Нәлібаев назарындағы нысандар

Судай сырғыған санаулы күндерден кейін жаңа оқу жылы басталады. Қыркүйек келіп, күз түскенде оқушылар асқақ арманмен, үкілі үмітпен білім алу мақсатында алтын ұяға беттейді. Бүгінде ата-аналар жаңа оқу жылына қам жасап, балаларының керек-жарақтарын түгендеу үшін базар жағалап жүр. Балаларының лайықты білім алып, биіктен көрініп, белестерді бағындырғанын қалайды.

Қызылорда облысында білім беру жүйесін дамытуға көп көңіл бөлініп келеді. Аймақта биыл 182 мың оқушы білім алмақ. Облыс әкімі Нұрлыбек Нәлібаев жаңа оқу жылында балалардың қаперсіз білім алу керектігін назарда ұстап, мектептердегі күрделі жөндеу жұмыстарының уақытылы аяқталуын қатаң бақылауға алды. Бірқатар нысандарды аралап, атқарылған жұмыстарды көзбен көрді. Биыл өңірдегі 6 мектепте күрделі жөндеу жұмыстары жүруде. Бұл үшін бюджеттен 2,1 миллиард теңге қаржы бөлінген. №10 Ы.Алтынсарин атындағы мектепке барған облыс әкімі білім ордасының оқу процесіне әзірлігін бақылады. Аймақ басшысы жыл сайын апатты мектептерді жойып, жаңа мектептердің желісін көбейтуге басымдық берілетінін тілге тиек етті.

– Оқушылардың қуанышына ештеңе жетпейді. Мектепке қомақты қаржы бөлінгендіктен, күрделі жөндеу жұмыстары өте сапалы орындалуы керек. Себебі оқу жылына білім беру нысандарының дайындығы Үкімет басшысының тікелей назарында.

Демографиялық өсімнің нәтижесінде қалада ықшам аудандар көбейіп, мектептерде орын тапшылығы мәселесі туындағаны жасырын емес. Бұл ретте апатты жағдайдағы 4 мектептің екеуінің ғимаратын жаңа оқу жылында табыстаймыз. Тоқабай ауылындағы  бір апатты мектеп мәселесін жеке инвестор арқылы шештік. Жерлесіміз, меценат азамат өз қаражаты есебінен 550 миллион теңгені құрайтын 100 орындық мектеп құрылысын бастады. Мұнан өзге, Қазалы ауданындағы тағы бір мектептің жобалық-сметалық құжаттары әзірленуде. Сондай-ақ, қала мектептеріндегі орын тапшылығын жою үшін 4 мектептің жанынан қосымша ғимарат салуға шешім қабылданды. Себебі жаңа мектеп салу қымбатқа түседі. Қазіргі таңда 600 және 375 орындық 2 мектептің жоба-сметалық құжаттары аяқталып, мердігер компаниялар бекітілуде. Ал, қалған 2 білім ұясының жобалық-сметалық құжаттамасы әзірленуде,- деді Н.Нәлібаев.

Өңір басшысы балалар жылына тарту ретінде демеушілер есебінен өңірде 80 спорттық ойын алаңы салынатынын жеткізді. Қызылорда қаласында 1 млрд. теңгеге 50-ге тарта, аудандарда 600 млн. теңгеге 30-дан астам спорттық-ойын алаңы бой көтермек. Мұнан бөлек, демеушілердің қолдауымен аймақта 45 млрд. теңгеге 391 жоба әзірленген. Ең бірінші кезекте ауыз су, электр жарығы, жол сапасы мен елді мекендерді газдандыру жұмыстары жүргізіледі. Бұл жобалар келесі жылдан бастап іске асырылады.

Облыс әкімі аймақтағы ірі өндіріс орны шыны зауытына барды. Өткен жылдың желтоқсан айында зауыттың күйдіру пеші техникалық іске қосылған. Алайда, пешті қосу-реттеу барысында ақаулар анықталып, қажетті күйдіру қондырғысына тапсырыс беріліп, жеткізілген.

Аймақ басшысы Нұрлыбек Нәлібаевтың тапсырмасы негізінде зауытты іске қосу үшін биылғы жылдың 25 шілдесінде арнайы штаб құрылғанын жеткізді. Мұндағы мақсат – зауытты іске қосу кезінде туындаған мәселелерді шұғыл түрде шешу. Әкімдік өз құзыреті шегінде инженерлік инфрақұрылымды жеткізіп беруге жауапты. Осы ретте, зауытқа қажетті электр энергия, байланыс желісі, автомобиль жолы, су және кәріз жүйелері жеткізілді. Сыртқы темір жол тұйығы құрылысы аяқталды. Енді кезекте екінші тараптар техникалық және авторлық бақылау өкілдерінің берген ескертулерін жою жұмыстарын жеделдетуі керек. Себебі газ келгеннен кейін, пешті қайта іске қосып, жағу үшін қабылдау актісін рәсімдеп, бітіруі қажет.

– Шынын айтқанда, зауытты іске қосу процесі тым ұзап кетті. Бар мүмкіндікті пайдаланып, зауытты іске қосуымыз қажет. Бұған дейін уәде көп берілгенімен, нәтиже болмады. Халық асыға күтіп отыр. Сондықтан қалайда өндірісті аяқтауға тиіспіз. Аптасына екі рет штаб өткізіп, өзекті мәселелерді талқылау қажет. Бәрі де менің тікелей бақылауымда болады,-деді Н.Нәлібаев.

Жоспар бойынша шыны зауытының бірінші өнімі қазан айында шығарылмақ. Жыр болып, әкімнен әкімге қалған бұл құрылыс енді ел игілігі үшін қызмет жасайды деп сенеміз.

А.СЫРЛЫБАЙ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған