Спорт – денсаулық кепілі. Салауатты өмір салтын ұстанатын әрбір азамат мемлекет үшін үлкен абыройға ие тұлға. Айналасына зиянды әдет көрсетпей, үлгі аларлық істерімен танылатын спортқа жаны құмар жандардың көп болуы керек-ақ. Еліміз ғана емес, бүкіл әлем денсаулық саласына алаңдаулы. Себебі жылда шығатын түрлі аурулар, вирустардың кесірі жер шарының берекетін қашырары сөзсіз. Бұл ретте иммундық жүйесі күшті адамдар ғана аурудан айналып өтіп, қарсы төтеп бере алады. Иммундық жүйе мықты болуы үшін де спортпен шұғылданып, немесе дұрыс тамақтануды ретке келтірген дұрыс. Бүгінде еліміздің спорт саласына көңіл бөліп, ден қоюы қуантарлық жағдай. Балалардың, жасөспірімдердің қатысуымен өткізілетін спорттық турнирлер осыған дәлел болатындай. Еліміздің туын өзге елде көтеріп жүрген спортшыларымыздың имиджін біз де көтере білсек, спортқа қызығатын жастардың саны да артатынына сенім мол.
Сыр өңірі спортшылардан кенде емес. Еліміздің, өңіріміздің атын шығарып жүрген спортшыларымыз жетерлік. Ал, облысымыздың спортты дамытуда артта қалмай, белсене әрекет етуі спортшылар үшін үлкен қолдау. Қазіргі таңда спорттық сайыстар түрлі мереке қарсаңында, балалардың денсаулығын жақсарту мақсатында қаламызда жиі болып тұрады. Қызылорда қаласы мәдениет және спорт бөлімінің ұйымдастыруымен түрлі турнирлер жоғарғы деңгейде өткізіліп жүр. 2023 жылдың қаңтар айынан бері 46 спорттық іс-шара өткізіліп, оларға барлығы 7330 спортшы қамтылғаны қуантады.
«Нашақорлыққа жол жоқ», «Есірткісіз болашақ» атты ұранымен грэпплингтен жасөспірімдер арасында өткен қалалық ашық біріншілік, жалпы білім беретін мектеп оқушылары арасында өткен шахмат, балалар мен жасөспірімдер және жастар мен ересектер арасында панкратионнан өткен қалалық ашық біріншілік бұқаралық спортты дамытуға үлесі зор.
Қалада әлеуметтік теңсіздікке қарамай, спорт дегенде бәрі қамтылады. Мәселен, жыныстық қолсұғылмаушылықтың алдын алу профилактикасы бойынша құқық бұзушылықтың алдын алу, жат қылықтардан бойларын аулақ ұстау мақсатында, мектепішілік және құқық қорғау органдарында есепте тұрған кәмелетке толмаған жастар мен жасөспірімдердің арасында гір көтеруден, арқан тартудан және қол күрестен жарыс өтті. Ал, «Наурыз – 2023» мерекесінде қоғамнан оқшаулаумен байланысты емес жазаға сотталғандар тарапынан құқық бұзушылықты болдырмау және алдын алу мақсатында пробация қызметінде есепте тұрғандарды спорттық іс-шараларға тарту мақсатында спорттық жарыстар ұйымдастырылды.
Спортың түрі көп. Соның ішінде еркін күрестен 2012-2013 жылы туған жасөспірімдер арасында қалалық ашық біріншілік өтті. Сондай-ақ, дзюдодан 2008-2009 туған жасөспірімдер арасында қалалық ашық біріншілік өтіп, біріншілікте 150 спортшы өз күштерін ортаға салды. Ал, Қызылорда қаласы мен қалаға қарасты кент және ауылдық округтерде орналасқан жалпы білім беретін мектептердің мұғалімдерінен құралған командалар арасында волейболдан өткен жарыс тартысты болды.
1 маусым балаларды қорғау күніне орай Қызылорда қаласы мен қалаға қарасты кентте орналасқан жалпы білім беретін мектептерде білім алушы оқушылардың жазғы демалысын тиімді өткізу мақсатында шағын футбол жарыс ұйымдастырылды. Аталған жарысқа 70-ке жуық спортшы қамтылды. Жазғы демалысқа шыққан оқушылар үшін доп тебу бойларын сергітті.
Қалада әрбір күн текке кетпейді. Мәдени шаралармен қатар спорттық жарыстар өтіп тұрады. Оған қатысушылардың белсенділігі жоғары болады. Мәселен, еркін күрестен 2014-2015 жылы туған жасөспірім ұлдар арасында өткен қалалық ашық біріншілікке 120 спортшы қамтылып, жарыс жоғары деңгей көрсетті. Әрі қарай «Біз бақытты балдырған» атты көңілді эстафеталық жарыспен жалғасты.
1 маусым халықаралық балаларды қорғау күні мерекесіне арналған ұлттық спорт спорт түрлері көрерменге серпін берді. Аталған жарысқа 100-ге жуық спортшы қатысып, бақ сынады. Балалар мерекесіне орай «Zhiger» спорт клубының ашылуы және қазақ күресінен 2010-2011 жылы туған кіші жасөспірімдер арасында өткізілетін қалалық ашық бірінішілігі көпшіліктің көзайымына айналды.
Бұқаралық спорт түрлерімен жүйелі айналысу – үлкен спортқа алғашқы баспалдақ және салауатты өмір салтын қалыптастыру, әлеуметтік зиянды әдеттерден аулақ болып, қоғамдық тәртіп бұзушылық пен қылмыстың алдын алудың негізгі тиімді құралының бірі. Бүгінде Қызылорда қаласында дене шынықтыру және спортпен шұғылданушылардың саны орнықты өсуде. 2021 жылы шұғылданушылар саны 112649 адам, яғни 34,4%-ды құраса, 2022 жылы бұқаралық спортпен шұғылданушылар саны 127838 адамға жетіп, 36,6%-ды құраған. Биылғы жылғы нәтижелер де қуантады. Өткізіліп жатқан спорттық жарыстардың барлығы да тұрғындардың оң көзқарасына ие болып отыр. Тұрғындардың денсаулығын жақсартуға бағытталған шаралардың көптеп өткізілуі үлкен міндет. Қызылордалықтардың спортпен достасып, шымыр болуы, салауатты өмір салтын ұстануы – қаланың аурусыз, қауіпсіз аймаққа айналуының басты көзі.
Қ.ӘНДЕШҰЛЫ
