Жазғы демалысты қалай өткізуге болады?

Көзді ашып-жұмғанша жазғы демалыстың бір айы да сырғып өтті. Мерейлі маусымның тәмамдалғаны балалар көңілін түсіретіні сөзсіз. Не дегенмен сабақта жүріп, демалысты аңсаған балалар үшін әр күннің маңызды екені белгілі. Олар үш ай демалыста қажетінше тынығып, әр сәтін есте қаларлықтай қызықты өткізуге тырысады. Сондай-ақ, жайлы демалыстан жадырап, қуаттанып, келесі оқу жылына зор ынтамен аяқ басқысы келеді. Әлбетте, бұл зерек жастың зерделі болу жолындағы қадамдарының алғашқысы іспеттес. Демалыстың алғашқы айында жолдамамен жазғы тынығу лагеріне баратындар һәм ата-анасымен көрікті қалаларға көркем сапар жасайтындар бар. Бұл тоқсан түйінделген уақыттағы құрылған жоспарлар легі болуы мүмкін. Сонымен, саяхаттау соңына жеткен соң, ата-аналар «Балаларымның ендігі демалысын қалай ұйымдастырсам екен?», «Қайткенде әр күнін пайдалы өткізуге болады?», «Уақытты тиімді пайдалану үшін не істемек керек?» деген сауалдардың төңірегінде толғанады. Бірақ үйде де тыныш тынығарлық демалыс ұйымдастыруға әбден болады. Осы ретте, керекті кеңеспен бөліссек дейміз.

1. Уақытты тиімді пайдалану үшін алдын-ала бәрін жоспарлап алған артықтық етпейді. Мәселен, бала жазғы серуенді таңнан бастап, табиғат аясында жүгірсе яки таңғы жаттығуларды жібермесе сергектік сыйлайтыны сөзсіз. Сонда күннің ыстығына қарамастан маужырап, ұйқыға берілмей, бойында қуаты тасып тұрады.

2. Оқу кезінде оқулықпен қатар қосымша ретінде телефонды да қолданатыны белгілі. Өйткені өзіне беймәлімді интернеттен іздеп, танымын кеңейтетін балалар қолынан қалта телефоны түспейтінін білеміз. Бұл пайдалы болғанымен зиянды екенін де ескеру керек. Ендеше, жазғы демалыс уақытында телефоннан да тасаланған дұрыс. Яғни, баланың теледидар мен телефон пайдалануына белгілі шек қойған жөн. Сонда бас және көз аурулары баланы мазаламайды.

3. Жазғы демалысты рухани азық алумен өткізу – жанға жайлылық сыйлап, ақылға ақыл қосары ақиқат. Қазақ әдебиетінің көркем шығармалары мен шетел әдебиетінің тамаша туындылары білім көкжиегін кеңейтіп, күзге дейін біраз кітапты кеміруге мүмкіндік береді. Нәтижесінде, бала қалай сөйлеу керектігін меңгеріп, сауатты болудан сырт қалмайды.

4. Сонымен қатар түрлі үйірмелерге, тілдік курстарға жазылып машықтанған дұрыс. Өйткені, қыдыруға қашан да уақыт табылады. Сол уақыттың бір бөлігін білімге қиса, осы бағытта күшін сарқа жұмсаса көп күттірмей жемісін де көретін болады. Бүгінде балалар дарынды, аса қабілетті, бәріне икемді. Осы орайда, әнге немесе биге, спорт түрлеріне қатысса, өз-өзін жан-жақты дамытып, жазғы демалыста жаңа қырынан танылып, талпынысы күшейе бермек.

5. Баланың өзіңе ұнайтын белгілі іспен шұғылдануына жағдай жасаңыз. Яғни, хоббиіне мән беріңіз. Бәлкім, қызыңыздың тігін жұмыстарына қызығушылығы жоғары шығар. Олай болса, кестелеу мен көктеуді үйретіп, тоқыма тоқу ісін дағдыға айналдырсаңыз, шеберлігін шыңдайтыны сөзсіз.

6. Демалыс уақыты болса да, ұйықтауы мен тамақтануына ден қойыңыз. Сабақ жоқ екен деп тал түске дейін ұйықтау – бас ауруына әкеп соқтырады. Шамадан тыс ұйқының зардабы болатыны айтпаса да түсінікті. Тиісінше, ерте жатуын да қадағалаған жөн. Сонда қалыпты ұйқыға үйренген бала сергек боп жүреді.

7. Отбасы болып саябаққа барып немесе түрлі орындарға серуендеп, қыдыру қажет. Ол отбасында берекесіздіктен гөрі бірлікті нығайтып, ортақ пікірлесуге, шүйіркелесуге жақсы шешім. Баланы еркелетіп, көңіл бөлуіне ықпал етсеңіз, бала үшін одан асқан бақыт жоқ.

Жазғы демалыс – жата қалып демалу, не болмаса күнді барынша қыдырып, ойын-сауықпен өткізу деген ұғым емес. Әлбетте, балалардың демалысқа шыққандағы қуанышы бөлек болады. Өйткені, жыл бойы бар ынтасымен оқып, сенбі-жексенбі күндері де үй тапсырмасын тиянақты орындаумен айналысады. Демек, оларға тынығу керек. Әрі балалар демалыста ата-ана, туған-туыс, құрбы-доспен көбірек уақыт өткізіп, көтеріңкі көңіл-күйде болуды қалайды. Сол үшін берілген үш айды балалар қыдырып та, оқу жағынан үлгерімін үздік етуге де әрекет етеді. Өйткені сабақ уақыты таяп қалғанда кітап алуға асыққан балалар мектебіне қарай жүгіріп, жаңа оқу жылындағы кітаптар бетін парақтап, білім күнін тағатсыздана күтеді. Бұл бәрімізге таңсық көрініс ғой, солай емес пе? Олай болса, қалған екі айдағы демалыс қызықты әрі сәтті өтсін дейміз.

Замира ДАСТАНҚЫЗЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған