Ауқымды жобалар ауыл тіршілігін жандандырмақ

Еліміздің барлық қаласы ретімен өз кезегінде мемлекет тарапынан қолдауға ие болып, көркейіп келеді. Қалалардың ізін шала, ауылдық елді мекендерге де ел бюджетінен қаржы қарастырылып, түйткілді мәселелер шешімін табуда. Мемлекет басшысының әрбір жолдауында ауыл-аймақтардың жағдайы, болашағы көтеріліп жүр. Осы ретте Үкіметке берілген тапсырмалар сараланып, ауылдық жерлерге қажетті қаражат бөлініп, жұмыс­тар атқарылуда. Қызылорда да жылдан жылға көркейіп, көрікті шаһарға айналуда. Сыр аумағындағы ауылдар да назардан түскен емес. Қазіргі таңда қалаға қарасты көптеген елді мекендерде жүйелі жұмыстар жасалуда. Көгілдір отынмен қалаға жақын орналасқан кейбір ауылдар қамтылып, басқа да мәселелер шешімін тапты. Алдағы уақытта түгелдей ауылдардың жағдайы жақсарады деп күтілуде.

Ауылдық жағдайды жақсартып, тұрғындардың тұрмыс-тіршілігін көтеру мақсатында қалалық мәслихаттың кезектен тыс ІІІ сессиясы өтіп, қалаға қарас­ты кент, ауылдық округтердегі құрылыстарға бөлінген қаржылар туралы ақпарат беріліп, нақтылау мәселелері қаралды. Мәселен, қалаға іргелес жатқан Ақсуат ауылдық округінің көгілдір отынға қосылуымен ел көңіліндегі түйткілді мәселе біржола шешілді десек болғандай. «Облыс әкімі Нұрлыбек Нәлібаевтың қатысуымен өткен салтанатты шарада құны 4 млрд. 900 млн. теңгені қамтыған жобаның сапалы әрі мерзімінде аяқталғанына ақсуаттықтар ризашылығын білдірді. Осы кездесуде аймақ басшысы мұндай ауқымды жобалардың жалғасатындығын және келер жылы да республикалық бюджеттен қомақты қаржы бөлініп, ауылдардың көшелері жаңаратындығын айтты», -деді қала әкімі Асылбек Шаменов.

Ауқымды жұмыстардың қолға алынуы Қосшыңырау ауылдық округінде де бастау алды. Республикалық бюджеттен 662 млн. теңге бөлініп, бүгінде газ желісі жүргізілуде. Талай уақыттан бергі тұрғындардың талап-тілегі орындалды, мердігер мекеме жұмысшылары бекітілген кестеге сәйкес жұмыс жасауда. Елді мекен көгілдір отынмен жыл соңы толықтай қамтылады деп күтілуде.

Мемлекет тарапынан қажетті қаржы бөліну арқасында өңірімізде көптеген тың жұмыс­тар жасалып, халықтың игілігіне беріледі. «Біздің міндет Президент тапсырмаларын лайықты жүзеге асырып, қала тұрғындарына лайықты қолдау көрсету» деген шаһар басшысының сөзі жұмысты үлкен жауапкершілікпен атқарып жатқандығын көрсетеді. Қала басшысы респуб­ликалық, облыстық бюджеттен бөлінген қаржы туралы ақпарат беріп өтті. Кезек күттірмейтін мәселелерді шешу тұрғындардың талап-тілегіне сәйкес жасалуда.

«Ауыл-ел бесігі» мемлекеттік бағдарламасы арқылы биылғы жылы ұлттық қордан, облыстық бюджеттен 2 млрд. 712 млн. теңге бөлінген. Қалаға қарасты ауылдардың жұмыстары, оның ішінде 36,4 шақырымды құрайтын 46 көшеге орташа жол жөндеу жұмыстары жүргізіліп, 47 көшеге жарық беріліп, 14 көшеге жаяу жүргіншілер жолы салынды. Алдағы уақтытта электр желілерімен 13 көше қамтылып, 16 көшеге жаңа жол құрылысы жасалынбақ.

Аталған бағдарламамен жүзеге асып жатқан кей жұмыстар аяқталуға жақын. Өткен жылы ғана осы бағдарлама арқылы Талсуат және Қарауылтөбе ауылдық округтеріне 511,3 млн. теңге бөлінген болатын. 150 орындықтан тұратын клубтардың құрылысы бөлінген қаржының есебінен жүргізіліп, жақын күндері пайдалануға беріледі.

«Тән саулығы жан саулығы» демекші, адам баласының денсаулығы маңызды фактор. Түрлі індеттер, аурулар әлемде белең алып, елдердің берекесін қашыруы кей ауруларға қажетті емнің даму жолынан тыс қалғандығын көрсетеді. Дінде, мемлекеттердің заңнамасында да адамдардың денсаулығы алдыңғы кезекке қойылады. Мемлекетімізде денсаулық сақтау үшін түрлі жұмыстар атқарылып, ел бюджеті тарапынан денсаулық сақтау жобаларына мол қаржы бөлініп жүр. Тұтас мемлекетті аурудан аман сақтап, оларды емдеп жазу ақ халатты абзал жандардың міндетіне жүктелген. Алайда, дәрігерлерге қажетті медициналық жабдықтарды қамтамасыз ету Үкіметтің басты міндеті. Қазіргі таңда шалғай ауылдардағы медициналық мәселелер алдыңғы қатардағы шешілуі тиісті жұмыстар тізімінде. Дәрігердің көмегіне жүгіну үшін ауыл тұрғындары қалаға сабылмай, жергілікті медициналық мекеме – ауруханадан алғашқы көмек алуы шарт. Ол үшін ауылдарда медициналық орталықтардың құрылысы жүргізіліп, халық игілігіне берілуі тиіс. Мемлекет басшысы тапсырмасының себебінен ауыл-аймақтарда жұмыс­тар басталды.

«Ұлт саулығы жақсы болса ғана қоғам орнықты дамиды. Медициналық инфрақұрылымды кешенді түрде жақсартуға баса назар аудару керек. Мұның бәрі ұлт денсаулығын сөз жүзінде емес, іс жүзінде жақсартуға септігін тигізеді» деп ел Президенті Қасым-Жомарт Кемелұлы Тоқаев Қазақстан халқына Жолдауында айтқан болатын. Осы себепті, облыстық денсаулық басқармасы арқылы Ұлттық қордан 128,1 млн. теңге Баймұрат батыры ауылындағы дәрігерлік амбулатория құрылысына бөлінді. Сонымен қатар, Досан елді мекеніндегі медициналық пункт құрылысына 106,8 млн. теңге қарастырылған. Құрылыс жұмыс­тары биыл бастау алмақ.

Сыр өңіріндегі құрылыс жұмыстары қарқынды жүруде. Тұрғындардың өтініштері мемлекет тарапынан қолдау тауып, жергілікті басшылықтың тапсырмасымен жұмыстар жасалып, қалаға қарасты ауылдық жерлердің мәселелері шешімін тауып жатқандығы қуанарлық жағдай. Жыл басынан аталған жұмыстардың арқасында бірқатар елді мекендердің мәселесі шешімін тапты. Көгілдір отынмен қамтылған ауылдардың қыстағы көмір жағу жұмыстарымен қоштасқандығы тұрғындар үшін үлкен қуаныш. Шалғай ауылдағы мәселелер де шешімін тауып, жұмыстар жасалары анық. Мемлекетіміздің негізгі айнасы – ауылдың көркін келтіріп, тұрғындардың әл-ауқаты жақсара берсе, әр тұрғынның көңіліне сенім ұялары анық.

Қазақбай ӘНДЕШ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған