Қызылордада өткен тамыз кеңесі мектепке дейінгі тәрбие мен оқытуға арналды

Қазақстан Республикасы Оқу-ағарту министрлігінің биылғы тамыз кеңесі аясында Қызылорда облысы мектепке дейінгі тәрбие мен оқыту бағытында кеше мектепке дейінгі ұйым педагогтерінің панельдік сессиясы болды. Фейсбукпен тікелей трансляция өтіп, офлайнмен 300 адам қатысты. Мақсат белгілі, 2023-2024 оқу жылына арналған мектепке дейінгі білім беру жүйесін дамытудың негізгі бағыттарын айқындау, мектепке дейінгі тәрбие мен оқыту жүйесінде зерттеу нәтижелеріне негізделген сыналған және ұсынылған инновацияларды одан әрі тарату үшін шешімдер әзірлеу.

Қызылорда қаласындағы білім шаңырақтарында, атап айтсақ, №278 ІТ-мектеп-лицейде, Абай атындағы үш тілде оқытатын мамандандырылған сыныптары бар мектепте, №12, №101, №264 мектеп-лицейлерде және Оқушылар сарайында секциялар жұмыс жасады. Астанадан арнайы Қазақстан Республикасы Оқу-ағарту министрлігі Мектепке дейінгі білім беру департаментінің директоры Наталья Жумадильдаева, Оқу-ағарту министрлігі Балаларды ерте дамыту институтының директоры Манара Адамова, орынбасары Мария Ерманова, осы институттың басқарма басшысы Гүлнар Ысқақова, мектепке дейінгі тәрбие мен оқыту мазмұнын қамтамасыз ету орталығының басшысы Гүлнар Мұқышева келіп, мазмұнды баяндамаларын оқыды. Қызылорда қаласындағы жеті бірдей балабақшаға экскурсия жасалды.

Бүгін Н.Бекежанов атындағы қазақ академиялық музыкалық драма театрында «Әділетті Қазақстан: сапалы білім, адал ұрпақ, табысты ұлт» мектепке дейінгі тәрбие мен оқыту саласы педагогтерінің республикалық тамыз конференциясының жалпы пленарлық отырысы өтті. Алқалы жиынға облыс әкімі Нұрлыбек Нәлібаев, ҚР Парламенті Сенатының депутаты Ақмарал Әлназарова, Мәжіліс депутаты Мархабат Жайымбетов, Оқу-ағарту министрлігі мектепке дейінгі білім беру департаментінің директоры Наталья Жұмаділдаева қатысты.

Биылғы тамыз мәслихаты жаңа форматта өтуде. Министрлік ұстанымына сәйкес әр облысқа арнайы тақырыптар белгіленген. Өзге өңірлерден келген 300-ден аса үздік педагог кешеден бері білім беру саласының маңызды мәселелерін талқылады.

Облыс әкімі Нұрлыбек Нәлібаев өзгерістерге қадам басқан уақытта жас ұрпаққа сапалы білім беруде, тәрбиелеуде ұстаздардың еңбегі ерекше екенін айтып, бала болашағы үшін атқарылған жұмыстарды баяндады.

«Мемлекет басшысы Қасым-Жомарт Кемелұлы Тоқаев «Болашаққа жол сілтейтін мұғалімнің еңбегін лайықты бағалау – өте маңызды міндет» деп атап өтті. Биылғы тамыз кеңесінің «Әділетті Қазақстан: Сапалы білім, адал ұрпақ, табысты ұлт» атауын еншілеуі құндылықтардың бағасы қай кезде де биік екенін тағы бір дәлелдеді. Себебі адамзатты кемел ойға тек білім ғана жетелейді. Ел Президентінің, Үкіметтің қолдауымен соңғы бір жыл ішінде білім саласына бағытталған қаржы көлемі  260 млрд.теңгеге жетті. Бұл өткен жылмен салыстырғанда 20%-ға артық. Осының арқасында саладағы ауқымды жобаларды сәтті жүзеге асырудамыз. Өңірдің 3-6 жастағы балалары 100 пайыз мектепке дейінгі тәрбиемен қамтылған. Ал 2-6 жастағылар үлесі 88,9 пайызға жетті. Тұрақты қолдау көрсетілгендіктен балабақшалар заманауи бағыттағы ІТ жобаларды сәтті енгізіп, аймақтың үздік тәжірибесін өзге облыстарға таратуда. Бұл ретте тәрбиешілердің білім деңгейін көтеруге ерекше жағдай жасадық. Жыл көлемінде барлық жеке балабақша тәрбиешілері тегін курстардан өтуде. Біз үшін тәрбиешілердің мемлекеттік немесе жеке балабақшада жұмыс істегені маңызды емес. Олардың біліктілігін арттыруда тең көзқарас ұстанамыз. Өйткені – бала бәрімізге ортақ», – деді аймақ басшысы. 

Тамыз кеңесінде баяндамашылар өз салалары бойынша тәжірибелерін бөлісіп, бала тәрбиелеуге қатысты ұсыныстарын ортаға салды.

Айта кетейік, биыл Қызылорда облысының білім саласында жағымды жаңалықтар жетерлік. Аймақта мемлекет пен жекеменшіктің әріптестігінің ынтымақтастық аясы кеңейіп келеді. Бүгінде облыстағы 613 балабақшаның 453-і немесе 73%-ы  жеке сектордың үлесінде. Мемлекет басшысының бастамасымен қолға алынған «Жайлы мектеп» бағдарламасы шеңберінде құны 86,2 млрд.теңге болатын 21 заманауи мектеп салынады. Жаңа білім ордалары 12  мыңнан аса оқушыны қамтиды. Биыл өңірде 10 мектептің іргетасы қаланады.

«Білімді қолдау қоры» есебінен Қызылордада қаласында құны 7,9 млрд. теңге болатын физика-математика бағытындағы мектеп-интернат құрылысы басталды. Дарынды балаларға арналған жаңа оқу ордасында республикалық физика-математика мектебінің таңдаулы ұстаздары сабақ береді.

Аймақта жеке мектептердің де үлесі артуда. Қазірдің өзінде 24 жеке мектеп жұмыс істесе, биыл 7 мектеп ашылады.

Қаланың сол жағалауында «ҚазГерМұнай» компаниясының қаржылай қолдауымен 350 орындық заманауи Оқушылар сарайы салынады. Бұл қосымша білім беру ордасы озық ойлы, өнерге құштар, спортқа бейім дарынды балалардың шамшырағын жағады.

Қала мектептеріндегі орын тапшылығы мәселесі қосымша құрылыс салу арқылы реттелуде. Облыс орталығындағы 4 мектептің 1850 балаға арналған қосымша ғимараттары жаңа оқу жылында балаларды қабылдайды.

Ауыл балалары үшін салынған 1400 орындық 4 мектеп (Жаңақорған «Майбекет», Шиелі Байсын, Қазалы Әйтеке би кенті, Қызылорда қаласы «Бәйтерек» шағын ауданы) осы жылы ел игілігіне табысталмақ.

Білім мазмұнын арттыру мақсатында мектептерді заманауи пәндік кабинеттермен жабдықтауға, бала қауіпсіздігін қамтамасыз ету үшін соңғы үлгідегі бейнекамералар алуға жергілікті бюджеттен 1 млрд. теңгеге жуық қаржы бөлінді.

А.Әділжанұлы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған