Сыр өңірінде ұлттық киім дәріптелді

«Адам көркі шүберек» деген сөздің астарына үңілсек, әдемі киімнің адам есінде ерекше қалатынын байқауға болады. Қазіргі таңда түрлі киім брендтерінің жарнамасын жер-жерден көріп жүрміз. Түрлі стильдегі киімдердің саудасы қоғамда қызып тұр. Шетелдік киімдердің саудасын жүргізіп, түрліше киінген жастарды көрсеңіз, таң қалмайсыз. Батыстың киіну стилі алғашында жұртты шошытса да, қазіргі күні елдің көзі үйренген. Кезіндегі ақ жаулықты аналарымыздың орнын боялған шаштардың иелері басқан. Ұлттық киімді тек қана Наурыз мерекесінде сандықтан шығарып алып, халыққа бір көрсетіп қоюды әдетке айналдырдық. Ескіліктің жұрнағына балап, ұлттық нақыштағы киімдерге менсінбей қарайтын жастарды да кезіктіресіз. Бірақ, әңгімеміздің бүгінгі айтылар ойы басқа. Қазірде ұлттық киімге құрметпен қарайтын жандардың барын айтқымыз келеді. Аналарымыздың сара жолымен жүріп келе жатқан қазақтың қыз-келіншектерінің бары қуантады.

Қызылордада «Ұлттық киім – ұлт ажары» атты облыстық ұлттық киімдер байқауы ұйымдастырылды. Облыс әкімі Нұрлыбек Нәлібаев, ҚР Ұлттық спорт қауымдас­тығының президенті Исламбек Салжанов, ҚР «Бәйге» федерация­сының президенті Қанат Көпбаев іс-шараға қатысты. Ақордада өткен ауызашар дастарханында ел президенті Қасым-Жомарт Кемелұлы Тоқаев: «Халқымыздың төл мәдениеті салт-дәстүрден, әдет-ғұрыптан бастау алады. Ұлттық киімнің өзі – ұлт мәдениетінің жарқын көрінісі. Ұл-қыздарымыз ұлттық киімді Наурыз мейрамында не болмаса басқа мерекелерде ғана емес, күнделікті киіп жүрсе жарасымды болар еді»,- деп, ұлттық нақыштағы киімдерді күнделікті кең қолданысқа енгізу керектігін және де маңыздылығын атап өткен болатын.

Байқауда қазақ дәстүріне сәйкес, дайындау шеберліктеріне байланысты 53 қыз-келіншектің киімдері бағаланды. Халықтың ықыласына бөленіп, ұлттық киімді насихаттаған байқауда 3-орынды Қарлығаш Ильясова, 2-орынды Ақерке Жакипова, 1-орынды Айгерім Әділбаева иеленді. Арнайы ынталандыру сыйлықтары Көркемай Ақбисенова, Камшат Дастановаға табысталды. Жеңімпаздар қаржылай сыйлықтармен марапатталды. Жүлде қоры 1 миллион теңгені құрады, І орынға 500 мың, ІІ орынға 300 мың, ІІІ орынға 200 мың теңге тағайындалды.

Қазанғап атындағы Қызылорда жоғары музыкалық колледжі директоры Ұлжан Байбосынова қазылар алқасының төрайымы болып, қатысушыларға әділ төрелік етті. Жеңімпаздар мен жүлдегерлерді құттықтап, болашақта да осындай шаралардың жиі өткізіліп тұруына тілек білдірді.

Ұлттық геніміздің қуаттылығын сезінбей жүрген қаншама адамдар бар. Асылында, өз ұлтымызды өзге ұлттан асыра мақтаудан аулақпыз. Алайда, әр ұлт өзінің ұлттық құндылықтарын дәріптеп, мақтанып жүруіне ешкім кедергі келтірмейді. Ұлттық киімдер де ұлтымыздың бір бөлшегі іспеттес екенін ұғатын уақыт келген шығар. Ұлттық намысы бойында тулаған жігіттер де, арулар да ұлттық нақышта тігілген киімдерді киіп жүрсе, айнала да әсемдікке бөленгендей әсерде болар еді. Осы жағынан келгенде Сыр өңірінде өткізілген ұлттық киім байқауының жұртқа берері мол. Дәріптеу үшін дүниені төңкеріп керек емес, тек қана ұйымдастыру деңгейін көтеріп, халықтың көңілінен шығатын осындай шаралар өткізіп тұрса жетістік. Қазақылық қаймағы бұзылмаған Қызылорда жерінде ұлтымыздың құндылықтарын дәріптеу жұмыстары жалғасын таба береді деп сенеміз. Ұлтымызды дәріптеп, ұлттық сананы дамыту баршамыздың парызымыз.

Қазақбай ӘНДЕШҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған