Сыр өңірінің жасыл желекке бөленуінің бастамасы
«Адамның табиғатсыз күні жоқ, Табиғаттың оны айтар тілі жоқ» деген қанатты сөздің түбінде үлкен мағына бар. Қазіргі таңда өзі жүрген, өзі тұрып жатқан мекенінің жағдайына немқұрайлы қарап, табиғатты ластайтын адамдар бар. Табиғат – жаратқанның адамзатқа берген аманаты. Адамдар – табиғаттың негізгі тұрғындары. Табиғатты аялаудың орнына зиянын тигізетін, өкінішке қарай, адамдар. Қоршаған ортаны қорғау – жер шарының барлық тұрғындарының басты міндеті. Табиғатсыз адамның, адамсыз табиғаттың жоқ екені де белгілі. Табиғаттың тосын мінезімен санасып, түрлі апаттарды болдырмау үшін экологиялық сақтық шараларды жасауымыз керек. Экология мәселесі – әлем мемлекеттерінің басты проблемасы. Біздің мемлекетіміз де экологиялық мәселелері бар өңірлердің жағдайын жасауға көмек көрсетуде.
Қазақ халқының мекен еткен топырағы құнарлы, астыққа, егін егуге, жайылымға да лайықты жерлер бар. Пайдалы қазбалардың бәрін қойнында жасырып жатқан жерге лайықты құрмет көрсетіп жүрміз бе? «Жер-ана» деген ұлтымыздың асыл сөзінен табиғатқа деген үлкен құрметті байқаймыз. Кез келген адамның табиғатты қорғауы парыз және ата-аналар, ұстаздар болсын, балаларға табиғатты аялау туралы ақпарат бергені жөн. Елімізде табиғатты қорғау туралы акциялар ұйымдастырылып жүр. Мемлекетіміздің барлық халқын осындай мәселеге тартып, табиғатты қорғау тек бірліктің күшімен жүзеге асатынын ұқтыруымыз керек.
Көктем айналаның күннің нұрына шомылып, жердің жасылданып, жаңаша көрік алатын мезгілі. Көктемгі іс-әрекеттерге байланысты жыл соңының нәтижесін байқауға болады. Сыр өңірінің де табиғатқа құрметпен қарап, көгалдандыру жұмыстарына аса қатты мән беретіні рас. «Бір тал кессең, он тал ек» қағидасын ұстанған өңіріміздің тұрғындары тал егуге құштар десек артық айтпаған болар едік. Осыған байланысты Қызылорда өңірінде «Наурыз жаңару» экологиялық акциясы болып өтті.
Жыл сайын Сыр өңірінде болатын тазалық, көгалдандыру жұмыстарына ерекше маңыз беретін облыс әкімі Нұрлыбек Нәлібаев Ұлыстың Ұлы күнін атап өту барысында ел ағаларымен, белсенді жастармен Достық аллеясы жанындағы «Наурыз жаңару» атты экологиялық акцияға қатысты. Өңір басшысы Сыр аймағы үшін жаңа жыл табысты басталғанын, қуанышты жаңалықтың бірі Сырдария өзеніне жоғарыдан көлемді су түсіп, «Кіші Арал» суға толып, халықтың бұл жаңалыққа қуанғанын да айта өтті.
— Мемлекет басшысы «Бірге: Таза Қазақстан» экологиялық акциясын жүйелі түрде өткізуге тапсырма берген-ді. Соған сәйкес, жыл сайын облыс аумағында наурыз айының алғашқы онкүндігінен бастап тазалық, көркейту-көгалдандыру, абаттандыру жұмыстары жүргізіледі. Халқымызда «Мың шыбық шаншып өсірсең, халқыңа орман салғаның. Халқыңа орман салғаның, өзіңе қорған салғаның» деген дана сөз бар. Ел Президенті Қасым-Жомарт Кемелұлы өз Жолдауында: «Бес жыл ішінде орман алқабында 2 миллиард, елді мекендерде 15 миллион ағаш отырғызу қажет» — деп, экологиялық ахуалды жақсартуға басымдық берген болатын. Өткен жылы облыс аумағында 160 мың түп ағаш отырғызылса, биыл 220 мың түп ағаш егуді жоспарлаудамыз,- деді Нұрлыбек Машбекұлы.
Облыс әкімі іс-шараның барысында Сырдария өзеніндегі мол судың өңірімізден қауіпсіз өтуіне көмек көрсетіп, белсене араласып, бар күшін салып қызмет еткен жауапты мекеме қызметкерлеріне алғысын білдіріп, марапаттады. Сыр өңірінде биылдан бастап «Үздік аудан орталықтары», «Үздік ауылдар», «Үздік мөлтек аудандар» секілді марапаттар экологиялық шараларға, абаттандыру, көгалдандыру секілді жұмыстарға белсене араласқан аймақтарға конкурс арқылы табысталады.
Ұлыстың ұлы күнін атап өту барысында биылғы жылы Сыр өңірінде 300-ге жуық мәдени-көпшілік іс-шара ұйымдастырылады. Осы айда аймақ басшысы әуежайдың жаңа терминалының іргетасын қалау рәсіміне және апатты тұрғын үйлердің иелеріне жаңа пәтердің кілтін табыстаған болатын. Орталық «Ақмешіт-Сырдария» мешітінде «Наурыз шапағаты» қайырымдылық науқанында тұрмысы төмен, аз қамтылған отбасыларға азық-түлікпен көмек көрсетілді. Сонымен қатар облыс орталығы және аудандарда ауыл шаруашылық өнімдерінің жәрмеңкесі болып өтті.
Біз мекен етіп жүрген жер – ата-бабаларымыздан қалған өлмес мұра. Келешек ұрпаққа табиғатты бүлдірмей тапсыру – бүгінгі ұрпақтың міндеті. Адамның жанына ем сыйлайтын туған жердің ауасын ластамай, табиғатты аялау – барлық адамның басты мақсаты. Сыр өңірімізде жыл сайын экологиялық мәселелерді шешу үшін жұмыстар жүйелі атқарылуда. Қызылорда халқының таза ауамен тыныстауы үшін тал егу жұмыстарын көбейту, күтіп-баптау қажет. Сондықтан Сыр өңіріндегі ауа-райының аптап ыстығынан қорғану үшін жасыл ағаштардың санын көбейту мақсатындағы көгалдандыру шараларына әрбір қызылордалық атсалысу керек.
Қ.Әндешұлы
