Қызылшадан қорғану жолы – уақытылы вакцинация

Қызылша – қызба, интоксикация, дақты-папулалы бөртпе, энантема, конъюнктива және жоғарғы тыныс жолдарының зақымдалуымен сипатталатын жедел вирустық инфекциялық ауру. Ол адамнан адамға ауа тамшыларымен жөтелгенде, түшкіргенде, сөйлескенде жұғады. Қызылшамен ауыратын адаммен тіпті қысқа уақыт қарым-қатынаста болған жағдайда екпе алмаған адамдардың қызылшаны жұқтыру қаупі өте жоғары.

Қызылша пневмония, бронхит, энцефалит сияқты асқынулармен қауіпті. Медициналық көмекке кеш жүгінгенде және қызылшамен қатар басқа аурулар болған жағдайда бұл асқынулар өлімге әкелуі мүмкін. Катаральды құбылыстармен (қызба, бас ауруы, әлсіздік) аурудың алғашқы белгілері және бөртпе пайда болған кезде дәрігермен кеңесіп, оның барлық ұсынымдарын орындау керек. Қызылша ауруы бастапқы кезеңде суық тию сияқты көрінуі мүмкін, сондықтан дәрігерге уақытылы барған жөн. Мамандар жіті респираторлық аурулардың белгілері бар балаларды мектепке дейінгі ұйымдар мен мектепке жібермеуге кеңес береді.

– 2023 жылдың басынан бері Қызылорда облысында лабораториялық зерттеу нәтижесімен нақтыланған қызылша ауруының 1274 жағдайы тіркелді. 82 пайызы – 14 жасқа дейінгі балалар арасында анықталды. Қызылша індетіне шалдыққандардың басым бөлігі ауруға қарсы екпе алмаған.

Қызылша ауруы бойынша эпидемиологиялық ахуалдың тек біздің елде емес, бүкіләлемде күрделенуінің себебін Дүниежүзілік денсаулық сақтау ұйымы халық арасында қызылша ауруына қарсы вакцинациялау барысының әлсіреп, екпеден бас тартушылар санының артуымен байланыстырады. Себебі ұжымдық иммунитет бәсеңдеген сайын ауру жұқтырып алу қаупі күшейе түседі. Қауіп тобында – екпе алмаған, иммунитеті әлсіз адамдар,- дейді облыстық санитариялық-эпидемиологиялық бақылау департаменті басшысының орынбасары Әлия Әбдіқайымова.

Расында, қызылшадан ең тиімді қорғану жолы – уақытылы вакцинация. Ол «Ұлттық екпелер» күнтізбесіне енгізілген, екпе тегін жіргізіледі. Вакцинация үшін қызылшаға қарсы қауіпсіз және тиімді вакцина қызамық пен паротитке (ҚҚП) қарсы компонентпен қоса қолданылады. Адам өз өмірін сақтап қалудан бас тартпауы керек. Екпенің көмегімен ауыр асқынулардың, мүгедектікке ұшыраудың, тіпті өлімнің алдын алуға болады.

Аурудан сақтанудың басты жолы ретінде бүгінгі күні тиісті контингенттер арасында, нақты айтқанда, 6-10 ай арасындағы сәбилер 29 күндік, 2-4 жас және медициналық қызметкерлерді қосымша жаппай иммундау 6 қарашадан басталып жүргізіліп келеді, иммундау шарасы әлі де жалғасып жатыр. Осы аталған контингенттер бойынша 24353 адам қызылшаға қарсы екпе алған.

Өз денсаулығымыз өз қолы­ызда екенін ескерсек, қайбір аурудың алдын алуда сақтанып жүргеніміз абзал. Ал, ауырған жағдайда дер кезінде ем алсақ, оның зардабы ұзаққа бармайды әрі отбасымыз, туыстарымыз, жан-жағымыз ауру-сырқаудан аман болады.

Н.Естемес

Пікір үстеу

Э-пошта мекенжайыңыз жарияланбайды. Міндетті өрістер * таңбаланған