Инфрақұрылымды дамытуға ден қойылды

Аракідік телеарналардан өркениетті елдердің жасыл желек көмкеріп, ақ қайың сыңсыған, мұнтаздай таза саялы бақтарын, көкпен иық тірескен зәулім ғимараттарын жиі көріп қаламыз. Әлгі жап-жасыл кілем төсегендей алаңда адамдар емін-еркін серуендеп жүреді. Бір түрлі қызыға қарап, еріксіз тамсанасыз. «Шіркін, бізде де осындай демалыс орындары, сәулетті ғимараттар көп болса ғой» деген ой да көкейімізде тұрады. Әйтеуір, жұмыр басты пенде болғасын өзгенікі өзгеше көрініп тұратыны анық. Байқасақ, бүгінде Сыр елінде де тоғайы сыбдыр қаққан бақтардың саны көбейген. Жаңа үйлер салынған. Қала біртіндеп жасыл аймаққа, көрікті шаһарға айналып келеді. Біз бұған бек қуанамыз.

Көкөрім көктем айы келгеннен бері саябақтарда серуендеп жүргендер саны молая түскен. Әсіресе, адам қарасы кешкі мезгілде жиілейді. Кішкентай балғындар түрлі-түсті ойыншық көліктерімен ызғып жүрсе, үлкендер табиғаттың тылсым көрінісін тамашалап бара жатады. Алайда, сол жұртты күнделікті күйкі тіршіліктен арылтып, жан рақатын сезіндіретін көркем ғимараттар мен әсем орындардың саны ауыз толтырып айтарлықтай емес. Осы олқылықтың орнын толтыру үшін де облыс орталығы және аудандарда құрылыс жұмыстарына ерекше қарқын берілмек.

Бүгінде Қызылорда облысында құрылыс және инженерлік коммуникациялық инфрақұрылымды дамыту жобалары жүзеге асырылуда. Атап айтқанда, биыл облыс әкімінің тапсырмасына сәйкес, Сыр өңірінде энергетика және тұрғын үй коммуналдық шаруашылығы саласында 17,3 млрд. теңгені құрайтын 106 жоба жүзеге асырылуда. Солардың бірі Қызылорда қаласында көпбалалы аналарға пайдалануға берілген «Бәйтерек» тұрғын ауданындағы тұрғын сектордың инженерлік-коммуникациялық инфрақұрылымын дамытуға 1 млрд. 60 млн. теңге бөлінсе, Жаңақорған кентіндегі 10/0,4 кв электржелілік жүйені жаңғыртуға 898 млн. 787 мың теңге қаралған. Сонымен қатар, Қызылорда қаласы мен Жалағаш, Шиелі аудандарында тұрғын үйді жаңғырту жұмыстарын жүргізуге 622 млн. 160 мың теңге бөлінген.

Алаштың анасы болған Қызылорда қаласының тұрғын үй қорында 800-ден астам көпқабатты тұрғын үй болса, соңғы 10 жылдың ішінде 185 көпқабатты үйлерге жаңғырту жұмыстары жүргізілген. Биылғы жылы да осы жұмыстардың жалғасы ретінде облыс орталығындағы 11 үйге қайта жаңғырту жұмыстары жүргізіледі. Сонымен қатар биыл мемлекеттік бюджет есебінен құрылыс саласында жалпы көлемі 60,6 млрд. теңгені құрайтын 108 жоба жүзеге асыру жоспарлануда. Оның ішінде облыстық құрылыс, сәулет және қала құрылысы басқармасы арқылы 27, Арал ауданында 5, Қазалы ауданында 13, Қармақшыда 13, Жалағаш пен Сырдарияда 4, Шиелі 5, Жаңақорған 2, Қызылорда қаласында 35 жоба жүзеге асырылмақ.

Бұл жобалардың ішінде облыстық қан орталығы, неке сарайы, мәдениет саласындағы көпсалалы кешен және 2 оқу корпустарының құрылысы бар. Аймақ басшысы Нұрлыбек Нәлібаевтың тапсырмасымен жобалардың тиімділігін әрі сапасын қадағалайтын арнайы кеңес құрылып, жұмыс жасауда. Бұл кеңестің жұмысы ең алдымен бюджет қаржысының тиімді пайдалануын қадағалау және тұрғындар үшін қажетті нысандарды салуды көздейді.

Үй салып, ағаш егіп, туған өңірін көркейту – әр перзенттің парызы. Сондықтан да сұлу Сырдың бойын мекендеген мейірбан елдің тұрғындары қала көркі үшін өз үлестерін қоса бермек. Шуақты мекен қуатты қалаға айналуы үшін құрылыс және инженерлік-коммуникациялық инфрақұрылымды дамыту мәселесі үздіксіз дамудың даңғыл жолында болатыны айқын.

А.ӘДІЛЖАНҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған