Ұлттық мереке қарсаңында ұлт саулығы назарға алынды

Әр ұлттың ұйымшылдығын аңғартатын, ұйыстыратын мерекелері болады. Әсіресе, ұлттық мерекенің мұндайда маңызы зор. Республика күнінің қайта бекітілуі де бірлікті бекемдетіп, ел іргесін нық нығайтып қойды. Айтулы күннің қадірін дүйім халық ұғынып, тарих басқан таңбаны түйсінгені анық. Республика күні – ұлттың ұлылығы ұлықталатын, өткеннің өткелдеріне көз тастайтын, бүгіннің бедеріне назар аударатын ұлық мереке. Осы тұста, ұлттық мереке аясында аянып қалған ешкім жоқ. Бірнеше іс-шаралар жүргізіліп, халыққа қажетті қызмет те көрсетілуде.

Еңсесі биік егеменді елдің ең бірінші басымдығы халықтың әл-ауқатын арттыру. Не дегенмен сау халық һәм сау ұрпақтың ұлт үшін қызмет етіп, өркениетті ел болуда өрге өрмелей алатыны аян. Сондықтан халық пен денсаулық ұғымы мемлекеттің негізгі тірегі, кемел келешектің кепілі екеніне еш күмән жоқ. Әсте, бақыт байлықпен өлшенбейді. Бұқара да басты байлықтың денсаулық екенін жақсы біледі. Әлбетте, бұл билік басындағылардың да назарында. Себебі, саулық мойын бұрып қарауды қажет ететін, елеп-ескеруді керек ететін мәселе. Содан болар, ұлттық мерекенің тұсында «ашық есік» күндері де ұйымдастырылуда. ҚР Президенті Қасым-Жомарт Тоқаев: «Республика күні елдің мемлекет құру жолындағы тарихи қадамының символы болуы керек. Әрине, Тәуелсіздік күнінің бастапқы мәні сақталады. Бұл күн мемлекеттік мереке болып қала береді. Бірақ тәуелсіздік алуға зор үлес қосқан ұлттық батырларымызға тағзым күні ретінде атап өтілуі керек» деген болатын.

Иә, Республика күні мемлекетіміздің қалыптасу тарихы ұлықталатын, өткеннің өнегесін өскелең ұрпаққа насихаттайтын күн болмақ. Айтулы күнге орай, «Ашық есік» күні №3 қалалық емханада өткізілді. Қуантарлығы, білікті дәрігерлердің жиналып, халыққа тегін көмек көрсеткендігі. Асылында, жанашырлық пен қамқорлық бар жерде күмән мен күдікке орын жоқ. Тиісінше, ақ халаттылар мен халықтың етене жақындығы пайда болады. Тәжірибелі дәрігер кардиолог, әлеуметтік қызметкер, психолог, мейірбике мамандары халыққа медициналық қызмет көрсетті. Келушілерге кезексіз кеңес беріліп, артериялық қан қысымы, бой мен салмақ өлшеніп, қандағы қант пен холестерин мөлшері анықталды. Сонымен қатар, денсаулық сақтау мамандары тұрғындарға өз денсаулығына жауапкершілікпен қарау оны нығайту мен сақтау тәсілдері бойынша ақпараттар ұсынды.

Замира ҚОНЫСЖАН

Пікір үстеу

Э-пошта мекенжайыңыз жарияланбайды. Міндетті өрістер * таңбаланған