Аудандардың әлеуметтік-экономикалық даму көрсеткіштеріне талдау жүргізілетін арнайы жиында облыс әкімі Нұрлыбек Нәлібаев Жаңақорған ауданының әкімі Мұрат Тлеумбетовтің есебін тыңдады. Жиынға облыстық, аудандық мәслихат депутаттары, ардагерлер мен қоғамдық кеңес төрағалары, салалық басқарма басшылары қатысты.
Мұрат Жолкелдіұлы ауданның негізгі даму көрсеткіштерін тізбектеп, аудан тынысын 4 негізгі бағыт бойынша саралады. Макроэкономикалық көрсеткіштердің қорытындысына сәйкес, Жаңақорған ауданы алдыңғы орынға шығып, жоғары даму динамикасын көрсетті. Өнеркәсіп өндірісі мен өңдеуші өнеркәсіпте өсім бар.
Жиында азық-түлік қорын көбейту, бақша дақылдарын егу жұмыстарының нәтижесі талданды. Облыс әкімі Жаңақорған ауданы табиғи орналасу ерекшелігіне байланысты аймақтағы бақша-көкөніс өнімдерімен қамтамасыз етуші негізгі аудан болуы тиіс екенін ашып айтты. Расында, топырағы құнарлы өңірдің бақша өнімдері, әсіресе Жайылманың қарбызының өзі бүгінде Ресей асып кеткені жасырын емес. Енді сол топырақтан қант қызылшасын өсіру тәжірибе негізінде қолға алынды. 2 гектар жерге егілген қант қызылшасының өнімділігі жоғары болса, алдағы жылдары көлемін ұлғайтпақ.
Бүгінде Жайылма, Ақүйік ауылдық округтерінде Керіз жобасы арқылы картоп, көкөніс, бақша дақылдарын орналастыру жұмыстары қарқынды жүргізілді. Ал, Талап мен Жайылма ауылдық округтерінде тамшылатып суару технологиясымен 7 гектар бақша дақылдарын егу жұмыстары қолға алынған.
Ауданда негізгі дақыл күріш көлемі берілген тапсырмаға сәйкес 6600 гектарға күріш дақылы егілуі тиіс болса, тапсырмадан 416 гектарға кем егілген. Күріштен басқа дәндік дақылдар 81 гектарға, көкөніс 104 гектарға жоспардан кем егілген. Бұл ретте аймақ басшысы көкөніс, бақша дақылдары көлемін арттырып, экспорттау мүмкіндігін қарап, қажет болса осы бағыттарды дамыту үшін арнайы жоба дайындау қажет екенін тілге тиек етті.
Жиын соңында облыс әкімі 9 айдың қорытындысымен бұл көрсеткіштер қайта қаралып, жауапты мамандардың жұмысы сарапқа салынатынын еске салды. Осы отырыста айтылған ұсыныстар мен ескертпелерден қорытынды шығарса, Жаңақорған ауданының әлеуеті жоғары болады.
Н.КӨБЕГЕНҰЛЫ
