Байрақты бәсекеде бағы жанған қызылордалықтар

Спорттағы жетістіктер ел дамуының негізгі көрсеткіші десек артық айтқандық емес. Себебі, спортта сүрінуден гөрі өрлеу басым. Еңбекпен келген жеңістің халықты бір марқайтып қоятыны, спортшының мерейін үстем ететіні, мемлекет мәртебесін биіктететіні бесенеден белгілі. Ендеше, адам уысында тұрмайтын уақытты тиімді пайдаланып, күні-түні жаттығу залынан шықпай, шыңдалуға келгенде шекесі тырыспайтын Сыр спортшыларының еңбегі ерен. Жеңіліс тапса түңілмей, жеңіске жетсе көкірегін кермейтін ұстанымына ұқыптылықпен қарайтын, қалпынан таймайтын қайраттылардың батыр болмысына қайран қаласың. Дүбірлі додада ел мен ер намысы сынға түскен шақта жеңілмеуге іштей серт еткен серілер сөзінде тұратынына талай мәрте сендірген. Себебі, жалауды көкте желбіретіп, әуезді әнұранды әлем төрінде орындап, елге жүлдемен оралуы соның айқын дәлелі. Айбынды азаматтармен қатар қайсар қыздар да спорт саласының дамуына сүбелі үлес қосып жүргені көпке мәлім. Биязылық пен батылдықты бір арнаға тоғыстыра білген нәзік арулардың ерге тән қасиетіне сүйсінбеске болмайды. Ендеше, әр ай сайын Сыр елін сүйінші хабармен қуантып жүрген жігерлі жастардың жетістіктеріне жіктеп көрелік.

Жекпе-жекте жығылып көрмеген, спорттың түр-түрінен тауы шағылмай, тұғырдан көрінген талаптылар талай тартыста тартынбаған. Тіпті, теннис турнирінде де табандылық танытып, үстел ойынында үздік атанып үлгерді. 24-29 қазан аралығында Ташкентте теннистен ITF J3 Tashkent халықаралық турнирі өткен болатын. Турнирде Ерділдә Ерасыл жұптық ойында 1-орын алып, жеңімпаз атанды. Содан соң Ерасыл қарағандылық Виталий Зацепин екеуі жұптасып финалдық ойында украиналық Эрик Ткаленко және ресейлік Даниэль Хазимениді ұтты. Жеңіс жолында үздік болуға жанталасқан жарысқа Қазақстан, Ресей, Беларусия, Өзбекстан, Ливан, Польша, Литва, Украина, Голандия спортшылары қатысты. Халықаралық турнирге қатысудан қалыс қалмай, бағын сынап, жүлдеге ие болуда қажыр-қайратын жұмсайтын спортшылар барда Сыр елінің жағымды жаңалықтары толастамасы хақ.

Жақында шахматтан ардагерлер арасында өткен Қазақстан Республикасы чемпионаты аяқталды. 30 қазан мен 4 қараша аралығында өткен чемпионатқа Астана, Алматы, Шымкент қалалары мен Солтүстік Қазақстан, Қостанай, Түркістан, Жамбыл, Павлодар, Ұлытау, Ақтөбе, Қызылорда облыстарынан 70-ке жуық шахматшы қатысты. Ой еңбегі байқалатын ақыл ойынында ардагерлер 1,2 және 3-орындарды иемденіп, жеңімпаз атанды. Нәтижесінде Қызылорда облысынан бақ сынаған Шадияр Ермағамбетов 1-орын, Айжан Асанова 2-орынмен марапатталды.

Аяқпен және қолмен соққы беру әдістері қолданылатын каратенің төндірер қаупі де жоқ емес. Соған қарамастан спорттың бұл түрінен бас тартып, басын бұғып қалған жанды көрмейсің. Керісінше спорт жетістіктерінің тең жартысы каратеге де қатысты. 5-6 қараша аралығында «Мұз айдыны» спорт кешенінде карате-додан жасөспірімдер арасында ҚР чемпионаты өтуде. Чемпионатты облыс әкімінің орынбасары Нұрымбет Сақтағанов ашып, қатысушыларға сәттілік тіледі. Сонымен қатар, облыстық карате-до федерациясының президенті Қайрат Боранбаев өз құттықтау сөзінде аталмыш спорттың өңірдегі жетістіктеріне тоқталып өтті. Бақ пен баптың бәсекесінде, жеңіс пен жеңілістің жекпе-жегінде жастардың жігерлі екені байқалды. Бұл өскелең ұрпақтың өн бойында өрлік мінездің қалыптасқанын анық аңғартты. Жарысқа еліміздің әр өңірінен 14 команда, 500-ге жуық спортшы 24 салмақ дәрежесінде жүлделерді сарапқа салуда. Ендеше, барша қатысушыларға сәттілік тілеп, жеңіс шын мықтыға бұйырады деп сенеміз.

Сонымен қатар, 5-6 қараша күндері «№2 ОРМБЖМ» спорт залында ұлттық валюта күні және ҚР Қаржы Министрлігі Ішкі мемлекеттік аудит комитетінің құрылғанына – 30 жыл толуына орай шағын футболдан турнир болып өтті. Биыл үшінші мәрте ұйымдастырылған турнирге Қызылорда қаласы мекемелерінен құрылған 6 команда, 70-ке жуық спортшы қатысты. Турнирді салтанатты түрде облыстық мәдениет және спорт басқармасының басшысы Руслан Рүстемов ашып, шараның маңыздылығына тоқтала келе, барша қатысушыларға сәттілік тіледі. Белгілі сала мамандары аяқ доптың алаңында алғырлығы мен жылдамдығын көрсетіп, тартысты турнирде тапжылмастан үздік ойын көрсетті. Жарыс қорытындысы бойынша Қызылорда облысының мемлекеттік кірістер департаменті 1-орын, Қызылорда облысы бойынша экономикалық тергеп-тексеру департаменті 2-орын, Қызылорда облыстық прокуратурасы 3-орынға ие болды.

Қазақ елін қуанышқа бөлеген Сыр саңлағы Айдос Сұлтанғали тағы да жеңіс тұғырынан көрінді. Әзірбайжанның астанасы Бакуде грек-рим күресінен Әлем кубогі өтті. Әлемдік додада күрес түрлерінен үздіктер қатарынан табылатын Түркия, Әзірбайжан, Иран, Қырғызстан және Әлем құрамалары бақ сынасты. Әлем құрамасы дүние жүзінің ең мықты палуандарынан құралған және осы құрама сапында 60 кг салмақта Сыр спортшысы Айдос Сұлтанғали өнер көрсетті.

Айдос боз кілемде Әзірбайжан және Түркия елінің қарсыластарымен екі кездесу өткізіп, екеуінде де жеңіске жетті. Осылайша жерлесіміздің командасы қола медаль иеленді. Күресте жауырыны жерге тимей, тізесі бүгілмеген тарланның таланты талайды таңдай қақтырғаны тағы рас. Қарсыластың әдісінен әлі құрымай, итжығыста итеңдемеген палуан кезекті жеңісімен көптің ықыласына бөленді. Осы уақытқа дейін марапат мінберінен түспеген Сыр спортшысының жеткен жетістігі көп-ақ. Үміт пен күдік кезек алмасатын кезеңде күш-қуатын сарп етіп, күмәнді сейілтіп, сенімді ақтаудың өзі жігіттік жігерліліктің айқын көрінісі.

4-6 қараша аралығында WKF-каратеден жасөспірімдер арасында өткен ҚР чемпионаты өз мәресіне жетіп, қорытындыланды. Нәтижесінде Сыр спортшылары 6 алтын, 1 күміс, 9 қола медаль иеленді. Сонымен қатар, «Нұрсәт» теннис орталығында шахматтан өткен «Қызылорда шуағы – 2022» атты балалар арасындағы республикалық турнир қорытындысы бойынша Сыр спортшылары 5 алтын, 4 күміс, 6 қола медальға ие болды. Жарысқа Астана, Алматы, Шымкент қалалары мен Қостанай, Жамбыл, Түркістан, Қызылорда облыстарынан 187 жас шахматшы қатысты. Еркін күресте де ел еңсесін түсірмеген ерлер үштікке ілініп, мықтылардың бәсекесінде бақ сынап, топ жарды.

2-6 қараша аралығында Тараз қаласында еркін күрестен ересектер арасында Д.Қонаев атындағы халықарлық турнир болып өтті. Турнирге Бахрейн, АҚШ, Венгрия, Моңғолия, Өзбекстан, Қырғызстан, Қазақстан елдерінің мықтылары қатысты. Жарыс қорытындысымен Сыр спортшылары қос қола медаль иеленді. Азамат Шағапұлы мен Бекзат Тәжі 3-орынмен марапатталды.

Сыр саңлақтары жеңіс жолында аянып қалған емес. Тыңғылықты дайындық пен тиянақтылықтың нәтижесінде ел сенімін ақтап, байрақты бәсекеде бағы жанып жүр. Спортшылар осы қалыптан таймай, қарқынды үдететін болса, әлі талай додада үмітті ақтайтынына сенім мол.

Замира ҚОНЫСЖАН

Пікір үстеу

Э-пошта мекенжайыңыз жарияланбайды. Міндетті өрістер * таңбаланған