Мамыр айында Шиелі ауданындағы көпбалалы отбасыларға 20 тұрғын үйдің кілті табысталған еді. Оған «Нұрлы жер» мемлекеттік тұрғын үй құрылысы бағдарламасы аясында 833,2 млн теңге қаржы бөлінген.
Қазір Сыр өңірі қарқынды құрылыс алаңына айналып, жаңа заманауи нысандар бой көтеруде. Облысымызда соңғы үш жылда жалпы ауданы 231 мың шаршы метрді құрайтын 2868 пәтерлік 148 тұрғын үй салынды. Биыл 31 млрд. 400 млн. теңгеге 130 мың шаршы метр 1924 пәтерлік 36 көпқабатты тұрғын үйдің құрылысы жүргізілуде. Алдағы уақытта 1430 пәтерлік 30 үй халық игілігіне табысталмақ. Арнайы қабылданған «Сыр жастары» бағдарламасы аясында алғаш рет жүзден астам жас отбасыға тұрғын үй беріледі. Бұл мақсатқа жергілікті бюджеттен 1 млрд. 200 млн. теңге, «Отбасы» банкі арқылы 500 млн. теңге, барлығы 1 млрд. 700 млн. теңге қаражат бөлінген.
Енді Конституция күні қарсаңында облыс әкімі Нұрлыбек Нәлібаев Шиелі ауданына жұмыс сапарымен барған тұста тұрғындарға 72 пәтердің кілтін табыстады. Аймақ басшысы қоныс той иелерін құттықтап, халықты баспанамен қамту мемлекеттің басым бағытының бірі болып қала беретінін жеткізді.
72 пәтерлік тұрғын үй «Көкшоқы» шағын ауданында салынған. Пәтерлер комиссия шешімімен заң аясында барлық санатқа бөлініп, республикалық бюджеттен 480 млн. теңге қаржы қаралып, тұрғын үй құрылысы басталған.
Несиелік тұрғын үй құрылысы бойынша биыл Қызылорда қаласында 520 пәтерлік 11 тұрғын үйді салып, пайдалануға беру жоспарлануда. Бұдан бөлек, Сырдария өзенінің сол жағалауында 84 пәтерлік жеті қабатты 6 тұрғын үйдің құрылысы басталды.
Сонымен бірге Шиелі ауданында облыс әкімі жаңа дене шынықтыру-сауықтыру кешенінің салтанатты ашылу рәсіміне қатысты. Аймақ басшысы өз сөзінде «Мемлекет басшысының тапсырмасына сәйкес аймағымызда спорт саласын дамытуға айрықша көңіл бөлінуде. Ел Президентінің бастамасымен өткен жыл «Балалар жылы» деп аталғаны белгілі. Атаулы жылда демеушілер көмегімен 1 млрд. 600 млн. теңгенің 80 спорт-ойын алаңы балаларға тарту етілді. Оның 6-уы Шиелі ауданында балалар игілігіне берілді. Демеушілер бұл жұмыстарды биыл да жалғастыруда. Үкіметтің қолдауымен аймақта спорт құрылымын дамытудың ауқымды жобалары жүзеге асырылып келеді. Өткен жылы Шиелі кенті «Көкшоқы» шағын ауданындағы спорт кешені күрделі жөнделіп, бүгінде онда тұрғындардың спортпен айналасуына барлық жағдай жасалған. Жастардың байрақты бәсекелерде, дүбірлі додаларда топ жаруына заманауи үлгідегі осындай нысандардың қосар үлесі мол», – деді.
Сонымен бірге, қонақтар аудан спортшыларымен кездесіп, болашақ чемпиондарға өз тілектерін білдірсе, балалар өз кезегінде ауыл спортын дамыту жолында жасалған қадам үшін ел ағаларына алғыстарын білдірді.
А.Сырлыбай
