Биыл 95 жылдығын дүркіретіп тойлаған Шиелі ауданы – бақ пен қыдыр қонған, ырысы мен берекесі тасыған, еңбексүйгіш қасиетімен дараланған, қаншама батырлар мен Еңбек Ерлерін дүниеге әкелген киелі мекен. Берекелі бірлік пен тынымсыз тірліктің арқасында ақ күріштің атасы атанған Ыбырай Жақаевтың шәкірттері Ұлбала, Закира, Шырынкүл, Айша, Жадыра сынды жұлдызды аналар – өскелең ұрпаққа үлгі өнеге.
Форумның негізгі мақсаты ауылдық аумақтарды дамыту, қоғамдағы әйел ролінің маңызын дәріптеу, ауыл әйелдерінің мәртебесін арттыру және қоғамдағы рөлін көтеру мақсатында ұйымдастырылған. Форумға батыр аналар, аудандарда әр салада қызмет жасап жүрген белсенді әйел-аналар, мәртебесі биік мемлекеттік қызметкерлер, ҮЕҰ өкілдері мен БАҚ өкілдері қатысты.
Форумға аудан әкімінің орынбасары Алмат Алдабергенов, облыс әкімінің отбасы және әйелдер істері жөніндегі уәкілі Гүлнар Жұмашева, Қызылорда облысы бойынша Әйелдер Күші Альянсының төрайымы Рахима Ахметова, облыстық әйелдер кеңесінің төрайымы Райкүл Байназарова арнайы қатысып, еңбегімен көзге көрініп жүрген әйел-аналарды Алғыс хатпен марапаттады.
Бір қолымен бесікті, бір қолымен әлемді тербеткен әйел-аналардың орны тек шаңырағында деген түсініктің аясын кеңейткен форумда ауданымыздың мәдениеті мен тарихын қадірлеп, әлеуметтік-экономикалық дамуына, мемлекеттік саясаттың жоғарғы деңгейде жүзеге асуына үлес қосып жүрген ақжаулықты аналарымыз мен қыз келіншектер марапат төрінен көрінді.
Б.Бағдатұлы
