Биылғы жыл қызылордалық «Қайсар» футбол клубы үшін тәжірибеге толы болды. 2022 жылды бірінші лигада өткізген команда барлық ойынды нәтижелі аяқтап, екінші орынды иеленді. Бұл көрсеткіш осы жылы басталатын ел біріншілігіне өнер көрсетуге мүмкіндік сыйлады. Футбол жанкүйерлерінің ыстық ықыласына бөленген «қасқырлар» да маусым басында қаржылық қиындықтарға кезікті. Дегенмен жыл басында команданың бас бапкері Сұлтан Әбілдаев журналистермен өткен баспасөз мәслихатында мәселелерге қарамастан, алға үлкен мақсат қойылғаны жайлы нақты өзінің мәлімдемесін жасады. Осыдан кейін ұжымға сеніп, қолдау көрсеткен жанкүйерлер қарасы көбейді. Бастапқы ойындарда стадионға ақылы кіру қажет болғандықтан, халық көп жиналмады. Бірақ уақыт өте келе басшылық кездесуді тамашалау үшін алаңға тегін келуді көпшілікке ұсынды. Бұл сәтте команда үшін өткізетін әр ойынның бәсі жоғары болды.
Клуб маусымды қарқынды бастап қызығушылық танытқан көрерменді қуанышқа бөледі. Орта кезеңде нәтиже саябырсыды, ұпайдан шашау шықты. Оған себеп бәсекеге қатар түскен Қазақстан кубогы үшін ойында премьер лига ұжымдарымен болған кездесулер еді. Ұжымға додада ширек финалға дейін жорығын жалғастырды. Бұл сында «Қайсар» тәжірибелі «Ордабасы» клубына жол берді. Жанкүйерлер қазіргі жағдайды саралай келе, ұжымның осы жетістігіне де риза болғанын жеткізді. Бес мыңға жуық жанкүйер стадионға келіп, сүйікті командасына қолдау көрсетті. Осы жағдайдан соң бірінші лига ойындарына көңіл бөлу мүмкіндігі артты. Енді қалған кездесулерде нәтижеге жету маңызды рөл атқарды. Ойыншылар өзіне жүктелген жауапкершілік жүгін сезіне білді. Халық сеніміне селкеу түсірмей, қайта үдесінен шықты деп айта аламыз.
Мерзімінен бұрын Сыр футболшылары премьер лига ойындарына жолдама алды. Ұжымның капитаны, көшбасшысы Мақсат Байжановты мансабындағы соңғы ойынында жергілікті билік абыроймен шығарып салды. Облыс әкімі Нұрлыбек Нәлібаев алаңға келіп, клуб аңызына темір тұлпар сыйға тартты. Биылғы жылға қорытынды жасап, көрсеткен нәтижеге дән риза екендігін жеткізді. Келесі маусымда «Қайсар» футбол клубына әкімшілік тарапынан қаржылық қолдау болатының жеткізді. Сонымен қатар Ресей мемлекетіндегі Краснодар қаласындағы сыйымдылығы 12 мың жанкүйерді құрайтын тек футболға арналған стадионның жобасымен танысқанын, келесі жылы қолдау көрсететін демеушілермен серіктес болып, алаңның соғылу жұмыстары басталатынын көпшілікпен бөлісті.
Қазіргі таңда команда жаңа бапкермен жұмысын қайта бастауда. Басшылық білікті ресейлік маман Виктор Кумыковқа сенім артады. Ел біріншілігінде бірнеше ұжымды баптаған азамат жерлестерімізді алға жетелейді деген үміттеміз. Бүгінде «Қайсар» футбол клубы Түркия еліндегі Анталья қаласында бірінші оқу-жаттығу жиынын өтуде. Жаңа ойыншылар іріктеліп, өзге лигалардың ұжымдарымен жолдастық кездесулер ұйымдастырылуда. Келешектен үміт көп, оны жасыра алмаймыз. Өңіріміздегі тарихы бар командаға үлкен сенім артамыз. Премьер лигада сәтті жыл өткізуіне тілекшіміз.
Еліміздің абыройын қорғаған былғары қолғап шеберлерінің де жетістіктері бір төбе. Бокстан Азия чемпионатына әртүрлі салмақ дәрежесінде ерлер мен әйелдер арасында жиырма бес спортшыны қатар қосты. Құраманың қанжығасы жиырма бір медальға толды. Жалпы көрсеткіш бойынша алғашқы сатыда Қазақстан, ал қалған орындарды Өзбекстан, Үндістан ұжымдары өзара бөлісіп алды. Көк туымызды желбіретіп, абыроймен оралған майталмандар арасында жерлесіміз Қамшыбек Қонқабаев та болды. Кәсіпқой боксшы атанса да, тәжірибесінің арқасында кезекті рет құрлық біріншілігіне қатысуға мүмкіндік туды. Бәрі финалдық бәсекеге дейін ойдағыдай болғанмен, ақтық мәреде өзі қалаған алтын жүлде бауырымызға бұйырмады. Дегенмен көрермендердің ықыласы спортшымызға ерекше ауып, оған әдеттегідей керемет қолдау білдірді.
Өңірімізде жоғары дәрежеде дамыған гандбол спорты жайлы айтатын қызықтар да бар. Ер жігіттерге қарағанда, қыз балалары әуес болған жарыс түрі аймақта даму үстінде. Биылғы турнирді Қызылорда қаласында өткізген арулар осы біріншілікте топ жарып, жеңімпаз атанды. Он екінші рет ел үздігі атағына ие болды. Мұндай көрсеткіш басқа командалар үшін алынбас қамал іспетті. Елімізде енді ғана етек жайып, жастардың қызығушылығын арттырған бәсекеге алдағы уақытта үлкен қолдау көрсетілуі мүмкін. Болашақта гандболшы арулар әлемдік аренаға жолдама алып, ел намысын асқақтатады деген үміттеміз.
Дәл қазіргі сәтте аймақта барлық спорт түрлеріне қолайлы жағдай жасалу үстінде. Облыс әкімі Нұрлыбек Машбекұлы кездесулерде ұсыныстарды қарастырып, жоспарын айқындаған көрінеді. Ендеше алдағы жылдары Сыр спортшылары өз мүмкіндіктерін сәтті пайдаланып, жүлделі болатынына сеніммен қарайық.
Нұрдәурен ЖӘРДЕМХАН
