Ата ақылы – асыл мұра

ер балаларға арналған лекторий

Бала бойындағы тәрбие – әкенің балаға айтқан ақылдарының жемісі. Қазақ баланың бойынан жаман қылық байқаса, «тегіне тартқан» деп, ата мен әке тәрбиесін сынайды. Керісінше, бала елдің баласы болып, жақсылығын көрсетіп жүрсе, «әкесі жақсы адам еді, атасының тәрбиесі» деген сөздер айтылады.

Қызылорда облысы әкімі жанындағы әйелдер істері және отбасылық демографиялық саясат жөніндегі комиссиясы, Қызыл­орда қаласының білім бөлімі, Ардагерлер кеңесі, Абылай хан атындағы №140 қазақ орта мектебінің халықаралық отбасы күні қарсаңында ұйымдастырған, «Ата ақылы – асыл мұра» тақырыбындағы ер балаларға арналған «Отбасы мектеп» штабының лекторийі өтті. Кешті мектеп директоры Айгүл Мұсабаева ашып, шараның маңыздылығына тоқталды.

«Green study» жылыжай ғылыми-зерттеу орталығы, «Метеорология» тәжірибелік-зерттеу алаңындағы жұмыстармен келген қонақтарды оқушылар таныстыр­ды. Қонақтар шараның алғашқы бөлімінде тәжірибелік зерттеулерге шолу жасады. Шараның екінші бөлімі отбасы ішіндегі сыйластық, жылу, үлкенге құрмет көрсету, ата мен әкені қадірлеу, отбасындағы береке мен бірлікті, отбасылық дәстүрді, бауырмалдық, туыс­тық, салт-дәстүр сабақтастығы және де басқа да құндылықтарды қалыптас­тыру тақырыбында жалғасты.

Шараға облыстық ардагерлер кеңесінің төрағасы Серік Дүйсенбав, облыстық Қазақстан халқы ассамблеясы жанындағы Аналар кеңесінің төрайымы, «Отбасы мектеп» штаб мүшесі Нұрсәуле Мұсаева, Н.Бекежанов атындағы облыстық қазақ академиялық музыкалық драма театрының директоры Мұхтар Ниязов т.б. қонақтар қатысты.

Оқушылардың қызығу­шы­лығына, бейімділігіне қарай мектеп қабырғасында әлеуметтік жобалар жұмыс жасауда. Оқушы тәрбиесінде бұл жобалар маңызды болып саналады. Жоба жасау арқылы оқушылар өмірге қажетті топта жұмыс жасау, көшбасшылық ету, шешім таба білу, жоспар қойып, мақсаттарға қол жеткізеді, соған дағдыланады. «Оқуға құштар мектеп» жобасы аясында «Кел, оқиық», «Қауырсын қалам» айдарларын және «Менің өмірімдегі мақал-мәтелдер», «Ұлы тұлғалардың нақыл сөздері» жобаларын жоба қатысушылары қонақтарға таныстырды.

Қазақ халқының әкеге деген құрметі ерекше. Ақын-жазушылардың әке тақырыбында кеңінен толғанып, ой қозғағандары белгілі. «Әке – асқар тау, ана – баурайындағы бұлақ, бала – жағасындағы құрақ» деген асыл сөзге бабаларымыз тәрбиенің барлық бастауын сыйғызған. Әкенің бала тәрбиесінде тигізетін үлесі көп. Әкесінің ер намысын, болмысын бойына сіңірген бала жасқаншақ болмайды. Қонақтар осы тақырыпта ой қозғап, ер балаларға ақыл-кеңестерін өз өмірлерінен мысал келтіре отырып жеткізді.

Жақсылық отбасыдан бастау алады. Үйінде көрген жылулықты өскенде өзгеге көрсетем деген бала ата-ананың тәрбиесін алуға талпынады. Қоғамдағы адамдардың әрекеттері отбасындағы тәрбиенің көрінісі. Мектептегі «Парасатты отбасы» жобасы балалардың бойына қажетті құндылықтарды сіңіріп жұмыс жасау­да. «Аталар», «әкелер», «ағалар» кеңестері де жұмыстарын сәтті атқаруда. «Адалдық алаңы» жобасы бойынша оқушылармен атқарған жұмыстарды аталар кеңесінің жетекшісі Б.Нұрмұратов таныстырса, әкелер кеңесінің жетекшісі С.Шериев шәкірттерін еңбекке баулып, оқушылармен бірлесе жасаған қолөнер бұйымдарынан көрме ұсынды. Жас жалынды үйірме жұмыстары арқылы ән-күй өнеріне ағалар мектебінің жетекшісі Ж.Сүлейменов баулып келеді. Шарада шәкірттері күй орындап қонақтардың ықыласына бөленді.

«Батаменен ел көгерер» демекші, бата сұрау байырғы қазақ халқынан бүгінге дейін жалғасып келе жатқан дәстүр. Сол себепті шара қазыналы қарияларымыздың ақ батасымен аяқталды.

Қ.МАТАЙ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған