Қызыл мия зауыты қайта іске қосылды
Жылдар бұрын елде өндіріс орындары қарқын алып, артынан қайта құлдыраған кездер болды. Бірінің ғұмыры қысқа болды. Жабылды. Тоқырады. Соның салдарынан жұмыссыздар саны артқаны жасырын емес. Ал, аймақта ахуал қандай? Бұл ретте Жалағаш ауданындағы жағдайды елемей өтпеуге болмайды.
Расында, Жалағашта бір жыл бедерінде көптеген күрмеулі мәселелердің түйіні тарқатылды. Әсіресе, жұмыссыздық мәселесі шешімін тауып келеді. Өткен жылы 446 жобаға 3 млрд. теңгеден астам қаражат бөлініпті. Нәтижесінде 462 адам тұрақты жұмыспен қамтылған. Мұнымен қоса осы жылы ауданда тауарлы сүт фермасы жұмысын бастамақ. Бұл жоба арқылы ішкі нарықпен қатар, көршілес облыстарға да дайын сүт өнімдерін шығару көзделген. Бұл бағытта да жергілікті тұрғындарды жұмысқа тарту жоспарланып отыр.
Жалпы, ауданның әлеуметтік-экономикалық әлеуеті артып келеді. Жергілікті әкімдік кәсіпкерлік саласына серпін беріп, жаңа жұмыс орындарын ашудың түрлі жолдарын қарастыруда. Биылдың өзінде 1 млрд. 579 млн. теңгені құрайтын 21 жобаны жүзеге асыру жоспарланған. «21 жоба толық жүзеге асырылған жағдайда, қосымша 106 жаңа жұмыс орны іске қосылады деп жоспарлап отырмыз»,– дейді аудан әкімі Асқарбек Есжанов.
Жалағашта білім саласында да оңды өзгерістер бар. Балалардың кедергісіз білім алуына барлық мүмкіндіктер қарастырылуда. Жаңадан мектеп құрылысы басталғанда жұмысқа жергілікті тұрғындар тартылған.
– Құрылыстың жоба-сметалық құжаттары дайын. №123 мектеп-лицейге қосымша ғимарат салу, №31 және №33 мектептерді күрделі жөндеуден өткізу жұмыстарын жүргізетін боламыз. Бұдан бөлек «Жайлы мектеп» ұлттық жобасы аясында Жалағаш кенті орталығынан 300 орындық жаңа мектеп құрылысын салу жоспарлануда. Қазіргі таңда тиісінше жер телімі бекітіліп берілді. 2023 жылы жоба-сметалық құжаттар әзірленіп, 2024 жылы мектеп құрылысы басталатын болады. Сонымен қатар, медицина саласында да серпін бар. Биылғы жылы Мырзабай ахун, Аламесек елді мекендерінен жалпы құны 841 млн. теңгені құрайтын дәрігерлік амбулаторияның құрылысы басталады, – дейді Асқарбек Есжанов.
Аудан экономикасына айтарлықтай серпін беретін жобаның бірі – «Қызыл мия» зауыты. Алты жылдан бері өндірістік желісі тұралаған өндіріс орнының жұмысы қайта жанданды. Бұл жұртшылықтың қуанышын еселеп отыр. Өйткені жаңадан жұмыс орындары ашылды. Қазір онда 30 адамды тұрақты жұмыс істеуде.
– Мия зауытын іске қосқанда 60 адамды жұмыспен қамтамасыз етуге жоспарланған. Қазіргі таңда 31 жергілікті маман жұмысқа қабылданды. Қалған мамандарды алдағы уақытта толық қамтимыз деп отырмыз. Мия зауытының жұмысын жүйелі жандандыру мақсатында зауыт аясында тағы да бірнеше жобаларды ашудың мүмкіндіктерін ақылдасып жатырмыз. Ол қосымша елге инвестиция, екіншіден, қосымша жұмыс көзі болады, – деп, аудан әкімі бізбен жаңалығымен бөлісті.
Зауытта 30 адам екі ауысым бойынша жұмыс істеуде. Олардың дені жалағаштықтар. Солардың бірі – Абзал Ілиясов. Ол бұған дейін де осы зауытта қызмет атқарған. Алайда, өндіріс орны жұмысын тоқтатқан сәтте басқа өңірге жұмыс іздеп кетіпті. Енді, міне, зауыт қайта іске қосылып, жұмысқа шақыртқанына дән риза.
– Зауыт 2014 жылы іске қосылды. Сол кезде зауытқа алғашқылардың бірі болып жұмысқа қабылданған болатынмын. Жұмыс істедім, мамандардан үйрендім. Дегенмен, белгілі себептермен жұмыс тоқтап қалып, Астана қаласына басқа жұмыс іздеп кеттім. Сөйтіп жүргенде «зауыт қайта ашылды» деп, мені маман ретінде арнайы шақыртты. Қазір ауылыма келіп, зауыттың жұмысын жүргізуге атсалысып жатырмын, – деп, Абзал Ілиясов қуанышын жасыра алмады.
Қызыл мия тамырынан дайын өнім алу үшін зауыт 4 кезең бойынша жұмыс атқаруда. Бүгінде тәуілігіне 1,5 тонна тәтті ұнтақ шығарылып жатыр екен. Зауыт басшылығы алдағы уақытта қуаттылықты арттырып, тәуілігіне 3,5 тоннаға дейін жеткізуді көздеп отыр. Себебі, қызыл мия тамырына сұраныс артқан. Әсіресе, қытайлықтар қызығушылық білдірген. Айта кетейік, мия ұнтағы әлемдік фармацевтикада жоғары сұранысқа ие. Ол медицина, косметология және тамақ өнеркәсібі сияқты іргелі салаларда кеңінен қолданылады.
– Өнімге сұраныс өте көп. Қазір Қытай, Корея, Жапония аламыз деп отыр. Еуропа жақтан да сұраушылар келіп кетті. Кімнің бағасы ыңғайлы болса соған береміз. Бүгінде Қытайдан сұраныс көп. Олар бізбен келісімге отырған. Біз жылына алты жүз тонна шығарып береміз. Сұраныс өте көп, – дейді «БИС-ГРУПП» ЖШС директоры Серік Көкенай.
Жалпы алғанда, атқарушы билік елмен етене болған кезде тұрғындардың тұрмысы түзелетіні анық. Бұл ретте Жалағашта бірқатар оңды бастамалар бар. Айталық, аудан әкімі Асқарбек Есжановтың бастамасымен барлық сала жетекшілері ауыл-аймақты аралап, жұртшылықтың мұң-мұқтажына құлақ түруде. Соның нәтижесінде кезек күттірмейтін мәселелердің тізімі жасақталып, оны шешу жолдары пысықталған. Мәселен, өткен жылы ауыз су желілерін жаңғырту, жол инфрақұрылымын жетілдіру мен тұрғын үйлерге күрделі жөндеу жұмыстарын жүргізу аясында 30 жоба іске асырылған.
Е.ЕРБОЛҰЛЫ
