«Сотталушы А.-ға қатысты қаралған қылмыстық іс аяқталып, сот үкімі шықты және үкім заңды күшінде» деп хабар таратты Қызылорда қаласының №2 соты. Алайда, сотталушының аппеляциялық шағым түсіруге құқылы екенін айтады.
Сонымен көпшілілікке белгілі басқарма басшысының үстінен қозғалған қылмыстық іс 5 эпизодтан тұрады. Сотталушы мемлекеттік функцияларды орындауға уәкілдік берілген адам бола тұра, кәсіпкерлерге қызметпен айналысуға кедергі жасап, дизель отынын беруді талап етіп, дизель отынын тұрақты түрде заңсыз алып отырған. Ол аз болғандай, сотталушы қылмыстық іс-әрекеттер арқылы жеке кәсіпкерге өзінің баласының оқу ақысын келісім шартқа отырғызып, төлем төлеткен.
Сотталушының кінәсі маман қорытындылары мен іске тіркелген құжаттармен және шартпен, сараптама қорытындыларымен, жәбірленушілер мен куәлардың жауаптарымен, қарап-тексеру хаттамасымен және тағы басқа іс құжаттарымен толық өз дәлелін тапқан.
Сотта сотталушы өзіне тағылған айыпты толық мойындап, кешірім сұрап, кәмелет жасқа толмаған балалары барын, отбасының жалғыз асыраушысы екенін, келтірілген шығынның басым бөлігін қалпына келтіргенін, жәбірленушілермен татуласқанын айтып, бас бостандығы өзінде қалатын жаза қолдануды сұраған.
Ал, жәбірленушілер өздерінің жазбаша арыздарына сәйкес кешірім беретіндерін, талап тілектері жоғын көрсеткен. Жәбірленушілерге 26 миллион теңгеден астам шығын келген. Сотталушы кәсіпкерлерге келтірген шығындарды ішінара қайтарған.
Сот үкімі бойынша, сотталушы Қазақстан Республикасының ҚК-нің 361-бабы 1-бөлігімен және 365-бабы 2-бөлігінің 3-тармағымен кінәлі деп танылып, белгілі бір лауазымдарды атқару құқығынан өмір бойына айырыла отырып, ҚК-нің 49-бабының талабына сәйкес, Қазақстан Республикасы Президентінің Жарлығымен «Ерен еңбегі үшін» медалінен айыра отырып, түпкілікті 9 ай мерзімге бас бостандығынан айыру жазасы тағайындалды.
Жәбірленушілерге келтірген шығынның 23,5 млн. теңгесі қайтырылған. Қалған сома сот үкімімен өндіріліпті.
