Ертеде бабаларымыз көктем келіп, жер бусанған уақытта бір-бірімен сағынысып жүздесіп, төс қағыстырып, мал-жан сұрасатын болған. Бүгінде бұл сәт Көрісу күні деп аталады, Амал мерекесі деген де атауы бар. Көпшілік қауым осы күні бұрынғы өкпе-ренішін кешіріп, бір-біріне амандық-саулық тілесіп, ақжарқын көңілмен көрісіп шығады. Ал, Көрісу күні – Наурыз мерекесінің бастауы. Наурыз – бірлік пен бауырластықты, татулық пен ынтымақтастықты дәріптейтін мейрам.
Сыр өңірінде Ұлыстың ұлы күні саналатын Наурыз мерекесіне арналған шаралар Амал мерекесінен бастау алмақ. Ал, негізгі шаралар наурыздың 21 мен 22-не жоспарланған. Наурыз мерекесіне орай облыстық қоғамдық даму басқармасының ұйымдастыруымен түрлі шаралар өткізілмек. Бұл туралы Өңірлік коммуникациялар қызметінің ақпарат алаңында облыстық қоғамдық даму басқармасының басшысы Алмасбек Есмаханов айтып берді.
— Амал мерекесіне орай «Амал келді, Жыл келді» атты мәдени-көпшілік шара ұйымдастырылады. Сондай-ақ, ерікті жастарымыз қарттар үйінде ардагерлерді құттықтап, қазыналарымызға құрмет көрсететін болады. «Наурыз – Думан» тақырыбында этно-мәдени бірлестіктер өкілдерінің қатысуымен перфоманс өткізіледі. Наурыз мейрамын атап өтудің жаңа тұжырымдамасына сәйкес, 73 тармақтан тұратын облыстық іс-шаралар жоспары әзірленіп, бекітілді. Мерекені жоғары деңгейде атап өту мақсатында ұйымдастыру-дайындық шаралары қарқынды жүруде, — деді Алмасбек Әбілқасымұлы.
Әр күннің өз атауы болады. Наурыздың 14-і «Амал күні» болса, 15-і «Қайырымдылық күні». Бұл күні Президент атынан аймақтағы көп балалы отбасы, еңбек адамдары, қоғам белсенділері, ардагерлер және тағы басқа азаматтарға арнап ауызашар беріледі. Бұған қоса, «Шарапатты Рамазан» атты ауызашар қоржынын тарату шарасы да ұйымдастырылмақ. Сондай-ақ, аймақтағы әлеуметтік аз қамтылған 2300 отбасыға қайырымдылық көмек беріледі. Ал, 16 наурыз «Мәдениет және ұлттық салт-дәстүр» күні, 17-і наурыз «Шаңырақ» күні болып бекітілді. Наурыздың 18-і «Ұлттық киім» күні болса, 19 наурыз «Жаңару күні», 20 наурыз “Ұлттық спорт күні”. Ал 21 наурыз «Ынтымақ» күні, ал 22 наурыз «Жыл басы» болып бекітілді. Бұл күні облыстың барлық аумағында бұқаралық іс-шаралар, мерекелік театрландырылған қойылымдар, концерттік бағдарлама, ұлттық спорт сайыстары өтетін болады.
Көрісу күнінен бастап Ұлыстың ұлы күніне дейін тақырыптық шаралар өткізіледі. Наурыз мейрамының құндылықтарын дәріптеуге, насихаттауға арналған 700-ге жуық мәдени көпшілік шаралар ұйымдастырылады.
— Арнайы бекітілген тұжырымдама бойынша «Мәдениет және ұлттық салт-дәстүрлер» күнінде Салихитдин Айтбаев атындағы көркемсурет галереясында Қазақстан Суретшілер одағының мүшесі, креатив суретші Дәулет Тойшыбавтың «Кілем арт» атты заманауи кілем бетіне сурет салу өнер көрмесі, «Анаға тағзым» орталығында салт-дәстүрден рәсімдер, «Ақмешіт» музейі филиалында «Ұлы даланың ұлық мерекесі» атты мерекелік шара, Н.Бекежанов атындағы театрда балалар қойылымы және барлық мәдениет ұйымдарында ұлттық салт-дәстүрді насихаттауға бағытталған іс-шаралар, мәдениет үйлері мен клубтарда ұлттық фильмдердің көрсетілімдері өткізіледі. «Ұлттық киім» күнінде «Анаға тағзым» орталығында «Этно FASHION» ұлттық киімдерден сән үлгісі фестивалі, Отбасы орталығында ұлттық киімдер дефилесі өткізіліп, әлеуметтік желілерде ұлттық киімдерді дәріптеу үшін арнайы челленджер ұйымдастырылады. 22 наурыз күні Өнер орталығының алдында басқармаға қарасты мекемелер киіз үйлер тігіп, креативті қолөнер шеберлерінің сауда көрмелері, музей, кітапхана, архив салалары бойынша тақырыптық көрмелер, ұлттық киімдерден дефиле, салт-дәстүрлерден көріністер, жыршы-жыраулардың, дәстүрлі орындаушылардың концерті өтеді,-деді облыстық мәдениет, архивтер және құжаттама басқармасының басшысы Мира Жомартқызы.
Биыл Байқоңыр қаласында мемлекеттік және ұлттық мерекелерді өткізу бойынша іс-шаралар жоспары әзірленіпті. Осы орайда, 23 наурыз күні Байқоңыр қаласында өтетін Наурыз мерекесінде облыстық филармонияның концерті ұйымдастырылмақ. Бұл күндері Қызылорда қаласы да ерекше дайындықта болады.
– Қазақ халқының ең жақсы көретін әрі ерекше күтетін мейрамында қала әкімдігі тарапынан 150-ге жуық мерекелік, спорттық және мәдени іс-шаралар өткізіледі. Мәселен, «Ынтымақ» күні деп бекітілген 21 наурызда қалаға қарасты 2 кент пен 7 ауылдық округте Ұлыстың ұлы күні аталып өтеді. Сонымен қатар, дәл осы күні эстрада жұлдыздарының қатысуымен мерекелік гала концерт ұйымдастырылады. Ал, негізгі шара 22 наурыз күні облыс орталығында тойланады. Нақтырақ айтқанда, «Өнер орталығы» жанындағы Тараз көшесіне «Руханият ауылы», «Ұстаздар ауылы», «Ақындар ауылы», «Денсаулық ауылы» деген секілді түрлі атаулармен 20-ға жуық киіз үй тігіледі. Әр киіз үйде қазақтың салт-дәстүрлері мен әдет-ғұрыптары дәріптеліп, ұлттық көріністер халықтың назарына ұсынылады. Одан бөлек, 22 наурызда Тасбөгет кенті мен сол жақ жағалауда, Студенттер сарайының алды мен Тағзым алаңында Наурыз мейрамы тойланады, — дейді қалалық мәдениет және спорт бөлімінің басшысы Жағыпар Айтбайұлы.
Қарап отырсаңыз, Қызылорда облысының Наурыз мерекесін атап өтуге ерекше дайындықпен кіріскені байқалады. Ұлт болып ұйысып, бірлік-берекемізді танытуда Сыр өңірі қашан да үлгі бола бермек.
Б.Санақұл
