ТҮНГІ РЕЙДТІҢ НӘТИЖЕСІ

Жаз мезгілі келгелі қала түні тынымсыз болады. Әсіресе, жастар мен жасөспірімдер арасында құқық бұзушылықтың орын алып жатады. Осыған орай Қызылорда қаласы әкімдігі жанынан құрылған мобильді топ кезекті түнгі рейдтік іс-шараларды ұйымдастырды. Негізгі мақсат – жастар мен жасөспірімдер арасындағы қылмыстың, топтық төбелес­тердің алдын алу және кәмелетке толмағандарға қарсы жасалатын оқыс оқиғаларды болдырмау. Мобильді топ құрамында БАҚ өкілдері, қоғам белсенділері, қалалық қоғамдық даму, білім, кәсіпкерлік және өнеркәсіп бөлімдері, прокуратура, ювеналды полиция қызметкерлері мен  жастар орталығы мамандары бар.

Жедел топ аралау кезінде қала аумағындағы ойын-сауық орындарын, саябақтар, ойын алаңдары және жастар көп шоғырланатын аймақтар назарға алынды. Сондай-ақ, кәсіп иелеріне жадынамалар беріліп, жауапкершілік туралы түсіндірілген хабарламалар таратылды.

Рейд барысында 36 әкімшілік құқық бұзушылық анықталды. Оның ішінде, кәмелетке толмағандардың түнгі уақытта жүргені үшін 31 ата-анаға қатысты Әкімшілік құқық бұзушылық туралы кодекстің 442-бабы бойынша әкімшілік шара көрілді. 1 ойын-сауық мекеме иесіне нысанда кәмелетке толмағандардың болуына жол бергені үшін ӘҚБтК-тің 132-бабы негізінде хаттама рәсімделді. Негізінде бұл бағыттағы жұмыс­тар күнделікті жүргізіледі. Ата-аналарға заңды өкілінсіз балаларын беймезгіл уақытта үйден тыс жіберулеріне тыйым салынады.

Жыл басынан бері ҚР ӘҚБтК-нің 442-бабы 2-бөлігіне сәйкес, яғни түнгі уақытта 23.00-ден кейін заңды өкілінсіз тұрғын жайдан тыс жерде болған 1292 жасөспірім, ҚР ӘҚБтК-нің 442-бабы 1 бөлігіне сәйкес 173 жасөспірім анықталған. Бұл көрсеткіш өткен жылдың осы кезеңімен салыстырғанда өскендігі байқалады.

Е.АСАН

Пікір үстеу

Э-пошта мекенжайыңыз жарияланбайды. Міндетті өрістер * таңбаланған