Бір аптада 78 әкімшілік хаттама рәсімдеді
Қызылорда қалалық Полиция басқармасының кәмелетке толмағандар істері жөніндегі бөлім қызметкерлері күн сайын жасөсіпірімдер арасында құқық бұзушылықтардың алдын алу жұмыстарының тиімділігін арттыруға бағытталған іс-шаралар кешені жүзеге асырылуда.
Мәселен, бір апталық рейдттік шаралар жүргізіліп, полицияға 65 жасөспірім жеткізілді. 78 азамат әкімшілік жауапкершілікке тартылды, оның ішінде, кәмелетке толмағандардың түн тыныштығын бұзудың 3 дерегі анықталса, кәмелетке толмағандардың ойын-сауық орындарында және түнгі уақытта заңды өкілдерінің еріп жүруінсіз тұрғынжайдан тыс жерде болуына жол бергені үшін 65 ата-ана және кәмелетке толмағандарды бейімдеу орталығына 12 жасөспірім орналастырылды.
— Кәмелетке толмағандардың заңды өкілдерінің еріп жүруінсіз тұрғынжайдан тыс жерде түнгі сағат 23-тен таңғы 6-ға дейін болуы — заңды өкілдеріне ескерту жасауды көздейді. Егер бұл әрекеттер бір жыл ішінде қайталап жасалса, құқық бұзушыларға жеті айлық есептік көрсеткіш мөлшерінде айыппұл салынады,- деді Қызылорда қалалық Полиция басқармасының ювеналды полиция бөлімінің бастығы, полиция капитаны Айдос Прежекенов.
«102» арнасына 1224 хабарлама келіп түсті
Қызылорда қаласы Полиция басқармасының Жедел басқару орталығында полицейлер тәулік бойы үздіксіз өз жұмыстарын атқарып келеді. Қоғамдық қауіпсіздікті қамтамасыз ету мен тәртіпті сақтау мақсатында анықталған құқық бұзушылықтар бойынша жедел жұмыстарды жүзеге асырады. Бір аптада 102 нөмеріне 1224 хабарлама келіп түскен.
Ал, Жедел басқару орталығының көмегімен 681 құқық бұзушылық анықталды. Оның ішінде ҚР ӘҚБтК-нің 593-бабымен (жол жүрiсi қағидаларында көзделген жолаушыларды және жүктердi тасымалдау, қауiпсiздiк белдіктерiн немесе мотошлемдердi пайдалану жөніндегі талаптарды сақтамау) 116 жүргізуші, 591-бабының 1-бөлігімен (көлiк құралын басқару кезiнде жүргiзушiнiң телефонды не радиостанцияны пайдалану) 22 жүргізуші, 596-бабының 1-бөлігімен (көлік құралын жолдың жүру бөлігінде орналастыру, қарсы жүріп өту немесе басып озу қағидаларын бұзу) 16, 600-бабының 1-бөлігімен (Жол жүрісінде басымдықты пайдаланатын көлiк құралдарының жүргiзушiлерiн қоспағанда, жол жүрiсi қағидаларының жаяу жүргiншiлерге немесе жол жүрiсiнiң өзге де қатысушыларына жол беру талаптарын орындамау) 48 жүргізушіге әкімшілік хаттама толтырылды. Сонымен қатар, ҚР ӘҚБтҚ-нің 440-бабы (алкогольдік ішімдік ішу немесе қоғамдық орындарға масаң күйде жүрген) бойынша 2 хаттама рәсімделді. ҚР ӘҚБтК-нің 434-бабы (ортақ пайдаланатын қоғамдық орынды ластау) бойынша 4 құқық бұзушылық анықталып, шара көрілді.
– Біздің орталық өз жұмысын ешқашан кідірткен емес. Сондықтан Қызылорда қаласы тұрғындарының тыныш ұйқысы мен қоғамдық қауіпсіздікті қамтамасыз ету мақсатында өз жұмысымызды жалғастыра береміз,– дейді Қызылорда қаласы Полиция басқармасының Жедел басқару орталығының бастығы Берікбол Ерімбетов.
А.ӘДІЛЖАНҰЛЫ
