Қазақ халқында отбасы тақырыбы ауқымды болып келеді. «Отан отбасыдан басталады» деп ата-бабаларымыз айтып кеткендей, бір отбасы Отанды толықтырушы негізгі күш екендігін айтпасақ та ұғарсыз. Ұлтымызда тарихы терең, үлгі боларлық отбасылар өткен. Қазіргі таңда қазақ отбасыларының деңгейі қалай? Халық аузынан түспей, ынтымақ-берекесі жарасқан әулеттер жайлы естіп жатамыз. Бұл, әрине, отбасылық құндылықтарын жоғалтпаған отбасыдан ғана көрініс табады. Ері әйелін, әйелі ерін сыйлап, балаларына жарқын болашақ қалыптастырып, үйде жанжал болдырмай, сыпайылық пен сабырлыққа құрылған отбасыларды дәріптеу парыз. Үнемі барлығы жақсы болмайтыны белгілі, жараса алмай, түрлі үлкенді-кішілі қиындықтарға қарсы тұра алмай, ажырасып жатқан отбасылар да бар. Осындай жағдайлардың болмауы үшін, жарасым тапқан әулеттерді дәріптеп, ел алдына көрсету мақсатында «Мерейлі отбасы» конкурсы жыл сайын өткізіледі.
Өңірлік коммуникациялар қызметінің алаңында облыс әкімінің аппарат басшысы Шахмардан Байманов, 15 мамырда атап өтілетін халықаралық отбасы күніне орай Сыр өңірінде қоғамдық-бұқаралық, мәдени-көпшілік, ағартушылық-зияткерлік, ғылыми-танымдық және спорттық 25 шараның өткізілетіндігінен хабардар етті.
-Мемлекет басшысы Қасым- Жомарт Кемелұлы Тоқаев: «Халқымыз қай заманда да отбасы дәстүрін берік ұстанып, қадірлей білген. Үлкенге құрмет, кішіге ізет – біздің қанымызға сіңген қасиет. Әрбір азаматтың адамгершілік болмысының қалыптасуына отбасындағы ахуал айрықша әсер етеді. Сондықтан мемлекет әр шаңырақтың әл-ауқатын арттырып, әр азаматтың өсіп-өркендеуі үшін барлық жағдайды жасайды,- деп атап өтті.
Өңірде халықаралық отбасы күніне орай облыстық іс-шаралар жоспары бекітілді. Жоспарға терең мазмұндық сипатқа ие қоғамдық-бұқаралық, мәдени-көпшілік, ағартушылық-зияткерлік, ғылыми-танымдық және спорттық 25 шара енгізілді. Мереке аясында «Мерейлі отбасы» ұлттық конкурсына қатысып жеңімпаз атанған, сондай-ақ басқа да үлгілі отбасылар мүшелерімен мектептерде, колледждерде кездесулер, танымдық шаралар өткізіледі. Мерекелік шаралар бұқаралық ақпарат құралдарында, әлеуметтік желіде кеңінен ақпараттандырылады,- деді Шахмардан Асқарұлы.
Сонымен қатар, отбасы құндылығы мен дәстүрлерін нығайту мақсатында 2013 жылы қыркүйек айының екінші жексенбісі «Отбасы күні» болып белгіленді. 2014 жылдан «Мерейлі отбасы конкурсы бастау алғандығын, конкурстың қазақтың ұлан ғайыр даласындағы тағылымы талайға тәрбие болып, отбасыларды танытып, отбасылық адамгершілік, рухани құндылықтарымызды жаңғыртуда маңызды рөл атқаратындығынан хабардар етті. Әсіресе, отбасы мен некенің жағымды үлгісін дәріптеуге, отбасы мәртебесін арттыруға, қазақстандық отбасының жағымды имиджін насихаттау, отбасындағы адамгершілікті, руханиятын дамыту, ерлі-зайыптылардың маңызын тану, ата-аналардың бала тәрбиесіндегі жауапкершілігін арттыруға бағытталғандығын айтты.
Облыс әкімінің аппарат басшысы «Мерейлі отбасы» республикалық байқауының І кезеңіне құжат қабылдау басталғанын жеткізіп, жерлестерін белсене қатысуға шақырды. Бірінші кезеңіне қатысу үшін Қызылорда қалалық және аудандық қоғамдық даму бөлімдеріне құжаттарды тапсыру қажет. 15 мамыр мен 15 маусым аралығында ұлттық конкурстың І кезеңіне құжаттар қабылданады.
Сонымен қатар, облысымызда тың жобалар жүзеге асып жатқандығы туралы аппарат басшысы хабардар етті.
— Бүгінде аймағымызда облыс әкімі Нұрлыбек Машбекұлының бастауымен бірнеше ауқымды жобалар жүзеге асуда. Атап айтқанда, кәсіпкерлер демеушілігімен құны 1,5 млрд. теңгені құрайтын «Анаға тағзым» орталығының құрылысы биыл тамыз айында, келесі бір нысан 1,6 млн. теңгені құрайтын Неке сарайының құрылысы қыркүйек айында, 3,7 млрд. теңге болатын мың орындық Өнер орталығы желтоқсан айында пайдалануға беріледі деп жоспарланып отыр. Тамыз айында ашылғалы отырған «Анаға тағзым» орталығы әйел затының, асыл анаға деген құрмет пен ризашылықтың көрінісі. Орталықтың негізгі мақсаты ұлы даланының ұлы аналары өткен ізгі жолын дәріптеп, жас ұрпаққа рухани адамгершілік тәрбие беріп, өткен заманның тарихи-тағылымды істерін жаңа заман талабымен сабақтастырып бүгінгі қазақ әйелінің озық образын қалыптастыруға бағытталған»,- деді Шахмардан Байманов.
Сонымен қатар, аппарат басшысы орталықта түрлі клубтар ашылатынын, оның ішінде аналар, әжелер, жеңгелер клубы, барлық санаттағы қыз-келіншектердің де қамтылатынын атап өтті. Түрлі семинарлар, кеңестер, тренингтер, үйірмелер жүйелі жұмыс жасап, отбасының бекем болуына қызмет етпек.
Қазақ халқында, исламда әйел затын құрметтеп, жоғары бағалағандығы мәлім. «Жұмақтың кілті ананың табанының астында» деген асыл сөзден, анаға деген үлкен құрметті байқаймыз. Қазіргі таңда ақ жаулықты аналарымыздың қоғамға ықпалы бәсеңдегендей. Жүгенсіз кеткен жастардың, оның ішінде дәстүрімізге қарама-қайшы келетін жат ағымдардың, батыстық идеологияның құрбаны болып жүрген жас аруларға аналарымыздың кеңестері керек-ақ. Ана қызының сырласы болғандықтан, қазіргі отбасылық байланысы төмендеген отбасылармен жұмыстар жасау керек. Жас отбасындағы мәселелердің салдарынан екі жастың екі жаққа кетіп, ажырасып жатқандығын көріп жүрміз. Жас келіндердің отбасылық өмір құндылықтарын толық білмей, іс жүзінде ұшырасқанда көтере алмай күйеуімен түсініспеушілік орын алып, отбасының беріктігіне сызат түседі. Осындай мәселелерді шешуде, жас бойжеткен арулардың, отбасылық өмірге қадам басып, келін болған аруларға «Анаға тағзым» орталығығының берері мол болмақ.
Облысымызда 16751 «Алтын алқа», «Күміс алқамен» марапатталған, 33851 көпбалалы отбасыға ай сайын 2 млрд. 484 млн. теңге мемлекеттік жәрдемақы төленуде. Жыл сайын төлем мөлшері артып келеді.
Алғаш рет 100-ден астам жас отбасыға «Сыр жастары» бағдарламасы аясында жеңілдетілген ипотекалық несие беру үшін жергілікті бюджеттен 1,2 млрд. теңге, «Отбасы банкі» арқылы 500 млн. теңге, барлығы 1,7 млрд. теңге қаражат бөлінген. Биылғы жылы жаңадан 23 тұрғын үй халық игілігіне беріліп, барлығы 982 отбасыға пәтер кілті табысталмақ.
Мемлекетіміздің тұтастығы үшін іргетасы бұзылмаған отбасы маңызды. Еліміздегі ажырасу деңгейінің күрт өсуі халқымызды да, Үкіметті де алаңдатып отыр. Материалдық жағдай, отбасындағы зорлық-зомбылықтың себебінен бөлек кететін отбасылардың мәселесімен күресу үшін мемлекетіміз түрлі жобалардың тетігін іздеп көрді. Жыл сайын отбасылық бірлікке шақыратын жұмыстар атқарылуда. Кез келген мемлекет үшін мемлекетті құраушы отбасының беріктігі маңызды. Сыр өңірі де бұл мәселеге бей-жай қарамайды. Қызылорда шаһарында көрсең көз сүйсінетін, сыйластық пен ізгілікке құрылған отбасылар жетерлік. Осындай отбасыларды дәріптеу арқылы отбасында қиындықтарға тап болған екі жастың дұрыс шешімге келуіне көмегі тиер еді. «Мерейлі отбасы» конкурсы ауыр ахуалды түзетіп, барлық отбасыны бірлікке шақыратындай. Қызылорда өңірінің тұрғындары отбасыларының мақтанарлықтай екендігін көрсету үшін, «Мерейлі отбасы» конкурсы таптырмас мүмкіндік. «Мерейлі отбасы» халқымыздың мерейін үстем етеді деп сенім білдірдік.
Қ.ӨТЕБАЙ
