Осы күні Қызылорда облысында көшелер мен қоғамдық орындарда тәртіп сақтау мен қылмыстың алдын алу мақсатында «Құқықтық тәртіп» жедел-профилактикалық іс-шарасы өтіп жатыр. Аталмыш шара 1 мен 10 маусым аралығын қамтиды. Іс-шараға Қызылорда облысы Полиция департаментінің жеке құрамы жұмылдырылып, қызмет өткерудің күшейтілген нысанына көшірілді. Оның да себебі жоқ емес. Қызылордада бірнеше күннің ішінде кісі өлімінен бастап адам құқына қол сұғушылық орын алды. Басқасы басқа, қазірде үлгі алатын мемлекеттік қызметкерлер арақ ішіп тайраңдаса, аппарат басшысы бөлім басшысымен жаға жыртысып, бір-бірін көкала торғайдай етіп сабауға көшті.
«Құқықтық тәртіптің» алғашқы үш күнінде 900-ге жуық әкімшілік құқық бұзушылық дерегі орын алса, оның ішінде мүлдем төзбеушілік принципі бойынша ұсақ бұзақылық 49, спирттік ішімдікті ішу немесе қоғамдық орындарға мас күйінде келудің 84, көлік құралын алкогольдік масаң күйінде басқарудың 7, кәмелетке толмағандардың түнгі уақытта жүрудің 134, түнгі тыныштықты бұзу бойынша 62 дерек анықталған. Тіркеусіз немесе жеке басты куәландыратын құжатсыз тұрудың 73 дерегі тіркелген. Жалға берілетін 98 пәтер тексерілген. Айтатыны жоқ, Қызылордада есепке шаққанда, күніне 300-дей құқық бұзушылық орын алып тұрғанын қалай таразылауға боларын білмей отырмыз.
Облыс көлемінде криминогендік ахуалды сейілту, құқық тәртібі мен жол қозғалысы қауіпсіздігін қамтамасыз ету шараларын кең көлемде жүргізу мен қылмыстың алдын алу, сондай-ақ, көшелер мен басқа да қоғамдық орындарда қылмыстарды ескерту және жолын кесуге бағытталған бұл жедел-профилактикалық іс-шараның өту барысы департамент бастығының бақылауында.
Н.Меңдібай
