Әлем жаяу жүргенде, ата-бабаларымыз атпен жүргендігі туралы жиі айтылады. Көлік құралы ретінде жылқыны пайдалану сол кездегі алыс жатқан елді-мекендер үшін таптырмас құрал болатын. Әрбір қазақтың баласы, бала күнінен аттың құлағында ойнап, жанына жолдас еткен жануармен қай жер болмасын, жылқының күшімен жердің шаңын шығарып шапқылайтын. Адам күшіне уақыттың бағынбайтынын білсек те, қазіргі озық технологиялар бар дәуірде уақытты тиімді пайдалана алатын адамдардың адам үшін жасаған түрлі жаңалықтарын жетістікке баласақ болады. Ерте замандағыдай алысты жақындату үшін атқа мініп шабатын кезең артта қалған. Себебі, адам дамуының үдерісі қарқынды болып, түрлі көлік құралдарының пайда болуы өткен ғасырдың үлкен жетістігі еді. Қай ғалымдардың жаңалығын алып қарасақ та, түбінде адамзат үшін жасалған игі істерді көре аламыз. Ғылымға өзгеріс әкеліп, жаңа нәрсе ойлап табу ұлт таңдамайды. Жаңалық үшін жасалған жақсылықтың бәрі де жер шарындағы адамзаттың игілігі үшін екендігін ғалымдар айтып кеткен.
Уақытты үнемдеу арқылы көп нәрсеге үлгеруге болады. Шұғыл шаруалардың уақытын созбай, неғұрлым тез әрі жылдам жасау қауіптің алдын алады. Уақытты пайдалы түрде пайдалану адамзат үшін басты шаруа. Уақытты үнемдеп, алысты жақындату үшін ең қажетті құрал – тікұшақтар. Көкте қыран құстай қалықтаған ұшақтардың арқасында бару керек мекеннің межесіне жылдам жетеміз. Ел мен елді, қала мен қаланы жақындатып, адамдар үшін жұмыс жасайтын тікұшақтар, адамзат үшін ең үлкен жетістік десек болады. Медициналық көмек керек сәтте де, қанатты темірдің көмекке келетінін айтпасақ та білеміз. Елімізде әуежайға ағылатын халықтың қарасы көп. Жеке шаруа үшін не болмаса ағайынының қуаныш пен қайғысын бөлісу үшін қазақ халқының тікұшақтарға жүгінетіні тағы бар.
Жаңа Қазақстан үшін заманнан қалмай жаңа әуежайлардың болуы басты мәселе. Сапасы сын көтермейтін әуежайлармен алысудың дәуірін артқа тастап, жаңа дүниеге жүгіну де мемлекетіміздің негізгі мақсаты. Қызылорда өңірі де әуежайдың көмегіне жүгінуден алдыңғы қатарда. Осыған байланысты облыс әкімі Нұрлыбек Нәлібаев ел ағаларымен бірге береке мен бірлікке бағытталған Амал мерекесінде жаңа әуежайдың іргетасын қалау рәсіміне қатысты.
— Мемлекет басшысы Қасым-Жомарт Кемелұлының Сыр еліне деген қолдауымен аймақта берекелі істер атқарылуда. Облыс орталығында қала көркін еселеп, ажарын айшықтай түсетін бірқатар зәулім ғимараттың іргетасы қаланып, әлеуметтік нысандарды салу сәтті жүзеге асуда. Өздеріңізге белгілі, әуе қатынасы – өзінің ерекшелігімен үлкен сұранысқа ие, серпінді дамып келе жатқан саланың бірі. Жолаушылар және жүк ағымын ұлғайту, қызмет сапасын жақсарту үшін әуежайдың жаңа терминалын салу жөнінде шешім қабылданып, құрылыс жұмыстары жүргізілуде. Жаңа терминал жеке инвестор «Болат Өтемұратов» қорының қаржысы есебінен салынуда.
Әкімдік әуежайдың сыртқы инженерлік-коммуникациялық инфрақұрылымын жетілдіріп, терминал аумағын абаттандыратын болады. Жаңа терминалда жолаушыларға халықаралық стандарт талаптарына сай барлық жағдай қарастырылған. Аталған жоба өңіріміздің әлеуметтік-экономикалық дамуына оң әсерін тигізеді. Әуе көлігі қызметін халықаралық деңгейге жеткізуге, авиациялық қауіпсіздікті күшейтуге, жаңа әуе бағыттарының ашылуына мүмкіндік артады. «Қорқыт Ата» әуежайының жаңа терминалы ежелгі Сыр жеріндегі заманауи әуе айлағы әрі Қызылорданы көріктендіре түсетін тағы бір айтулы нысан болатынына сенімдіміз, – деді аймақ басшысы.
Кездесу барысында Арал, Жалағаш, Қармақшы аудандарының және Қызылорда қаласының құрметті азаматы, қоғам қайраткері, «Құрмет» орденінің иегері Биғали Қаюпов жаңадан бой көтеретін нысанның құрылысымен құттықтады. Жаңақорған, Шиелі, Сырдария аудандарының және Қызылорда қаласының құрметті азаматы Ибрагим Әбибуллаев та өз тілегін білдіріп, жиналған жұртқа батасын берді.
Жаңа әуежайдың аумағы 7,5 мың шаршы метрден асады, жалпы құны 31 млн. АҚШ долларын құрайды. Халықтың игілігіне нысан берілген сәттен бастап көлік саласының көрсеткіштері бірнеше есеге артатыны айтылды. Қазіргі таңда жылына 1400 рейс орындалса, 2025 жылға таман 3000-ға жететін рейстер болады деп күтілуде. 260 мыңнан 500 мыңға дейін тасымалданатын жолаушылардың саны көбеймек және жүк тасымалы 150 тоннадан 300 тоннаға артпақ. Құрылыс барысында жұмыспен 600-ден астам адам қамтылады, жұмыс аяқталып межесіне жеткесін 64 жаңа тұрақты жұмыс орындары құрылады.
Қалаішілік жолаушылардың тасымалын жақсарту мақсатында 2022 жылы «Өнеркәсіпті дамыту қоры» АҚ арқылы жаңа үлгідегі 150 автобус алынды. Сонымен қатар 1 млрд. 434 млн. теңгеге биылғы жылы тағы да 150 автобус сатып алу үшін құжаттар рәсімделу үстінде. Жаңа әуежайға баратын жаңа автобустар да қызметін мүлтіксіз орындамақ.
Облыс тұрғындары үшін жасалып жатқан шаруалар қарқынды түрде жүзеге асуда. Халық игілігіне бағытталатын жұмыстардың көптеп жүзеге асуы, қаланың қарқынды түрде дамуына септігін тигізеді. Дамыған елдермен терезенің тең тұруы үшін, барлық өңір заман талабына сай жабдықталған ғимараттармен көбейгені дұрыс.
Қазақбай өтебай
