«Мереке-думан» әзіл-сықақ театры көпшіліктің сұранысына ие

Эмоцияға берілу адамдар үшін үйреншікті жағдай. Жаныңды жаралайтын жайттарда мұңайып, көңілді кірбің шалатын оқиғалар кездесіп жатады. Алайда, жиі мұңмен достасқаннан гөрі күліп жүрудің жанға дауа екендігін психолог мамандар айтып жүр. Демек, бір аптамыздың түгел дерлік қуанышты жағдайларға толы болуы үшін адамдардың күліп жүруге барынша тырысқаны дұрыс. «Күлкі адам өмірін ұзартады» демекші, қысқа ғұмырды қуанышты жайттармен толтырсақ, аз уақыттың өзі көтеріңкі көңіл-күйіміздің әсерінен ұзақ болып көрінетінін осы сөзден байқауға болады.

Қазақ халқы күлкіден кенде болған емес, өтірік өлең, әзіл айтыс секілді ауыз әдебиетіміздің жауһарлары ұлтымыздың күлкіге жоғары баға бергенін көрсетеді. «Әзілің жарасса атаңмен ойна» деген секілді ойлар әзілдесе білудің айып емес екендігін, бірақ әзілдің артық кетпей, белгілі бір мөлшерде болу керектігін ескертеді. Қазіргі таңда елімізде комедия жанры жоғары деңгейде дамып келеді. Халқымыз да осы жанр­дағы киноларға көптеп барып, жылда қазақ киносының дамуына атсалысып жүр. Кинолардың жыры басқа, халықты өздеріне тартып, түрлі интермедияларын қойып, концерттік бағдарламаларын жылда ұсынатын әзіл-сықақ тетарларынының орны бөлек. Сыр халқының да әзілден кенде емес екендігі, өңірлік әзіл-сықақ театрларының көрермендерге күлкі сыйлап жүргені белгілі.

1 сәуір күлкі күніне орай Қызылорда қалалық мәдениет үйлері, клубтар және халықтық ұжымдар МКҚК директоры Эльмира Қанатбаева «Мереке-думан» халықтық әзіл-сықақ отауының жұмыстары туралы айтып берді.

– «Мереке-думан» әзіл-сықақ отауы 34 жыл бұрын көркемөнерпаздардан құралған. Осы жыл аралығында үзбей халыққа өз өнерін көрсетіп жүр. Отыз жылдығы үлкен масштабта атап өтіліп, рес­публикалық деңгейде байқау өткізілді. Сондай-ақ, «Мереке-думан» әзіл-сықақ отауы жылына екі концерттік бағдарлама дайындап, халыққа ұсынады. Көркемөнерпаздардан құрылған бұл отау кәсіби театрлардан кем емес,- деді Эльмира Қожасқызы.

Ал, «Мереке-думан» әзіл-сықақ отауының белгілі әртісі Мейрамбек Нұртаза театрдың алдағы уақыттағы жоспарларымен бөлісті.

– Биыл Рамазан айына байланысты 1 сәуірде қойылатын концертті 22 сәуірге ауыстырдық. Дегенмен, 1 сәуір күні «Мереке-думан» әзіл-сықақ отауының жаңа интермедиясы халыққа әлеу­меттік желі арқылы жол тартады. Айта кететін жайт, 22 сәуірде өтетін кештегі басты интермедия­мыз «Кореядағы қазақтар» жобасы. Бұған қоса жуырда Шиеліде болатын дәстүрлі әзіл-сықақ байқауына дайындығымыз қызу жүріп жатыр,- деді.

Авторлар туралы «Мереке-думан» халықтық әзіл-сықақ отауының әртісі Берік Балтабаев:

– Біздің әзіл-сықақ отауының бір ерекшелігі, ойнайтын әзі­лі­­міздің бәрін өзіміз жазамыз. Ав­тор­лары өзіміз. Қоғамда болып жат­қан өзекті мәселелерді әзілмен жет­кізуге тырысамыз. «Күлкі – өмір, күлдіре білу – өнер, күлкі болу – өлім» демекші, ортамыз әр­да­йым қуанышқа тола берсін, -деді.

Қазір көпшілік саяси әзілдердің астарына үңілгенді жөн көреді. Бұл тұрғыда «Мереке-думан» әзіл-сықақ отауының саяси қойылым қоюға ешқандай қысымның көрсетілмейтінін, репертуарда бір-екі саяси қойылымның бар екенінен де хабардар етті.

Халқымыздың күлкі өнерін жоғары бағалайтыны әзілдің жүрек жарасын емдейтінін білгендіктен болар. Қазақы қалжыңның отаны Сыр өңірінде әзілдің туын көтеріп жүрген азаматтарымыздың бары қуантады. Түрлі жағдайды күліп қарсы алатын болсақ, шешілетін мәселенің түйт­кілін оңай табуға болады деген ой түйдік. Кезіндегі «Тамашаның» ізін жалғаған «Шаншар», «Алдараспан», «Шымкент-шоу», Сыр халқына танымал «Сыр әзілінен» кейін «Мереке-думанның» әзіл әлемінде көрерменге жол тартқаны облысымыз үшін қуантарлық жағдай. Алдағы уақытта түрлі концерттік бағдарламаларын халыққа ұсынып, әзіл әлемінде өз шыңына шығады деп сенеміз.

Қазақбай ӘНДЕШ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған