Әрбір оқу ордасы тарыдай боп келген баланың санасына сәулелі ой түсіріп, білім беріп, тау тұлға боларлық түлек даярлағанда өз миссиясын мінсіз орындаған болар еді. Осы ретте, шәкірті үшін шыр-пыр болып, болашағының баянды болуы үшін қажет білімді беретін мұғалімдердің еңбегі ұшан-теңіз. Жаһандану заманында сөз қуғаннан гөрі іске көшкен, алға құлшынған әлдеқайда дұрыс. Демек, бәсекеге қабілетті жастар тәрбиелеп, тәжірибелі маман дайындау мақсатында түрлі тәжірибеден тыс қалдырмай, белгілі салаға бейімдеу – оқушының бағын жандыратыны белгілі. Сайып келгенде, білекке емес, білімге сенетін заманда ақыл-ойдың орны айрықша. Сыр өңірінде де білім саласының қарқыны көңіл қуантады. Өйткені, білім ордалары «жазғы мектеп» жұмысын бастап, тіпті демалыс уақытында да оқушының оқу-ғылымнан қол үзбеуін қадағалауда.
Басшылық «білім аламын» деп келген баланың бетінен қақпай, белін буып, әрқайсысының оқуда озат, жүзден жүйрік, жан-жақты шәкірт етіп шыңдауды назарға алған. Енді осы бастама бойынша мектептер іске кірісіп кетті. Мұндай қарышты қадам Әли Мүсілімов атындағы №101 мектеп-лицейінде анық байқалды. Бұған білім ордасында өткен көшпелі брифингте көзіміз жетті.
— 26 мамырдан бастап жазғы мектеп өз жұмысын бастады. Білім алушыларға 23 педагог сабақ береді. Оқушылардың шығармашылығы мен ойлау қабілетінің жан-жақты дамуы үшін әртүрлі үйірмелер жұмыс істейді. Атап айтқанда, «Coworking» орталығы, «Дарынды дос» жолдастық көмек көрсету жобасы, «Жасыл мектеп», домбыра сыныбы және ІТ бағытындағы үйірмелер жас өрендердің шығармашылығын ұштастыруға арналған. Сондай-ақ, пәндік жұмыстарды жүйелі түрде жүргізу басты назарда. Мектеп ұстаздары, өзін-өзі басқару ұйымының мүшелері, дебат клубы жоспарға сай түрлі бағытта сабақ үйретеді,- деді Әли Мүсілімов атындағы №101 мектеп-лицейдің директоры Айгүл Өткелбаева.
Мектепте жүзеге асырылған жобаның бірі – «Жасыл мектеп». Мұнда оқушылар биология пәнінің мұғалімдерімен бірлесе отырып, тәжірибелер жүргізеді. Тәжірибе жасауда тайсалмайтын білімпаздар көптеген өсімдік түрлерін өсірген. Оқушылардың нық сөздерінен мектебін жасыл-желекпен жайқалтуды көздейтіндігін аңғаруға болады. Сонымен қатар, мектеп оқушылары оқуда озат, кітапқа деген қызығушылығы жоғары екендігін дәлелдеді. «Оқуға құштар мектеп» жобасы аясында түрлі жанрда кітап оқып, түрлі тақырыпты тереңнен талдаған оқушылар көпті сүйсінтті. М.Әуезовтің «Көксерек» әңгімесін оқып, кідірместен кіріспесін бастап, мұғалім қойған сұраққа мүдірместен жауап берген шәкірттер жан-жақтылығы мен ізденімпаздығын көрсете білді. Олар аталған жобамен ғана шектелмей, берілген тақырып төңірегінде тоқталмай, өзге де кітап оқу бәйгелерінде бақ сынайды екен. Әлбетте, мұндайда дарынды жандарға тек сәттілік тілейміз.
Техника мен технология дамыған заманда жаңашылдыққа ұмтылғанның айыбы жоқ. Мұны басты назарға алған мектеп басшылығы мен ұжымы ІТ бағыттағы үйірмелер жұмысын жандандырып, жүргізуде. Осы тұста, робототехника, бағдарламалау, 3D модельдеуді оқушылар жақсы меңгерген. Бәріне бейімді оқушылар жаңа үлгіде жабдықтаған жұмыстарымен таныстырып, ұтымды тәсілді пайдаланатын ұшқыр ой иесі екендігін аңғартты. Сондай-ақ, хош иісті шамдар мен басқа да тұтынатын заттарды әзірлеуде аса ыждағаттылық танытатындығы көңіл қуантты. Қоспасына ешбір химиялық затты қоспай, таза табиғи өнімді қолданысқа әкелу де оңай емес, сірә? Соның бәрін зерттеп-зерделейтін жастардың, қолдау көрсететін мектептің, жетекшілік ететін ұстаздың еңбегі зор. Ізденіске келгенде іркіліп қалмайтын оқушылар өнерден де кенде емес екен. Ұлттық аспап домбыраны қолға алып, тиегін ағытып, көркем күймен құлағымыздың құрышын қандырды. Әсте, толқыныстан туған, тебіреніспен төгілген күйдің жүрекке жетпеуі мүмкін емес. Домбыра сыныбының «Үкілі домбыра» үйірмесіне Сәндібек Райымбекұлы жетекшілік етеді. «Жазғы мектепте» оқушылар домбыра тартуға машықтанып, өнер өлкесінде қанатын кеңге жаятын болды.
Білімі шыңдалған шәкірттер физика-химия пәндерінде де белсенділік танытты. Мектеп басшысының айтуынша, аталған пәндерден олимпиадаға қатысып, жүлделі орынға ие болғандар бар екен. Тағы бір айта кетерлігі, оқу ордасында ашылған «дебат клубының» жұмысы жүйелі түрде жүргізілуде. Тың әрі толғандырарлық тақырыпты кеңінен тарқатып, талқылаған үйірме мүшелері өз ойларын ашық әрі анық жеткізді. Негізі негізгі мақсат та сол, яғни еркін пікір алмасып, ой білдіру. Барлық талапты ескергендері олардың дебатқа дағдыланғандығын көрсетті. «Жазғы мектеп» кезінде де осы атаулы жобалар аясында жұмыстар жалғасын тауып, оқушылар білімін жетілдірмек. «26 мамыр мен 17 маусым аралығында 1-8, 10 сыныптағы білім алушылар үшін «жазғы мектеп» жұмысын бастады. «Жазғы мектепте» оқуға тілек білдірген барлық білім алушылардың ата-аналарынан немесе заңды өкілдерінен өтініштер қабылдау жұмыстарын жүргізді. Облыс көлеміндегі 295 мектептің 1-8, 10 сыныптағы 143887 оқушының 116988-і жазғы мектеппен қамтылды. Аталған оқушылар 4679 сыныпқа жасақталған. 14120 педагог сабақ береді. Педагогтардың еңбек ақысы толық төленеді. Сондай-ақ, кезекті еңбек демалысының күндері еш өзгеріссіз берілетін болады» деді облыстық білім басқармасының бөлім басшысы Нұрлан Дәулеталиев.
Қысқасы, барлығы жоспар бойынша жүйеленсе, оқушылар үшін зор мүмкіндік екені айдан анық. «Біліміңді еңбек пен өмірдің өзінде шыңдап отыр. Сонда ғана білім деп аталатын асыл тас ешқашан тот баспастан жалтырай да жарқырай береді» деп Қаныш Сәтбаев айтпақшы, білімнің бақ дарыған қазығынан айырылмаған абзал.
Замира ҚОНЫСЖАН
