішін тыңдап, соның нәтижесінде оңтайлы шешім қабылдауы себеп болып тұр. Қала әкімі Серік Қожаниязовтың халықпен кезекті кездесуі Ақжарма, Ақсуат, Қызылжарма ауылдық округінде жалғасып, тұрғындардың талап-тілегіне құлақ тосты.

Бүгінде ауылдардың ажары айшықталып, мәселелер шешіле бастаған. Мемлекет басшысының тапсырмасымен, Үкіметтің тікелей қолдауымен және облыс әкімінің үйлестіруімен қалаға қарасты елдімекендерде тұрғындардың өмір сүру сапасын жақсарту бағытында ауқымды жобалар сәтті жүзеге асып жатыр.

Айтар болсақ, жуырда ғана Баймұрат батыр ауылында «Ауыл-Ел бесігі» бағдарламасымен құны 422,5 млн. теңгеге салынған дәрігерлік амбулатория пайдалануға берілді. Амбу­латорияда 9 қызметкер, яғни, 1 дәрігер, 5 орта буын және 1 кіші буын медициналық қызметкер, 2 техникалық қызметкер жұмыс істейді.

Ақжарма ауылдық округіне табиғи газ тарту үшін жоба-сметалық құжаттар әзірленіп, сараптамаға ұсынылды. Қазір 19 көшеге қиыршық тас төсеу жұмыстары басталды. Ал, «Өңірлерді дамыту» бағдарламасымен Талдыарал елді мекеніндегі көшеге түнгі жарық бағаналары орнатылды. Алдағы уақытта, 5 көшеге жаяу жүргіншілер жолын салу, жарық бағаналарын орнату, арық жүйелерін жүргізу және Талды­арал елді мекеніне су тарату станциясының құрылысын жүргізу жоспарлануда.

Ал, Ақсуат ауылдық округіне көгілдір отын келгелі кәсіпкерліктің өрісі кеңейді. Жұмыссыздық азайып, тұрғындардың өмір сүру сапасын жақсартуға арналған әлеуметтік нысандар бой көтерді. Округтің биылғы бюджеті 322,7 млн. теңгемен бекіп, бүгінгі күні ол 768,4 млн. теңгеге жетті.

Жыл басынан бері 2 көшеге жарық бағаналары орнатылды. Алдағы күндері құны 1,3 млрд. теңгеге 6 көше қайта жаңғыртылып, 3 көше күрделі жөндеуден өтеді. Елдімекеннің жаңа қоныс аумақтарындағы 32 көшеге электр желілері тартылады.

Сонымен қатар, Қызылжарма ауылдық округінің инфрақұрылымын дамытуға мемлекет тарапынан 601,3 млн. теңге бөлініп отыр. Бұл үлкен қолдау. Бүгінде ауылдың 4 көшесі күрделі жөндеуден өтіп, ел игілігіне берілсе, тағы бір көшеде күрделі жөндеу жүргізілуде. Енді «Өңірлерді дамыту» бағдарламасы аясында 2 көшеге тас төселеді. Жақын күндері 3 көшеге түнгі жарық орнатылады. Мұнан бөлек, 22 көшенің электр желісін жүргізу жұмыстары қолға алынады.

Мемлекет басшысының тапсырмасымен жүзеге асып жатқан «Жайлы мектеп» ұлттық жобасы аясындағы мектептің біреуі осы ауылдан бой көтеруде. Салынып жатқан 600 орындық білім ұясының құны 4 млрд. 600 млн. теңгені құрайды.

Кездесулерде қала әкімі Серік Қожаниязов қалаға қарасты елді мекендерге мемлекет тарапынан жасалатын қолдаудың жалғаса беретіндігін, айтылған әрбір ұсыныстың ескерусіз қалмайтынын жеткізді.

Қала әкімі Серік Қожаниязовтың халықпен кездесуі Қарауылтөбе, Талсуат, Қызылөзек ауылдық округтерінде де өтті. Бұл кездесулерде шаһар басшысы жыл басынан бері атқарылған жұмыстар және алдағы перспективалық даму жоспарлар жайымен бөлісті. Ал, тұрғындар көкейлерінде жүрген бірқатар мәселелерін ортаға салды. Қойылған сауалдарға толыққанды жауаптар беріліп, шешілуі уақыт талап ететін ұсыныстар хаттамаға енгізіліп, тұрғындардың талабы ескерусіз қалмайтынын айтты.

Өткен жылы Қарауылтөбе ауылында құны 286,3 млн. теңгені құрайтын 150 орындық клуб үйі ел игілігіне берілді. Биылғы жылға бюджеттің барлық көздерінен 868 млн. теңгеге ауқымды жобалар жүзеге асады. Атап айтар болсақ, жаңадан қоныстанушы аумақта жаяу жүргіншілер жолын салу, көшелерге тас төсеу, қайта жаңғырту жұмыстары жүргізіледі.

Ауыл халқы дәрігерлік амбулаторияның қажет екендігін айтады. Оған қатысты қажетті шаралар қабылданады. Ал, мектептің жылыту жүйесін газға ауыстыру кезек күттірмейтін мәселе. Өйткені бұған дейін жылыту жүйесінде дизель отыны пайдаланылып, ол экономикалық жағынан тиімсіздігін көрсеткен. Бұл сұраққа байланысты облыс­тық білім басқармасымен бірлесе жұмыстар атқарылады.

Ал, Қараөзек ауылдық округінде серпінді істердің нәтижесі мол. Биылғы жылғы жоба-сметалық құжаттарға сәйкес, 2024-2025 жылдарға өтпелі 1 млрд. 655 млн. теңгені құрайтын жобалар жүзеге аспақ. Яғни, 3 елдімекендегі электр желілері қайта жаңғыртылады. 3 көшеге жол құрылысы, түнгі жарық орнату, балалар ойын алаңын салу жұмыстары жүргізіледі. Тұрғындар үшін ең маңызды мәселе – «Қожақ» автомобиль көпірін күрделі жөндеуден өткізу жоспарға енді.

Талсуат ауылының тұрғындары да мектептің жылыту жүйесін газға ауыстыруды сұрайды. Шаһар басшысы бұл мәселе Қарауылтөбедегі мектепте де бар екендігін айтып, екі елді мекеннің сұранысы ескерілетінін жеткізді.

– Облыс бюджеті соңғы 2 жылда 387 млрд. теңгеден 678 млрд. теңгеге өсті. Соның нәтижесінде былтыр қала бюджеті облыс әкімінің ерекше қамқорлығының арқасында 95,2 млрд. теңге болса, қазір міне 5 айдың өзінде 93,5 млрд. теңгені құрап отыр. Жыл соңына дейін 100 млрд. теңгеден асыру жоспарымыз бар.

Талсуат ауылына келетін болсақ, 2024 жылғы бюджеті 135,3 млн. теңге болып бекітіліп, бүгінгі күнге 138 млн 162 мыңға нақтыланды. Жалпы ауылдың 3 жылдық динамикалық бюджетіне қарасақ, 2021 жылы 120,1 млн. теңге, 2022 жылы 78,7 млн. теңге, 2023 жылы 450,2 млн. теңге болды,- деді қала әкімі Серік Салауатұлы.

Бүгінде Талсуат ауылдық округін дамыту бағытында 213,4 млн. теңгеге 9 жоба іске асырылуда. Оның ішінде «Өңірлерді дамыту» бағдарламасы аясында көшеге түнгі жарық орнату, көшелерге ағымдағы жөндеу, көркейту-көгалдандыру, абаттандыру, санитарлық-тазалық жұмыстары бар екендігі айтылды.

Елдің еңсесі бүгінде тіктелді. Бұрынғыдай әкім келгенде дау шығарып, мәселелерін тізбектей жөнелетін тұрғын жоқ. Себебі бәрі ретімен жүзеге асып жатыр. Тұрғындардың ризашылығын алған қала әкімі елге рақметін айтып, әрбір тұрғынның өтініші ескерусіз қалмайтынын жеткізді.

Е.Ерболұлы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған