Отбасындағы тәрбие талқыға түсті

Білім саласының дамуы – мемлекет дамуының негізгі көрсеткіші, өркениетінің өркендеп, мәдениетінің ілгерілеу өлшемі іспетті. Өйткені, білім мен ғылым бар жерде саналы ұрпақтың санаты қалыптасып, алға жылжудың алғышарттары айқын көрініс береді. «Бала» деп байыз таппайтын, оқушы үшін оң шешім қабылдауға тырысатын білім басқармасының бастамалары қашан да қарқынды һәм нәтижелі. Оның үстіне, ұшқыр ойлы һәм ұқыпты оқушыны даярлау мақсатында білім мен білікті ұштастырудың ұтымды тәсілдерін қарастыратын мектепте тәрбиенің де тіні тарқамайтыны анық.

Осы орайда, Н.Бекежанов атындағы қазақ академиялық музыкалық драма театрында Қызылорда облысы білім саласы қызметкерлері мен ата-аналардың «Отбасы – тәрбие бесігі» атты бірлескен кеңесі ұйымдастырылды. Шараның негізгі мақсаты – өскелең ұрпақты жан-жақты дамытып, толыққанды тұлғаны қалыптастыру. Жиынға облыс әкімі Нұрлыбек Нәлібаев, мемлекет және қоғам қайраткері Мұрат Бақтиярұлы, қала, аудан әкімдері, құқық қорғау органдарының басшылары және селекторлық режимде аудандық қоғамдық кеңес өкілдері, білім саласының қызметкерлері мен ата- аналар, журналистер қатысты.

Кеңес модераторы тарих ғылымдарының кандидаты, доцент Наурызбай Байқадамов жаһандану дәуірінде әр халық, әр ұлт үшін дінін, тілін, мәдениетін, тарихын мейлінше сақтап қалудың зор маңызын атап өтіп, отбасылық тәрбие ерекше рөл атқаратынын тілге тиек етті. Облыс әкімі Нұрлыбек Нәлібаев кездесуге аймақ басшысы ғана емес, әке ретінде ашық пікірлесу үшін келгенін айтып, өңірде балалар үшін атқарылған жұмыстарды баяндады.

– Мемлекет басшысы өткен жылды «Балалар жылына» арнап, айрықша маңыз берді. Мерейлі жылы жеткіншектерімізге бұрынғыдан да көбірек көңіл бөлуге, асқақ армандарына басқан қадамдарын демеуге күш салдық. Бүлдіршіндерге тарту ретінде аймақта демеушілердің қолдауымен құны 1,6 млрд. теңгеге 80 балаларға арналған ойын алаңын пайдалануға бердік. Тек қаланың ортасында ғана емес, шеткері аймақтарда да ойын алаңдары салынды. 2022 жылы 19 балабақша ашылды. Өткен жылы 6 мектеп тапсырып, 2 апатты білім беру ұйымының мәселесін шештік. Жалағаш ауданында 250 орындық заманауи Оқушылар үйін ел игілігіне табыстадық.

Үкімет басшысының Сыр еліне сапары барысында 300 орындық жатақханасы бар 400 орындық физика-математика бағытындағы мектеп-интернат, көпсалалы спорт кешенін салу жобасы қолдау тапты. Биыл «ҚазГерМұнай» компаниясы Қызылордада заманауи оқушылар сарайының құрылысын бастайды. Алдағы жаңа оқу жылының қарсаңында 150 орындық екі мамандандырылған мектеп дарынды балаларды қабылдайды,- деді облыс әкімі.

Жыл басталысымен-ақ жағымды жаңалықпен жұртшылықты риза етіп, ата-ана мен баланың қуанышын еселей түсті. Асылында, бағыт айқын, қадам нық болса, берекелі бастама да нәтижемен түйінделмек. Мәселен, алдағы 3 жылда 64 балабақша ашу жоспарлануда. Осылайша 11 мыңға жуық бүлдіршін мектепке дейінгі тәрбиемен қамтылатын болады. Бұған қоса биыл Жаңақорған, Шиелі, Қазалы, Арал аудандарында 940 орындық 4 жаңа мектеп пайдалануға берілмек. Сондай-ақ, Мемлекет басшысының бастамасымен «Жайлы мектеп» ұлттық жобасы аясында 15100 орынға арналған 21 мектеп салынады. Жалпы құны 100 млрд. аса теңгені құрайтын бұл білім саласындағы бұрын-соңды болмаған үлкен жоба.  Аймақта жеке мектептердің де үлесі артуда. Қазірдің өзінде өңірде 21 жеке мектеп жұмыс істесе, алдағы 3 жылда инвесторлар 12 мектеп салуға ниет білдірді.

Балаға білім беретін ортаның жайлы болуын ғана емес, сақтығына да аса назар аударған басшылық қауіпсіздікке де қырын қарамады. Осы ретте, өңірдегі жетістіктерді жіпке тізіп саралаған аймақ басшысы қоғамда белең алған интернетке тәуелділік, құмар ойынға салыну, оқушылар арасындағы әлімжеттік және өзге де мәселелердің алдын алу мақсатында тиісті басқарма басшылары мен қала, аудан әкімдеріне балалардың бос уақытын тиімді өткізу және оларды толыққанды әлеуметтендіру іс-шаралар кешенін қолға алуды тапсырды.

Облыстық білім басқармасының басшысы Мейрамбек Шермағанбет «Білім беру ұйымдарында құқық бұзушылық пен зорлық-зомбылықтың алдын алу және бала қауіпсіздігін қамтамасыз ету мәселелері» тақырыбында баяндама жасады. Балалардың бос уақытын қамту бағытында өңірде жалпы 61 мектептен тыс қосымша білім беру ұйымы, мектеп жанында 2170 спорттық секция және 1942 үйірме жұмыс жасайды. Онда 156764 бала қамтылған. Оқушылар қауіпсіз ортада өмір сүруі мақсатында аймақтағы барлық білім беру ұйымдары бейнебақылау жүйесімен 100% қамтылып, 170 мектепке полиция бөлімшелеріне қосылатын дабыл түймесін орнату үшін 97 млн. теңге бөлінді. Барлық білім беру ұйымдарында дабыл түймесінің іске қосылуы осы жылы толықтай шешімін тапты. Кеңес отырысына арнайы қатысқан мемлекет және қоғам қайраткері Мұрат Бақтиярұлы өз баяндамасында қоғамдағы өзекті мәселелерді зерделеп, кибербуллинг, моббинг секілді аса қауіпті құбылыстардың әсерін назарға салды.

Көптің көзінше тартынбай түйдек мәселені талқылап, алдағы жүйелі жоспарларды жеткізген баяндамашылар өз салалары бойынша тәжірибелерімен бөлісіп, бала тәрбиелеуге қатысты ұсыныстарын ортаға салды.

З.Қонысжан

Пікір үстеу

Э-пошта мекенжайыңыз жарияланбайды. Міндетті өрістер * таңбаланған