Әр өңірге өң беріп, қаланың көркін кіргізу құрылыс жұмыстарының қалыпты болуында. Ал, игілік үшін салынған қандай да бір нысанның мерзімінде аяқталып, пайдалануға берілуі құрылыс қарқынына байланысты. Облыста ғажайып ғимараттардың, салтанат сарайының немесе халыққа қажетті нысандардың салынып, бой көтеруі ілгерілеудің іргесін қаламақ. Қанша дегенмен, халыққа қызмет ететін орынның, игілігі үшін жүргізіліп жатқан құрылыс жұмыстарының жанданғаны жақсы. Бұрын атаулы салада аузынды ашып, жағанды ұстарлық жағдай көп болатын. Өйткені, көпшілік кәміл сенетін салада жемқорлықтың жайылғаны кім-кімді болса да алаңдайтпай қоймайтын. Сосын тиісті қаржыны игермей жатып иеленіп кету, құрылыстың мезетінде табысталмауы сынды әрекеттер орын алғаны жасырын емес. Табысталғанның өзінде туындайтын мәселе көп-ақ. Көзге сүйелдей боп көрінетін кемшіліктер мен шикіліктер – соның айғағы. Дей тұрғанмен, қазір кемшін тұстар көбеймей, күмән де сейіле бастады. Өйткені, облыстағы құрылыстардың қарқындылығы қауымды қуантуда, тиісінше саланың белгілі уақытта атқарған істері де нәтижелі.
Облыста сәулеті жарасқан әлеуметтік нысандардың құрылысы қарқынды дамып келеді. Биыл өңірде 108 нысанның құрылыс жұмыстары жүруде. Бүгінгі күнге дейін 7 нысан ел игілігіне берілсе, жыл соңына дейін 97 нысан пайдалануға берілмек. Бұл жөнінде Өңірлік коммуникациялар қызметінде өткен брифингте облыстық құрылыс, сәулет және қала құрылысы басқармасы басшысының орынбасары Мәди Әліп айтып берді.
— Осы уақытқа дейін Әйтеке би кентінде 250 орындық емхана, 2 медициналық бекет, Жалағашта оқушылар үйі мен Таң ауылында дәрігерлік амбулатория, Арал қаласында 200 орындық мектеп пен 100 орындық интернат және шыны зауытының теміржол тұйығы салынды. Қазіргі күні білім саласында 12, денсаулық сақтау саласында 6, мәдениет және спорт саласында 25 нысан, халыққа қызмет көрсету саласы бойынша неке сарайының құрылысы жүргізілуде. Сондай-ақ, жыл аяғына дейін «Нұрлы жер» мемлекеттік бағдарламасы аясында 1294 пәтерді құрайтын 31 тұрғын үй халыққа табысталмақ. Ал 9 айдың қорытындысымен 519,8 мың шаршы метр тұрғын үй пайдалануға берілді,- деді басқарма басшысының орынбасары Мәди Раманқұлұлы.
Иә, халыққа берілген және салынғалы жатқан нысандардың маңызы зор. Себебі, бәрі халық қажетін қамтамасыз ететін, қызмет ететін негізгі орындар. Сондықтан мұның бәріне мемлекеттік бюджет есебінен қыруар қаржы бөлініп отырғаны белгілі. Сайып келгенде, Мемлекет басшысы Қасым-Жомарт Тоқаев өз жолдауында бұл мәселелерді атап өтіп, тиісті шешімді қабылдап, міндеттерді жүктеген болатын. Осы орайда, өңіріміздегі бетбұрыстардың оң болуы жолдау жіктеп көрсеткен жұмыстардың жүйелі жүргізілгенін аңғартты. Қызылорда облысы әкімдігі мен ҚР Премьер-министрі арасындағы бекітілген меморандумға сәйкес 2022 жылы 682,7 мың шаршы метр тұрғын үй пайдалануға беру жоспарланып отыр.
— Биылғы жылы облыс бойынша тұрғын үй-коммуналдық дамудың 2020-2025 жылдарға арналған «Нұрлы жер» мемлекеттік бағдарламасы аясында жалпы ауданы 95 мың шаршы метр 1294 пәтерді құрайтын 31 тұрғын үйдің құрылысын жүргізіп, жыл аяғына дейін пайдалануға беру жоспарланып отыр. Осы мақсаттарға мемлекеттік бюджет есебінен 4,8 млрд. теңге қаржы бөлініп, оның ішінде сатып алу құқығынсыз жалға берілетін тұрғын үйлер құрылысы бойынша 10 үйдің, кредиттік тұрғын үй құрылысы бойынша Қызылорда қаласының «СПМК» шағын ауданында 12 тұрғын үйдің, жеке құрылыс салушылар есебінен Қызылорда қаласында 9 тұрғын үйдің құрылысын жүргізіп, пайдалануға беру жоспарланып отыр. 2022 жылғы қаңтар-қыркүйек айларының қорытындысымен қаржыландырудың барлық көздері есебінен 519,8 мың шаршы метр тұрғын үй пайдалануға берілді. Оның ішінде Қызылорда қаласы СПМК-70 тұрғын ауданында 40 пәтерлі 2 кредиттік тұрғын үй пайдалануға берілді,- деді М.Раманқұлұлы.
Жалпы басқарма бойынша бөлінген қаражатты мақсатты әрі тиімді жұмсау, қаржы игеруді жоспарлау және құрылыс нысандарының бекітілген жобаға сәйкес жүргізілу қатаң бақылауға алынған.
Замира АХМЕТ
