Халықтың әл-ауқатын жақсарту – мемлекеттің назарында

Әрбір мемлекет өз халқының әл-ауқатын жақсарту үшін тиімді жұмыс жасайды. Халқы толық қажеттілікпен қамтылып, өмір сүру деңгейі көтерілген кезде ғана мемлекеттің әлемдік сахнада алдыңғы шептегі дамушы мемлекеттермен қатар тұруына, алпауыт елдермен бәсекелес болуына көмегі зор. Ішкі нарықтағы азық-түлікті жергілікті халыққа тиімді бағамен үлестіріп беру – мемлекеттің басты жұмыстарының бірі. Ал, шет мемлекетке экспортталатын өнімді алғашқы кезекте қайбір ел өз халқына бірінші ұсынатыны белгілі. Себебі, бірінші кезекте ішкі ахуалды түзетіп, содан кейін шет мемлекетке өнім ұсыну өзгермейтін қағида.

Бағаны тұрақтандыру – өңір тұрғындарының талабы

Жылдан жылға азық-түлік бағасының өсіп, мемлекеттік қызметшілер мен мұғалім, дәрігерден басқа, өзге сала қызметкерлерінің жалақыларының көбеймей тұрғаны жиі айтылып жүр. Жалақысының жартысынан көбін азық-түлікке жұмсайтын халықтың ішкі уәжі тыңдар құлаққа естіледі. Саудагерлердің қойған бағасы, «доллар қымбаттады» деген сылтауды желеу етіп, тұтынушының қалтасын қағып алатын адамдардың мәселесі қаралуы керектігі айтылады. Бағаны тұрақтандыру, өз еркімен бағаны аспандататындарды қадағалау Үкіметтің айналысатын жұмысы. Осындай мәселелердің оңтайлы шешімін тауып, лайықты жұмыстар атқарылуы үшін келелі жиын болып өтті.

Мемлекет басшысының әлеуметтік-экономикалық даму мәселелері туралы экономикалық сая­саттың кеңейтілген мәжілісте ай­қындаған нақты сегіз бағыты Үкімет отырысында талқыланды. Атқарылатын шаруалар мен істер туралы жауапты ведомство басшылары баяндады.

Облыс әкімі Нұрлыбек Нәлібаев Үкімет отырысынан соң Премьер-министр берген тапсыр­маларды пысықтау мақсатында жиын өткізген болатын.

– Барлық басқармалар салалық министрліктермен әр бағыт бойынша өз міндеттерін пысықтап, жұмыс жасауы керек. Мемлекет басшысы азық-түлік бағасының қымбаттауына тоқталып, тұрақтандыру қорлары мен азық-түлік корпорациясының жұмысын күшейтуді тапсырды. Расында, біздің өңірде аграрлық секторды дамытуға мол мүмкіндік бар. Дегенмен тұрғындар нанмен, күрішпен және тұзбен ғана 100 пайыз қамтамасыз етілген. Халық тұтынатын әлеуметтік маңызы бар негізгі тауарлар сырттан тасымалдануда. Оларды өндіруге толық мүмкіндігіміз болғанымен, жұмыс жолға қойылмаған. Облыс­тық ауыл шаруашылығы және жер қатынастары, кәсіпкерлік және өнеркәсіп басқармалары Қызыл­орда қаласының, барлық ауданның әкімдерімен, «Байқоңыр» әлеуметтік кәсіпкерлік корпорациясымен бірлесіп, азық-түлік қауіпсіздігін қамтамасыз ету және бағаны тұрақтандыру бойынша нақты ұсыныстар берсін, – деді аймақ басшысы.

Мемлекет басшысының тап­сырмаларын жүзеге асыру бойынша, облыстық экономика және қаржы басқармасына барлық басқармалармен бірлесіп, Өңірлік іс-шаралар жоспарын жасау міндеті тапсырылды. Қалалардағы жағдайды жақсарту мәселелері, инвестиция тарту жұмыстары жиында талқыланды.

Мемлекеттің іргетасының бірі болып табылатын қалалардың жағдайын жақсарту басты талаптардың бірі. Қала халқының күнделікті сүріп жүрген өміріне тағы да қосымша рең берілсе, қаланың да, қала тұрғындарының да ажарлана түсетіні хақ. Әр өңір басшысының атқаруы керекті мәселелерін облыс әкімі айтып өтті. Ендігі кезекте осы мәселелердің шешілуіне тағайындалған басшылардың жұмыс нәтижесін күтетін боламыз. Жазғы уақытта халық игілігі үшін егілетін дақылдардың жыл соңында халыққа лайықты түрде ұсынылуы, бағалардың барлығын тұрақтандыру керектігін аймақ басшысы тілге тиек етті.

Қазіргі таңда халық талабы кеу­дедегі жанды сұрайтындай емес екендігін барлығы да түсінеді. Халықтың тілегі қалтаға салмақ түспейтіндей, алатын нәпа­қасына лайықты түрде азық түлікті талап етуі заңды. Мемлекеттің тұтастығын қамтамасыз етіп отырған қарашаның талап-тілегін орындау үкімет басшыларының есінде әрдайым болуы керек. «Алтын тақтың үстінде жалаңбұт отырмыз» деген әйгілі қазақ жазушысы Шерхан Мұртазаның айтқан сөзі халық жадына жиі оралмауы үшін халықтың жағдайын жасаған дұрыс. Жер астының байлығын санап, оны қайталай бергеннен түк өзгермейді. Тек, сол байлықтың үстінде отырғандардың жұмысы адалынан болып, халыққа да бір тамшы су үлестірсе деген тілек біздікі. Жасалып жатқан жұмыстарды ешкім жоққа шығара алмайды, ел қамы үшін, халық жағдайы үшін жасалатын іс-әрекеттер көңілге жылу сыйлайды. Үкімет тарапынан оңтайлы істер жалғасын таба берсе, халқымыздың да тұрмыс-тіршілігі түзеліп, айтылар сынның азаятынын көрер күн алыс емес секілді.

Мемлекет тарапынан атқарылатын жұмыстар

Аймақ басшысы Нұрлыбек Нәлібаевтың төрағалығымен өткен облыс активінің отырысында Мемлекет басшысы айқындаған экономикалық дамудың сегіз бағыты бойынша мақсат-міндеттер талқыланды.

Халық табысын ұлғайту, жаңа жұмыс орындарын көбейту, тұрғындардың өмір сүру сапасын арттыру, инфрақұрылымды одан әрі дамыту туралы жұмыстарды жаңғырту, қауіпсіздікті қамтамасыз етіп, адами капиталдың дамуы үшін мүмкіндіктерді ұлғайту керектігі атап өтілді.

– Ең бірінші Мемлекет басшысы азық-түлік тауарларын өндіру мен баға тұрақтылығына тоқталды. Елімізде өндірілетін ауыл шаруашылығы тауарлары ішкі сұранысты толық қамтамасыз етпейтіндіктен, тұрақтандыру қорлары мен азық-түлік корпорациясының жұмысын күшейтуді тапсырды.

Азық-түлік бағасының негізсіз өсу деректері тіркелген жағдайда баға белгілеудегі делдалдық тізбектерді тексеру жөніндегі өңірлік комиссия дер кезінде тиісті шара қолдануы керек. Өңірде жаңадан көкөніс сақтайтын қоймалар салып, тиімді сауда-логистикалық инфрақұрылым құру қажет. Қазір тек Жаңақорған ауданында сыйымдылығы 2500 тонна болатын «Жан-Арай» жеміс сақтау қоймасы бар агроиндустриалды кешен іске қосылған. Биыл Қызылорда қаласында «Aray Food» жауапкершілігі шектеулі серіктестігінің сыйымдылығы 4000 тонналық көкөніс сақтау қоймасының құрылысы басталып, оны жыл аяғына дейін іске қосу жоспарлануда. 2025 жылға дейін облыстың көкөніс сақтау қуаттылығын 21 мың тоннаға дейін жеткізуіміз керек, – деді Н.Нәлібаев.

Қызылордалықтар күн жылыған сәттен дәнді-дақылдарын жерге шашып, егін егуге кіріседі. Сыр халқының азық-түлікпен қамтылуына септігін тигізетін диқандардың еңбегі зор. Маңдай терді төгіп, халыққа қызмет ететін диқандарға қолдау мемлекет тарапынан көрсетіліп жүр. Осы орайда облыс әкімі жауапты сала басшыларына Қызылорда қаласы мен аудандар бойынша егін егуге ынта білдірген халыққа жер телімдерін үлестіріп, қолдау көрсету керектігін тапсырды. Халық тұтынатын тауарларға, сонымен қатар ішкі нарықты қамтамасыз ететін өндірістерді ашу, шағын және орта бизнесті қолдау жұмыстарының негізгі мақсаты екендігін атап өтті. Инвестиция тарту және коммуналдық инфрақұрылым жүйесін жаңарту бойынша нақты ұсыныстар берілуі керек. Түрлі міндеттер оның ішінде білім сапасын арттыру, міндетті әлеуметтік медициналық сақтандыру жүйесінің ашықтығын қамтамасыз ету, жұмыссызық деңгейін төмендету, зорлық-зомбылықтың алдын алу бойынша сөз қозғалды. Ауыл-аймақтың өмір сүру сапасын, табысын арттыру мақсатында құрылған «Ауыл аманаты» бағдарламасы шеңберінде облысқа бөлінген қаражатты ұлғайтып, Сыр халқын ақпараттандыруды басты назарда ұстау керектігі баса айтылды.

«Халық сұраса, хан түйесін сояды» дегендей, аталған жобаларды халық игілігі үшін жасап жатқан мемлекет басшысының талабы көңілге сенім ұялатады. Бір жағадан бас, бір жеңнен қол шығарып, жұмыла іс әрекеттер жасасақ, алынбас қамал болмайды. Ел мүддесі үшін мемлекет тарапынан жасалатын жұмыстардың нәтижелі болуына қарашаның да тигізер үлесі көп. Аймақ басшысының нағыз шешілуі керекті мәселелерді көтеруі жергілікті басшылықтың жұмыс жасау деңгейлерінің жоғары екендігін көрсетеді. Қазіргі таңдағы басты проблемаларды бірлесе отырып шешіп, болашаққа нық қадаммен алға жылжысақ, Сыр өңірі көркейе түспек. Ата-бабамыздан аманат болып қалған жерімізді өз пайдамызға жаратып, тиісті жұмыстарды талпыныспен жасасақ, ел деңгейі де, халық жағдайы да жақсаратыны сөзсіз. «Бірлік түбі береке» дегендей, бірлікпен жеткен істің баянды болатынын халық та, мемлекет басшылары да түсінеді.

Қазақбай ӘНДЕШҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған