Полиция департаменті тарапынан еріктілер марапатталды

Қызылорда облысының Полиция депар­таменті жыл басынан қоғамдық қауіпсіздікті қамтамасыз ету, құқық бұзушылықтар мен қылмыстардың алдын алу мақсатында еріктілермен бірлесіп, нәтижелі жұмыс атқарып келеді. Еріктілер әр түрлі рейдтерге, құқық бұзушылықтардың жолын кесу бойынша жүргізілген жедел-профилактикалық іс-шараларға, түрлі акцияларға қатысып, белсенділік танытуда. Жоғалған адамдарды іздеу барысында полицейлерге белсенді еріктілер көмек көрсетуде. Мәселен, қызылордалық полицейлер жоғалған 10 жастағы жасөспірімді аман-есен тапты.

Қызылордада 28 қараша күні түнгі уақыт 00:32 шамасында 10 жастағы жас­өспірім үйінен «ойнауға кеттім» деп, белгісіз бағытқа шығып кетіп, қайта оралмағандығы жөнінде хабарлама келіп түседі. Іздестіру жұмыстарына Қызылорда қалалық Полиция басқармасының жеке құрамы, Ұлттық ұлан сарбаздары, Төтенше жағдайлар департаментінің қызметкерлері жұмылдырылады.

Жүргізілген іс-шараларының нәтижесінде 10 жастағы жасөспірім 28 қараша күні таңертеңгі сағат тоғыз шамасында аман-есен табылды. Ювеналды полиция бөлімнің инспекторлары жасөспіріммен және оның ата-анасымен профилактикалық түсіндірме жұмыстарын жүргізді.

Бұдан бөлек, Қызылорда облысы Полиция департаментінің Есірткі қылмысына қарсы іс-қимыл басқармасы мен «Қызылорда еріктілері» қоғамдық қоры мен «Жастар спорттық туризм және туристік көпсайыс федерациясы» жастар қоғамдық бірлестігі арасында ынтымақтастық туралы меморандумға қол қойылды.

Меморандумның мақсаты – наша­қорлықтың алдын алу саласында жәрдемдесу, нашақорлықтың таралуына қарсы тұруға бағытталған тұжырымдамаларды, бағдарламалар мен жобаларды әзірлеу және іске асыру, құқықтық ағарту, ақпараттандыру, кеңес беру түрінде жастарға тегін заң көмегін көрсету, психоактивті заттарды тұтынбай жастардың бос уақытын тиімді қолдануға бағыт-бағдар беру, өскелең ұрпақ арасында есірткі қылмысына қарсы іс-қимыл жасау, салауатты өмір салтын насихаттау, сондай-ақ Қазақстанда бұқаралық спорт пен шығармашылықты насихаттау және дамыту.

Ынтымақтастық шеңберінде тараптар нашақорлық пен есірткі қылмысының алдын алу саласында үкіметтік емес ұйымдармен ынтымақтастық орнату нашақорлық пен есірткі қылмысының таралуына қарсы тұруға, есірткі құралдары мен психотроптық заттарға сұранысты азайтуға, сондай-ақ денсаулықты қорғау бағытында ғылыми-әдістемелік шараларды қамтамасыз етуге, азаматтардың рухани, адамгершілік тәрбиесіне бағытталған бағдарламаларды, іс-шараларды іске асыруға ықпал ететініне сенім білдірді.

Жақында Қызылорда облысының Полиция департаментінде белсенді азамат­тық ұстанымдары мен ішкі істер органдарына қоғамдық тәртіпті сақтауға және өңірде азаматтардың қауіпсіздігін қамтамасыз етуге көмек көрсетіп, ерекше көзге түскен еріктілер марапатталды.

Жыл басынан қоғамдық қауіпсіздікті қамтамасыз ету, құқық бұзушылықтар мен қылмыстардың алдын алу мақсатында еріктілермен бірлесіп, нәтижелі жұмыс атқарылды. Еріктілер әр түрлі рейдтерге, құқық бұзушылықтардың жолын кесу бойынша жүргізілген жедел-профилактикалық іс-шараларға, түрлі акцияларға қатысып, белсенділік танытты. Осы орайда Қызылорда облысының Полиция департаменті тарапынан еріктілер мен еріктілер қозғалысын қолдауға ерекше көңіл бөлініп, еңбегі еленіп келеді.

«Ізгі қоғам қалыптастыру үшін волонтерлықты дамытудың маңызы зор. Қоғамдық тәртіпті қадағалау жолында белсенділердің ауқымды істерінің тәртіп сақшыларына көмегі ерекше. Жыл бойы бірлесіп ұйымдастырылған іс-шаралардың нәтижесі баршылық, қызмет барысында бізбен бірге жұдырықтай жұмылған волонтерларымызға алғысымызды білдіреміз» деді Қызылорда облысы Поли­ция департаменті бастығының бірінші орынбасары, полиция полковнигі Шамшидин Амитов Егенбердіұлы.

Құқық бұзушылықтың алдын алу, қоғамдық және жол қауіпсіздігін қамтамасыз ету, белсенді азаматтық ұстанымы үшін 31 ерікті алғыс хатпен марапатталды. Оның ішінде Қызылорда облысының “Волонтерлар фронт офисі” жетекшісі Болатбек Айтбенбетов, «Волонтеры Кызылорды» жетекшісі Ольга Чебакова, «Демеу» еріктілер тобының жетекшісі Әсем Мерекова және Қызылорда облысының “ЧФ Красивые сердца” жетекшісі Серік Ерімбетовтің еңбегі ерекше бағаланды.

Е.Ерболұлы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған