Педагогикалық кеңесте білім сапасы сараланды

Білім саласын дамыту үшін білім ордаларының атқаратын жұмысы маңызды. Оқушылардың білім деңгейін арттыру, мұғалімдердің оқушылармен жұмыс жасауының бәрі де мектептің имиджіне әсер етеді. Ұстаз болу үлкен жауапкершілікті талап етеді. Сол жолда темірдей тәртіп пен пайдалы білімді ұштастырып, оқушы санасына құя білу – педагог мамандардың тікелей жұмысы. Білім сапасын көтеру үшін ұстаз қауымы тынбай еңбек етуі керек. Мемлекетіміз әлемдік стандартқа сай мектептерді көбейтіп, оқушылардың білімге зерек, бәсекеге бейім болуын талап етеді. Себебі, ғылымда да алдыңғы қатарға шығу үшін, қазіргі жас жеткіншектердің білім алу жүйесін талапқа сай жасауды мемлекетіміз көздеп отыр. Тың идеялармен жаңалық әкелетін ғалымдардың өңіріміздің қай мектебінде білім алып жүргені белгісіз. Алайда, барлық мектептің сапасын көтеріп, лайықты білім беру жүйесін қалыптастыру да өзекті мәселе. Сыр өңірі білімді ұрпақ көбейту үшін барын салуда.

Қызылорда қаласы бойынша білім бөлімінің басшысы Ерлан Теңізбайұлы және қалалық кәсіподақ комитетінің төрағасы Орынша Міржақыпқызы Абай атындағы дарынды балаларға арналған үштілді сыныбы бар мамандандырылған мектеп ұжымымен кезектен тыс педагогикалық кеңес өткізді.

Абай атындағы мектепте 1 педагог-шебер, 81 зерттеуші, 110 сарапшы, 147 модератор, сонымен қатар ІІ санатты 1 мұғалім оқушыларға білім беруде. 158 сынып комплектісі бойынша ІІ ауысымда 4236 оқушы 2022-2023 оқу жылында мектепте білім алуда. Білім ордасының өткен жылы атқарған жұмыстары туралы баяндаған мектеп директоры Жанат Мылтықбайқызы алдағы даму жоспары туралы да жиында таныстыр­ды.

Мектептің абыройын арттыратын ұстаздар және жаны білімге құштар оқушылар екендігі белгілі. Білімдінің жететін жетістігі көп, болашақта да білім жолында алған жүлделері өздеріне оң пайда береді. Абай атындағы дарынды балаларға арналған мектеп оқушыларының да біршама жетістіктері бар.

– 2022-2023 оқу жылындағы жалпы білім беретін пәндер бойынша 9-11 сынып оқушылары арасында республикалық олимпиаданың екінші кезеңіне 37 оқушы қатысқан болатын. 4 оқушы І орынды, 8 оқушы ІІ орынды, 9 оқушы ІІІ орынды иеленсе, Алғыс хатпен 4 оқушы марапатталды. Облыстық кезеңіне мектептің атынан 4 оқушы қатысып, ІІІ орынды 2 оқушы алып келді.

Мектептің атынан сынға түскен 27 оқушы жалпы білім беретін пәндер бойынша 9-11 сынып оқушылары арасында өткізілген республикалық зерттеу жобалар конкурсына қатысты. 2 оқушы І орын, 5 оқушы ІІ орын, 7 оқушы ІІІ орын, 13 оқушы Алғыс хатымен марапатталды. Республикалық кезеңнен 2 оқушы ІІІ орынды иеленді.

«Зерде» республикалық 2-7 сынып оқушыларының зерттеу жобалары мен шығармашылық жұмыстары конкурсына 67 оқушы қатысты. 1 оқушы І орын, 12 оқушы ІІ орын, 13 оқушы ІІІ орынмен марапатталды. 9 оқушыға Алғыс хат табысталды. Облыстық кезеңінде бір оқушы І орынды, рес­публикалық кезеңде ІІ орынды жеңіп алды.

7-8 сынып оқушылары арасында республикалық юниорлық олимпиаданың қалалық кезеңіне 14 оқушы қатысты. 2 оқушы І орынмен, 6 оқушы ІІ орынмен, 4 оқушы ІІІ орынды иеленді. Облыстық кезеңге 2 оқушы барады» – деді мектеп директоры.

Педагогикалық кеңесте мұғалімдердің сағат жүктемесі де талқыланды. Ұстаздармен Ерлан Теңізбайұлы кері байланыс жасап, қойған сұрақтарына жауап берді. Сынып жетіспеушілігін шешу мақсатында басталған 550 орындық бастауыш сыныпқа арналған қосымша құрылыс аяқталуға жақын.

Жиын арқылы мектептегі мәселелер, атқарылған шаруалар айтылды. Білім сапасы сараланды. Педагогикалық кеңес жиі болып, ұстаздардың ойлары ортаға салынар болса, мектептің ілгері басуына көмегі тиеді. Білім саласының қаламызда басты назарда екендігін осы жиыннан байқауға болады.

Қ.ӨТЕБАЙ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған