ҚР Президенті Қ.К.Тоқаев:«Еліміз дамудың жаңа кезеңіне қадам басты»

Президент Қасым-Жомарт Тоқаев Премьер-министр, мемлекеттік органдар басшылары, облыс­тар мен Астана, Алматы, Шымкент қалаларының әкімдерінің қатысуымен кеңес өткізді. Отырыста еліміздің барлық өңірлерінің әлеуметтік-экономикалық дамуына қатысты мәселелер талқыланды. Осы аралықта Президент берген тапсырмалардың орындалуы жайлы және Қазақстан халқына Жолдауында айтылған міндеттер туралы сөз қозғады.

Мемлекет басшысы еліміздің түкпір-түкпірінде саяси жаңғыру процестерінің жүріп жатқанын айтып өтті.

– Оның бағыт-бағдарын былтыр наурыз айындағы Жолдауда айқындап алдық. Еліміз дамудың жаңа кезеңіне қадам басты. Бір жылдың ішінде ауқымды реформаларды жүзеге асырдық. Билік жүйесін жаңа талапқа сай жаңғыр­ту үшін бірнеше саяси науқан өткіздік. Маңызды мәселелерді талқылау үшін Ұлттық құрылтайды құрдық. Мемлекеттігіміздің тұғырын және ел бірлігін нығайтатын жаңа идеологиялық тұжырымдар ұсындық. Наурыз мейрамын жаңаша атап өте бастадық. Республика күнін қайта жаңғыр­ту тарихи қадам болды, – деді Мемлекет басшысы.

Елімізде жүргізіліп жатқан реформалардың мемлекетімізден бө­лек, шет мемлекеттерде де талқыға түсіп жатқандығынан президент хабардар етті.

– Біздің болашағымыз – айқын, нақты жоспарымыз бар. Мәжіліс және мәслихаттар сайлауы – билік институттарын жаңарту жұмысының қорытынды кезеңі. Осылайша, билік жан-жақты реформаларды жалғастыру үшін жаңа сенім мандатына ие болады. Елімізді дамыту жолында тың бастамалар көтеріп, оны табысты жүзеге асыру – басты міндет. Қазір жетістікке мәз болып отыратын заман емес. Жұмысты тың қарқынмен жалғас­тыру керек, – деді Президент.

Қоғамдық тұрақтылықтың сақталуы жайлы да сөз ете келе:

– Елімізді дамыту үшін саяси жүйені ғана жаңғырту жеткіліксіз. Реформалар, ең алдымен, қоғамда жаңа саяси мәдениет қалыптастыруы керек. Сонымен бірге жаңа құндылықтарды орнықтыруы қажет. Ең алдымен, ел мүддесіне және әр адамның құқығына басымдық беріледі. Геосаяси ахуал ушыққан кезде мемлекеттің және азаматтардың жауапкершілік жүгі артады. Аңдамай айтылған бір ауыз сөз, ойланбай қабылданған бір шешім елге зардабын тигізуі мүмкін. Әрине, мемлекет сөз бостандығына кепілдік береді. Әркімнің қалауынша қарекет жасауына мүмкіндік бар. Бірақ бұл бассыздыққа жол беру деген сөз емес. Әрбір азамат елдің тыныштығын және оның аумақтық тұтастығын сақтауға қатысты заң талаптарын мүлтіксіз орындауға міндетті. Заң мен тәртіп бар жерде тұрақтылық болады. Бұл қағида – барлығына ортақ, – деді Президент.

Мемлекет басшысы Қазақстан халқының ұлттық бірегейлігі, бірлігінің нығаюы маңызды рөл атқаратынын да атап өтті.

– Соңғы кезде бір аймаққа ғана белгілі адамдарға ескерткіш орнату сәнге айналды. Жергілікті ономас­тика комиссиялары бұған жол бермеуге тиіс. Орынсыз шешімдерге Республикалық комиссия тосқауыл қоюы керек. Әркім өз бабасына ескерткіш қоя берсе, елде рушылдық, жершілдік белең алады. Осыған назар аударыңыз­дар. Кеңестік кезең қайраткерлеріне, соның ішінде жаппай қуғын-сүргінге тікелей қатысы бар адамдарға ескерткіш, бюст орнату ісі әлі жалғасып келеді. Өмірде болмаған ерлік істерге толы өмірбаяндар ойдан құрастырылып жатыр. Олар туралы деректер архив құжаттарында нақтыланбаған немесе мүлде жоқ. Кейбір белсенді топтар азаматтарымызды кеңестік кезеңдегі партия және мемлекет қайраткерлерінің аңызға бергісіз өмірбаяндарына сенуге мәжбүрлеп жүр, – деді Қасым-Жомарт Тоқаев.

Түрлі этностардың байланы­сының еліміздегі өзектілігіне тоқ­талып, этносаралық қарым-қатынастардың мәселелері маңызды екендігіне тоқталып өтті.

– Этносаралық келісімді нығайту – еліміздің тұрақты дамуының негізі. Бұл маңызды міндетті жүзеге асыру үшін орталық мемлекеттік органдар мен жергілікті билік, сондай-ақ Қазақстан халқы Ассамблеясы мен жалпы азаматтық қоғам күш біріктіруі қажет, – деді Президент.

Мемлекет басшысы рухани құндылықтарымызды сақтаудың еліміз үшін маңызды тақырып екендігін айтып, назар аудару керегін ескертті.

– Халқымыздың дүниетанымына сай дәстүрлі исламды дәріптеу аса маңызды. Оның ғылыми-теориялық негізін дамыту қажет. Өскелең ұрпақтың рухани тәрбиесін назардан тыс қалдыруға болмайды. Шын мәнінде, бұл – өте маңызды мәселе. Оны бетімен жіберсек, ұлттық салт-санамыздан айырылып қалуымыз мүмкін. Әкімдерге құзырлы органдармен бірлесіп, дін саласындағы жұмысты жандандыруды тапсырамын,– деді Қасым-Жомарт Тоқаев.

Халқымыздың өмір сүруінің өсуіне, тұрмыс сапасының артуының сөз етіп, әр аймақ басшыларының негізгі міндеті екенін айтып өтті. Еліміздің әрбір азаматы мемлекетімізде болып жатқан оң өзгерістерден хабардар болуын ескертті. Түрлі игі бастамалардың маңыздылығын халқымызға айтып отыру керектігін тапсырды.

– Біз тұрақсыздыққа апаратын әрекеттерге жол бермейміз. Мұндай заңсыз әрекеттердің алдын алу қажет. Елге іріткі салып, қоғамдық тәртіпті бұзуға шақырған адамдар қатаң жазаланады. Арандатуға қарсы күрес заң аясында, жедел әрі жүйелі түрде жүргізілуі керек. Тиісті заңдарымыз бар, оларды қатаң сақтауымыз керек. Әйтпесе әрекетсіздіктің салдары еліміз үшін өте қауіпті болуы мүмкін. Мен бірнеше рет айтқанымдай, бізге, ең алдымен, заң үстемдігі аса қажет. Заң сақталса және азаматтық жауапкершілік жоғары болса, қоғамда тәртіп болады. Тұрақтылық бар жерде ғана даму, өркендеу болады. Ел бірлігі – реформаларды табысты жүзеге асырудың басты кепілі. Сондықтан ырысты ынтымақпен білек сыбана жұмыс істеуіміз қажет. Мемлекетті жан-жақты жаңғыртуға қатысты жұмыс болашақта жалғасын табады. Осы орайда мен бірқатар тың бастамаларды ойластырып жатырмын. Оны сайлаудан кейін жария етемін, – деп, Президент сөзін қорытындылады.

Президент әкімдер мен мемлекеттік органдардың басшыларына олардың ел азаматтарымен байланыстарын нығайтып, олармен кездесулер мен жекелей қабылдау өткізу керектігіне тоқталып өтіп, тапсырма етті.

Қазақбай ӘНДЕШ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған