«Кәусардың» кезекті жыр кеші

Шығармашыл адамдардың қоғамға өзгеріс алып келетіні туралы дерек көп. Қиялымен көкте қалықтап, адамның ойына кіріп шықпайтын тың идеяларды іштей ойлап жүру шығармашыл адамдардың әдеті. Шығармашылық бағыттағы адамдардың саласы түрлі болғанымен, барлығын біріктіретін ол – өнер. Өнерлі адамның қай ортада болмасын, көсіле сөйлеп, талантын таныстырған сәтте жұрт қошеметініне бөлене кетуі өнердің биік дәрежеде бағаланатынынан. Әлемдік сахналардағы өнерлі адамдарға тік тұрып қол шапалақтау өнерді құрметтейтін адамдардың көрінісі.

Қазақ халқымыздың өнерге жақын екендігі, қазақ даласында дүниеге келген барлық адамның ішіне бүккен бір өнері барын білеміз. Ұяңдығы мен қарапайымдылығы қатар жүретін қазақ халқы үшін өнерін көпшілік алдында көрсету алғашында қиындық тудырады. Алайда, бойы үйренген соң ортада барын салып, жұртты таңқалдырады. Сөз зергерлері саналатын ақындардың шығармалары қоғамдағы оқиғаларға негізделетіндіктен, ақындар мен тыңдарман үшін өлеңнің құдіреті қасиетті. Қазіргі таңда да ақындарды дәріптеп, елге танытып жүрген жандар көп емес. Поэзия лайықты бағаланып жүр ме? «Бүгінде поэзияға жақын жастар бар ма?» деп ойлауыңыз мүмкін. Бірақ, қазақ халқының жанына жақын өнер ешқашан өлмек емес.

«Ұстаз мәртебесі» газетінің жалындаған жас жеткіншектердің, жаны жырға құмар оқушылардың өнерін жұртқа таныту үшін қолға алған «Кәусар» жобасының мақсаты да сол, шығармашыл балалардың қолтығынан демеу. Ай сайын оқушылармен кездесуді үрдіске айналдырған газет қызметкерлері наурыз айында Б.Ермекбаев атындағы №271 орта мектепте ұстаздар мен жас ақындардың басын қосты. «Сөз – шабыт айнасы» атауымен айшықталған кездесу қазақтың рухын көтеретін «Адай» күйімен басталып, қобыздың үні де құлақ құрышын қандырды. Жас ақындар өлеңдерін оқып, көрерменнің ыстық ықыласына бөленді. №271 орта мектебінің оқушылары Бекзат Қарсанбай «Мұқағалиға» , Бекарыс Берікбай «Мен қазақпын», Ақерке Әлқожа «Қос ғашықтың жазылмаған жарасы», Гүлімжан Маханбетқали «Менің де бір орным бар білемін» атты өлеңдерін сахнада оқып берді. Оқушылардың өлеңдеріне ақын Айдар Әділжанұлы мен Қазақбай Әндешұлы баға беріп, өз пікірлерімен бөлісті. №261 мектеп оқушылары Нұрсила Болатбек, Салтанат Жаппасбай, №253 мектеп оқушысы Нұрайна Жүсіпбекова өз шығармашылықтарынан жыр оқып, көпшілік қошеметіне ие болды.

«Кәусардың» наурыз айындағы кешінің қорытындысында «Ұстаз мәртебесі» газетінің бас редакторы Нұрлан Көбегенұлы жас ақындарға тілегін білдіріп, өзі де өлең оқып берді. Оқушылар Нұрлан Көбегенұлына сұрақтарын қойып, газет бетіне өз шығармаларын жариялап тұруға ниетті екендерін танытты. Талай жүректі тербейтін поэзия кеші осылайша өз мәресіне жетті. Жаны жырға құмар жастардың болашақта әдебиетте биік белесті бағындырып, арқалы ақындардың көшін бастайды деп сенеміз. «Ұстаз мәртебесі» газеті жас буынның алғашқы шығармаларын оқырманға ұсынып, ақын болып қалыптасуына көмегін аямақ емес.

Қ.ӨТЕБАЙ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған